သျှမ်းပြည် တောင်ကြီးမြို့အတွင်း ဗုံးဖောက်ခွဲမှုများတွင် ပါဝင်သူဟု စွပ်စွဲခံရပြီး တစ်လကျော် ဖမ်းဆီးထိန်းသိမ်းခြင်း ခံထားရသူ ပြန်လည် လွှတ်မြောက်လာကြောင်း စုံစမ်းသိရသည်။

ပြီးခဲ့သည့် ဇွန်လ ၂၀ ရက် ည ၁၀ နာရီကျော်အချိန်တွင် အင်အား ၃၀ ခန့်ရှိသည့်စစ်ကောင်စီတပ်သား များက တောင်ကြီးမြို့ ကျောင်းကြီးစုရပ်ကွက်နေ ကိုသန့်ဇင်ထွန်းကို နေအိမ်ထိလာရောက်ကာ အကြမ်းဖက် ဖမ်းဆီးခေါ်သွားပြီး တစ်လအကြာထိန်းသိမ်းခံရကြောင်း သိရသည်။

စစ်ကောင်စီ မှ တလကျော်ကြာ ဖမ်းဆီးခံရပြီး ဇူလိုင် (၂၇)ရက်တွင် ပြန်လွှတ်မြောက်လာကြောင်း သိရသည်။

“ဟုတ်ပါတယ်၊ အစ်ကိုကြီးက ပြန်လွှတ်လာပါပြီ၊ သူ့ကို ဖမ်းသွားတာက တောင်ကြီးမြို့က ဗုံးဖောက်ခွဲမှုတွေမှာ ပါဝင်လှုပ်ဆောင်သူလို့ စွပ်စွဲပြီးဖမ်းသွားတာလေ၊ ထောင်ထဲမှာ တစ်လအကြာ ဖမ်းဆီးထိန်းသိမ်းခံရပြီးတော့ ဇူလိုင်လ ၂၇ ရက်နေ့မှာ ပြန်လွှတ်လာပါတယ်” ဟု ကိုသန့်ဇင်ထွန်းနှင့် ဆွေမျိုးတော်စပ်သူ တစ်ဦးက သျှမ်းသံတော်ဆင့်ကို ပြောသည်။

ကိုသန့်ဇင်ထွန်းသည် တောင်ကြီးမြို့ရှိ အမှတ် ၁ ရဲစခန်းတွင် ဖမ်းဆီးထိန်းသိမ်းထားခြင်းခံရပြီး၊ ဖမ်းဆီး ထိန်းသိမ်း ခံရသည့် အစပိုင်းကာလများတွင် စစ်ကောင်စီတပ်သားများ၏ စစ်ဆေးမေးမြန်းမှုများ ကို မကြာခဏ ဖြေကြားပေးခဲ့ ရကြောင်းလည်း သိရသည်။

“စစဖမ်းသွားတုန်းကတော့ စစ်ဆေးမေးမြန်းတာတွေရှိတယ်တဲ့၊ မြို့တွင်းက ဗုံးပေါက်ကွဲမှုတွေကို အဓိက ဦးတည်ပြီး မေးတယ်လို့ အစ်ကိုကြီးက ပြောပါတယ်၊ သူက မလုပ်ရတော့ မလုပ်ရဘူး၊ မသိဘူး ဖြေတယ်၊ တစ်ခါတစ်လေတော့ အရိုက်ခံရပြီးတော့ သူတို့က စစ်မေးတာ ဖြေရတယ်ပြောပါတယ် ” ဟု ကိုသန့်ဇင်ထွန်းနှင့် ဆွေမျိုးတော်ဆပ်သူ တစ်ဦးက သျှမ်းသံတော်ဆင့်ကို ပြောသည်။

