တောင်ကြီးမြို့ ဒေသခံ အမျိုးသမီး(၄)ဦး နှင့်အမျိုးသား(၂)ဦး စစ်ကောင်စီမှ ဖမ်းဆီးသွား

0

သျှမ်းပြည် မြို့တော် တောင်ကြီးမြို့တွင် ညကြီးအချိန်မတော် အမျိုးသမီးများကို စစ်ကောင်စီများက လိုက်လံ ဖမ်းဆီးကြောင်း စုံစမ်းသိရှိရသည်။

ယမန်နေ့ ည ဇူလိုင်လ ၁၁ နာရီ အချိန်ဝန်းကျင်မှ ယနေ့ ဇူလိုင်လ ၁၇ ရက်နေ့ မနက် ၄ နာရီအထိ တောင်ကြီး မြို့နယ်အတွင်း စစ်ကောင်စီတပ်သားများက တောင်ကြီးမြို့ ရပ်ကွက်များထိ ဝင်ရောက်စီးနင်းကာ အမျိုးသမီး ၄ ဦး အမျိုးသား ၂ ဦးတို့ကို အကြမ်းဖက် ဖမ်းဆီးသွားကြောင်း သိရသည်။

“ည ၁၁ နာရီခန့်မှာ ရတနာသီရိရပ်ကွက်ဖက်က အထက ၉ သုံးလမ်းဆုံနားမှာ စစ်သားနဲ့ ရဲတွေက အိမ်စီး ကားတွေ ၁၀ စီးနဲ့ ရပ်စောင့်နေကြတာ၊ အရပ်ဝတ်ထားတဲ့ စစ်သားနဲ့ ရဲတွေကလည်း များတယ်၊ ရပ်ကွက်ထဲ လမ်းကြိုလမ်းကြားကို ဓါတ်မီးနဲ့ထိုးကြည့်ပြီးရပ်ကွက်ထဲဝင်တာ သူတို့အင်အားက ၃၀ နီးပါးလောက်ရှိတယ်၊ လင်မယားနှစ်ဦးကို ဖမ်းခေါ်သွားတယ်” ဟု တောင်ကြီးမြို့နေ ဒေသခံတစ်ဦးက သျှမ်းသံတော်ဆင့်ကို ပြောသည်။

ထို့နောက် မိနစ် ၄၀ ခန့် ကြာချိန်တွင် အင်အား ၂၀ ကျော်ခန့်ရှိ စစ်ကောင်စီ တပ်သားတို့က ချမ်းမြသာစည် ရပ်ကွက် နယ်မြေ ၅ မှ နေအိမ်တစ်အိမ်ကို ဝင်ရောက်စီးနင်းကာ လင်မယားနှစ်ဦး ဖမ်းဆီးခေါ်ဆောင်သွား ကြောင်း လည်း ၎င်းက ပြောသည်။

“သူတို့စဝင်လာတုန်းက နေအိမ်ကို ချက်ချင်းမသိလို့ ထင်တယ်၊ အော်ဟစ်ဆဲဆိုပြီး ရပ်ကွက်ဒလန်သတင်းပေးမှု ကြောင့်ပဲ သူတို့က အိမ်ကိုသိသွားပြီး စကားများသံကြားမိတယ်၊ ပြီးတော့ ဖုန်းတောင်းတာ မပေးလို့ ဆိုပြီး လင်မယား နှစ်ယောက်စလုံးကို ဖမ်းခေါ်သွားတာပဲ” ဟု အထက်ပါ ပုဂ္ဂိုလ်က ပြောသည်။

ယမန်နေ့တွင် စစ်ကောင်စီ မှ အမျိုးသမီးများကို ဦးတည်ပြီးဖမ်းဆီးနေကြာင်း၊ ထိုဖမ်းဆီးခေါ်ဆောင်သွားသည့်ထဲတွင် ကလေး ၁နှစ်သာ အရွယ်သာရှိသေးသည့် မိခင်တစ်ဦးလည်းပါဝင်ကြောင်း တောင်ကြီးဒေသခံ ကိုအောင် က သျှမ်းသံတော်ဆင့်ကို ပြောသည်။

“မနေ့ညက တောင်ကြီးမှာ အမျိုးသမီးတွေကိုချည်းလိုက်ဖမ်းနေတာ၊ဒီနေ့မနက် ၂ နာရီခန့်မှာလည်း ကလေးမိခင်တစ်ဦးကိုလည်း လာဖမ်းသွားတယ်၊ သူ့ကလေးက ၁ နှစ်လောက်ပဲ ရှိအုံးမယ်၊ မနက် ၄ နာရီမှာ ကျတော့ အသက် ၂၁ ဝန်းကျင် မိန်းကလေး တစ်ဦးကိုလည်း ဝင်ဖမ်းတာ၊ စစ်ကောင်စီတွေက လူစိတ်ပျောက်နေကြပြီ” ဟု ကိုအောင် ကဆိုသည်။

ဇူလိုင်လအတွင်းတွင် တောင်ကြီးမြို့နယ်အတွင်းမှ လူငယ်များ ၃၀နီးပါး ဖမ်းဆီးခံရပြီး၊စစ်ကောင်စီ လက်ထက် (၅)လသာကာလအတွင်း တောင်ကြီးမြို့ နယ်အတွင်းရှိ အရပ်သား (၂၀၀)ကျော် ဖမ်းဆီးခံရကြောင်းသိရသည်။

Leave a Comments