သျှမ်းမြောက် သီပေါမြို့နယ်တွင် ကိုဗစ်ကူးစက်မှု နေ့စဉ် မြင့်တက်နေပြီး ကျေးလက်ဒေသများအထိပင် ကူးစက်မှု ရှိလာပြီး၊ သေဆုံးထိရှိကြောင်း သိရသည်။
သို့သော် ကျေးရွာလူထု ပူးပေါင်းပါဝင်မှု အားနည်းနေသည့်အတွက် ကိုဗစ်ကူးစက်ပျံ့နှံ့မှု ပိုမိုများပြားလာမှာကို စိုးရိမ်နေကြောင်း သီပေါမှ ပရဟိတအသင်းဝင်တစ်ဦးက ခုလို ပြောသည်။
“အခုထိ တချို့သူတွေက မယုံကြသေးဘူး၊ အဲ့လိုတွေ ကြုံနေရတော့ အရမ်းအန္တရာယ်ကြီးတာပေါ့၊ တကယ်လို့ ဖျားနာတာ နေမကောင်းဖြစ်နေတာတွေရှိရင် ချက်ချင်းအကူညီလှမ်းတောင်းပါ အချိန်မရွေးကို လာကူမယ်၊ ခုထိ ကျေးရွာတွေ ပူးပေါင်းမှုက အားနည်းလွန်းတော့ ရောဂါပိုး ပိုပြီး ပျံ့သွားမှာကိုစိုးရိမ်တယ်” ဟု အဆိုပါ ပရဟိတ အသင်းဝင်တစ်ဦးက သျှမ်းသံတော်ဆင့်ကို ပြောသည်။
သီပေါမြို့နယ်ရှိ ဆွတ်လန်းကျေးရွာတွင် ယမန်နေ့က လူတစ်ဦး လဲကျသေဆုံးမှုဖြစ်ပေါ်ခဲ့ကြောင်း၊ တချို့ကျေးရွာများတွင်လည်း ရုတ်တရက်သေဆုံးသူများ ရှိနေကြောင်း သိရသည်။
ထို့အပြင် သီပေါမြို့ပေါ်ရှိ သံဃာတော်များလည်း ကိုဗစ်ကူးစက်ခံနေရကြောင်း ဒေသခံ တစ်ဦးက ပြောသည်။
“မြို့အဝင်မှာရှိတဲ့ ရွှေမောင်းကျောင်းက သီလရှင် (၃)ပါးကို မနေ့က စစ်လိုက်တာ အားလုံး Positive ထွက်တယ်၊ ခုဆို ကိုဗစ် ပိုးတွေ့တဲ့ သီလရှင် အားလုံး (၈)ပါးရှိပြီ၊ ဦးဇင်းက (၃)ပါးရှိတယ်၊ နောက်ထပ် ဦးဇင်းတွေကို ဒီနေ့ စစ်ဆေးဖို့ လုပ်နေတယ်” ဟု ဆိုသည်။
ပြီးခဲ့သည့် အပတ်တွင်လည်း သီပေါ ဘုရားကြီး ကျောင်းရှိ သံဃာ (၁၅)ပါး ကိုဗစ်ကူးစက်ခံရပြီး ယခုတွင် အဆိုပါ သံဃာတော်များ ကျန်းမာရေးပြန်လည်ကောင်းမွန်နေပြီဖြစ်ကြောင်း သိရသည်။
Stay at home မြို့နယ်ဖြစ်သည့် သီပေါမြို့နယ် ဆွန်လုံကျေးရွာအုပ်စုတွင် စစ်ဘေးရှောင် (၃၀၀)ကျော် ကျန်ရှိနေသေးကြောင်း သိရသည်။
ယမန်နေ့အထိ နမ့်လန်ဒေသအပါအဝင် သီပေါမြို့နယ်တွင် ကိုဗစ် ကူးစက်လူနာ (၇၀၀)ခန့် ရှိနေပြီး သေဆုံးသူ (၃၀)ကျော်နှင့် ဆေးရုံဆင်းခွင့်ရသူ (၃၀၀)ကျော် ရှိနေကြောင်း သိရသည်။
Leave a Comments