အမှတ် ၁ ရဲစခန်းတွင် ဖမ်းဆီးထိန်းသိမ်းခံထားရသည့် ကာလတစ်လျှောက်လုံးတွင် ကိုသန့်ဇင်ထွန်း အတွက် မိသားစုဝင်များက ထမင်းချိုင့် ပို့ပေးရကြောင်းလည်း အထက်ပါ ပုဂ္ဂိုလ်ကပြောသည်။

တောင်ကြီးမြို့ အမှတ် ၁ ရဲစခန်းတွင် တောင်ကြီးမြို့တွင်း ဗုံးပေါက်ကွဲမှု နှင့် ဆန္ဒပြမှုများတွင် ပါဝင် သည့် မတရားစွပ်စွဲမှုများနှင့် ဖမ်းဆီးထိန်းသိမ်းခြင်းခံထားရသော တခြားသူများလည်း ရှိနေကြောင်း လည်း သိရသည်။

“အစ်ကိုက အစောပိုင်း သူတို့ စစဖမ်းသွားတုန်းကပဲ စစ်ဆေးမေးမြန်းမှုခံရတာပါ၊ တခြားအကျည်းသား တွေကတော့ အစ်ကို့ထက် အများကြီး ခံရတယ်တဲ့၊ သူတို့ သတ်မှတ်ထားတဲ့ စည်းကမ်းတွေ၊မေးမြန်းပြီး သူတို့ လိုချင်တာ မရရင် ရိုက်နှက် အပြစ်ပေးခံရတာတွေရှိတယ်” ဟု ၎င်းကပြောသည်။

ကိုသန့်ဇင်ထွန်း ဖမ်းဆီးထိန်းသိမ်းခံထားရသည့် ကာလအတွင်းတွင် တောင်ကြီးမြို့တွင်း ဗုံးပေါက်ကွဲမှု များလည်း ဆက်လက် ရှိနေသည့် အတွက် စွပ်စွဲချက်များကို ဖြေလျော့ပေးပြီး ပြန်လည်လွှတ်ပေးလိုက် ခြင်းဖြစ်ကြောင်း သိရသည်။

အဆိုပါ ကိုသန့်ဇင်ထွန်း ပြန်လည် လွတ်မြောက်လာခြင်းနှင့် ပက်သက်ပြီး ညီမဝမ်းကွဲ တော်စပ်သူ တစ်ဦးက ၎င်း၏ အစ်ကိုဖြစ်သူ ပြန်လည် လွတ်မြောက်လာရသည့် နည်းတူ အခြားသူများကိုလည်း ပြန်လည် လွတ်ပေးစေလို ကြောင်း သျှမ်းသံတော်ဆင့်ကို ပြောသည်။

“ဖောက်ခွဲရေးအဖွဲ့ထဲ မပါလို့ သူတို့ဘက်က သက်ညှာပေးတဲ့ အနေနဲ့ လွတ်ပေးလိုက်တယ်လို့တော့ ပြောပါ တယ်၊ ဒါပေမယ့် သက်သေမရှိ တာတောင် ၁ လကျော် အဖမ်းခံထားရတာတော့ မဖြစ်သင့်ပါဘူး၊ အပစ်မရှိ တဲ့ ပြည်သူတွေကို ဖမ်းဆီးသတ်ဖြတ်မှု ကိုရပ်တန့်ပေးပါ၊ ဖမ်းဆီးခံရသူတွေကိုလည်း အကုန်လုံးပြန်လွှတ် ပေး စေချင်ပါတယ်” ဟု ၎င်းကပြောသည်။

စစ်ကောင်စီမှ နိုင်ငံတော်အာဏာ သိမ်းယူပြီးနောက် သျှမ်းပြည် မြို့တော် တောင်ကြီးမြို့အတွင်းတွင် စစ်ကောင်စီတို့၏ မတရားစွပ်စွဲချက်များဖြင့် ဖမ်းဆီးထိန်းသိမ်း ခံထားရသည့် အရပ်သား ပြည်သူ ၂၀၀ နီးပါးရှိကြောင်း သိရသည်။