သျှမ်းပြည် အရှေ့ပိုင်း တာချီလိတ်မြို့ ရောင်နီဦးကွင်းအတွင်း ဖွင့်လှစ်ထားသည့် ကာစီနိုနှင့် လောင်းကစား ရုံများတွင် ကိုဗစ် – ၁၉ ရောဂါ ကူးစက်ခံရထားရသည့် အတည်ပြုလူနာ ၃၀ ကျော်ရှိကြောင်း စုံစမ်းသိရသည်။

ကိုဗစ်-၁၉ ကူးစက်မှုနှှုန်းမြင့်တက်လာသည့် အတွက် တာချီလိတ်မြို့ ကို Stay at Home အဖြစ်ကြေညာထားသော်လည်း လက်ရှိမှာ ကာစီနိုနှင့်လောင်းကစားရုံများကို ဆက်လက်ဖွင့်လှစ်နေဆဲ ဟု ဒေသခံများပြောပြချက်အရသိရသည်။

လက်ရှိ ရောင်နီဦးတွင်ဖွင့်လှစ်ထားသည့် ကာစီနိုနှင့်လောင်းကစားရုံများတွင် ကိုဗစ် -၁၉ လူနာ ၃၀ကျော်ရှိနေ သော်လည်း ကာစီနိုနှင့် လောင်းကစားရုံများ ဆက်လက်ဖွင့်လှစ်နေသေးသဖြင့် တာချီလိတ်ပြည်သူများက စိုးရိမ်နေကြကြောင်း တာချီလိတ်ဒေသခံ အမျိုးသားတစ်ဦး က ပြောသည်။

“ရောင်နီးဦးမှာ ၁၀ ပုံ ၁ ပုံလောက် ဆေးစစ်ကြည့်တာ ရလဒ်က ဒီလောက်တောင်ထွက်လာတယ်ဆို တော့ အကုန်လုံးစစ်လိုက်ရင် ပိုးတွေ့လူနာက အများကြီးထွက်လာမှာပဲ၊ ပြီးတော့ အခုပိုးတွေ့သူကို လည်း အဲ့ဝန်း ထဲမှာပဲ ထားထားတယ်၊ ဘယ်လို ကုသမျိုးပေးနေလဲ ဆိုတာလည်းမသိရပါဘူး၊ အခုချိန် ထိတော့ ကာစီနိုဝိုင်း တွေမပိတ်သေးဘူး” ဟု အမည်မဖော်လိုသည့် တာချီလိတ်မြို့ခံ ပြည်သူတစ်ဦးက သျှမ်းသံတော်ဆင့်ကို ပြောသည်။

ရောင်နီဦးကွင်းအတွင်းတွင် နေထိုင်ကြသူများသည် အများစုမှာ တရုတ် လူမျိုး များဖြစ်ကြပြီး အဆိုပါ ကွင်းအတွင်း လုပ်ကိုင်သည့် ဝန်ထမ်းများကို Lock Down ချထားသော်လည်း အဝင်အထွက်မပျက်ရှိ နေကြောင်း ၎င်းကပြောသည်။

“ရောင်နီဦးကွင်းမှာ တရုတ်အများကြီးရှိတယ်၊ အထောက်အထားမဲ့တဲ့သူတွေရောပေါ့၊ အခုဝန်ထမ်းတွေ ကို ကွင်းထဲကနေ အပြင်ထွက်လို့မရနိုင်အောင် Lock Down ချထားပေမယ့် တရုတ်အဝင်အထွက်တွေ ကနေ့တိုင်း ရှိတယ်၊ ပြီးတော့ ကွင်းထဲက ပိုးတွေ့တဲ့သူတွေကိုလည်း သူတို့ တရုတ်ဆေးပဲတိုက်ပြီး ထား ထားတယ်” ဟု အထက်ပါ ပုဂ္ဂိုလ်က ပြောသည်။
တာချီလိတ်မြို့အတွင်းတွင် ကိုဗစ် -၁၉ ကူးစက်ရောဂါ တတိယလှိုင်းအတွင်း အတည်ပြုလူနာ (၁၀၀၀) ခန့် ရှိလာနေပြီး ဖြစ်သော်လည်း သက်ဆိုင်ရာက ထိရောက်စွာ ဆောင်ရွက်မှု မရှိသဖြင့် ဒေသခံများက စိုးရိမ်နေကြကြောင်း သိရသည်။