သျှမ်ပြည်တောင်ပိုင်း တောင်ကြီးမြို့တွင် နေထိုင်သည့် မိသားစုဝင် (၃)ဦးကို စစ်ကောင်စီ မှ ဖမ်းဆီးသွားခဲ့ပြီး၊ ပြန်လည်လွှတ်ပေးရန် ကျပ်သိန်း (၁၅၀)ပေးဆောင်ခဲ့သော်လည်းပြန်လွှတ်ပေးခြင်း မရှိသေးကြောင်း စုံစမ်းသိရသည်။
လွန်ခဲ့သည့် မေ ၃၁ရက် ညနေ (၃)နာရီ တွင် တောင်ကြီးမြို့ ဆေးခန်းသွားပြရန်သွားသည့် ဦးမျိုးဝင်း မောင်းနှင်လာပြီး ဒေါ်ဝင်းမာ နှင့် သမီးဖြစ်သူ မသက်ဖူးဇင်တို့ ၏ မော်တော်ကား ကို စစ်ကောင်စီ အုပ်စုမှ အကြောင်းပြချက်မရှိ တားပြီး ထိုမိသားစုဝင် (၃)ဦးကိုဖမ်းဆီးသွားခဲ့သည်။
ထိုဖမ်းဆီးပြီးနောက် မိသားစုဝင် (၃)ဦး ပြန်လွှတ်ရန် အတွက် စစ်ကောင်စီကို ငွေကျပ် သိန်း (၁၅၀)ပေးဆောင်ခဲ့သော်လည်း ယနေ့ အချိန်ထိ ပြန်လွှတ်ပေးခြင်းမရှိသေးကြောင်း မိသားစုဝင်များနှင့် နီးစပ်သူတစ်ဦးက သျှမ်းသံတော်ဆင့်ကို ပြောသည်။
“အဲ့နေ့က အဖေဖြစ်သူကို ဆေးခန်းပြဖို့ သွားကြတာ၊ ရှေ့ကသွားနေတဲ့ စစ်ကားတစ်စီးကို ကျော်ပြီးမောင်းလို့ ဆိုပြီး သူတို့ကားကို တားပြီး မိသားစု တစ်ခုလုံးကို ဖမ်းသွားတော့တာပဲ၊ ဖမ်းပြီးတဲ့နောက်မှာ စစ်သားတစ်ယောက်က မဖူးသက်ဇင်ရဲ့ ဖုန်းနဲ့ သူတို့ကိုလွှတ်ပေးစေချင်ရင် တစ်ယောက်ကို သိန်း ၅၀၊ စုစုပေါင်း သိန်း ၁၅၀ ပေးရမယ်ဆိုလို့ ငွေကြေးကိစ္စကို ကျနော်တို့ ပေးပြီးတာတောင် မလွှတ်ပေးသေးဘူး” ဟု ၎င်းက ဆိုသည်။
လက်ရှိတွင် မဖူးသက်ဇင်တို့ မိသားစုသည် နှစ်လအကြာ ဖမ်းဆီးခံရပြီးနောက် အဆက်အသွယ်များလည်း ပြတ်တောက်သွားကြောင်းသိရသည်။
“သူတို့ကို ပိုက်ဆံပေးပြီးတဲ့နောက် ဖုန်းပါသိမ်းလိုက်တာထင်တယ်၊ အဲ့ကနေစပြီးတော့ ဘယ်လိုမှ ဆက် သွယ် လို့ မရတော့ဘူး၊ သူတို့ကို ဘယ်နေရာမှာ ခေါ်သွားပြီး ဘယ်လို ဖမ်းထားလဲဆိုတာလည်း မသိရဘူး၊ စုံစမ်းတာလည်း နေရာစုံနေပါပြီ” ဟု အထက်ပါ ပုဂ္ဂိုလ်က ပြောသည်။
ဦးဝင်းမောင်တို့ မိသားစုသည် တောင်ကြီးမြို့တွင်းတွင် နေထိုင်ကြသူများဖြစ်ကြပြီး ဦးဝင်းမောင်ကိုယ်တိုင် ရောဂါအခံရှိသူ တစ်ဦးဖြစ်သည့် အပြင် သမီးဖြစ်သူ မဖူးသက်ဇင်ကလည်း ငယ်ငယ်ကတည်းက နှလုံးအား နည်းတဲ့ ရောဂါအခံရှိနေသည့် အတွက် ၎င်းတို့ မိသားစု အတွက် စိုးရိမ်စိတ်ပူနေကြောင်း ၎င်းမိသားစုဝင်နှင့် နီးစပ်သူတစ်ဦး က ပြောသည်။
စစ်ကောင်စီမှ နိုင်ငံတော် အာဏာသိမ်းယူပြီးနောက်ပိုင်းတွင် တောင်ကြီးမြို့မှ အရပ်သား (၂၀၀) နီးပါး ဖမ်းဆီးခံရကြောင်း သိရသည်။
Leave a Comments