သျှမ်းပြည် အရှေ့ပိုင်း တာချီလိတ်ခရိုင် အတွင်း ပုဒ်မ ၅၀၅ ဖြင့် မတရားဖမ်းဆီးချုပ်နှောင်ထားခြင်း ခံရ သော အသက် ၁၈ နှစ်အောက်လူငယ်များကို စစ်ကောင်စီ မှ ပြန်လည်လွှတ်ပေးရန် စီစဉ်နေလျက်ရှိကြောင်း စုံစမ်းသိရှိရသည်။
စစ်တပ်မှ နိုင်ငံ့အာဏာသိမ်းခံရပြီးနောက် အာဏာရှင်ဆန့်ကျင်ရေးလှုပ်ရှားမှုများတွင် ပါဝင်သည် ဟူသည့် စွပ်စွဲချက်များဖြင့် လူငယ်အများအပြားကို စစ်ကောင်စီတို့မှ ဖမ်းဆီးခဲ့သည်။
ထို့နောက် ယခုတွင် တာချီလိတ် ခရိုင်အတွင်းမှ ဖမ်းဆီးခံရသည့် အသက် ၁၈ နှစ်အောက် လူငယ်များကို ပြန်လည်လွှတ်ပေးရန် စီစဉ်ပေးလျက်ရှိကြောင်း သိရသည်။
အာဏာရှင် ဆန့်ကျင်ရေး လှုပ်ရှားမှုများတွင် ပါဝင်သည် ဆိုသည့် အကြောင်းပြချက်ဖြင့် ပုဒ်မ ၅၀၅ (က)၊ (ခ) တို့ဖြင့် အမှုဖွင့်ခံထားရပြီး ပြန်လည်လွတ်ပေးရန် စီစဉ်လျက်ရှိနေသည့် အသက် (၁၈) နှစ်အောက် လူငယ်များသည် တာချီလိတ်ခရိုင်အတွင်းမှ လူငယ် (၉)ဦး ရှိနေကြောင်း သိရသည်။
တာချီလိတ်ခရိုင်အတွင်းမှ ပြန်လွှတ်ပေးရန် စီစဉ်ပေးနေသည့် လူငယ် (၉) ဦးတွင် မိုင်းဖြတ်မြို့မှ လူငယ် တစ်ဦးပါဝင်ကြောင်း သိရသော်လည်း အမည်များကိုတော့ မသိရသေးပါ။
ထို့အပြင် ကျိုင်းတုံမြို့ မှ ဖမ်းဆီးခံထားရသည့် အသက် (၁၈) နှစ်အောက်လူငယ်များကို ပြန်လွှတ်ပေးရန် အစီအစဉ်များရှိနေကြောင်းလည်း သိရသည်။