မိုင်းနောင်ဘက် SSYG-PDF နှင့် စစ်ကောင်စီ တိုက်ပွဲဖြစ်သတင်းထွက်ပေါ်ပြီး PDF တပ်ဖွဲ့များ ကွဲထွက်မှုဖြစ်

0

သျှမ်းပြည်တောင်ပိုင်း မိုင်းနောင်ဘက် တွင် ယမန်နေ့ (ဇူလိုင် ၁၅)ရက်၌ စစ်ကောင်စီတပ် နှင့် South Shan Youths Group PDF တိုက်ပွဲ ဖြစ်ပွားခဲ့ကြောင်း သတင်းများထွက်ပေါ်လာခဲ့ပြီးနောက် PDF တပ်ဖွဲ့များမှ ကွဲထွက်မှုများ ရှိလာကြောင်း သတင်းရရှိသည်။

ယမန်နေ့ ဇူလိုင်လ ၁၅ ရက်နေ့ ညနေပိုင်း ၅ နာရီဝန်းကျင် အချိန်တွင် သျှမ်းပြည် တောင်ပိုင်း မိုင်းနောင်ပတ် ဝန်းကျင်အနီးတစ်ဝိုက်တွင် အမြန်လမ်းမကြီးအတိုင်း မောင်းနင်းလာသော စစ်ကောင်စီတို့၏ ကားတစ်စီးကို ခြုံခို တိုက်ခိုက်ရာ စစ်ကောင်စီတို့ဖက်မှ ကားတစ်စီး ပျက်စီးဆုံးသွားရပြီး လူထိခိုက်မှုများလည်း ရှိကြောင်း South Shan Youths Group PDF က ထုတ်ပြန်ထားသည်။

ထို့တိုက်ပွဲနှင့်ပတ်သက်ပြီး မိုင်းနောင် ဒေသခံတစ်ဦး က “ တိုက်ပွဲဖြစ်တာတွေ မကြားရဘူး။ စစ်ကောင်စီ နဲ့ PDF နဲ့ တိုက်ပွဲဖြစ်ဖြစ် ၊ တိုင်းရင်းသားလက်နက်ကိုင်အချင်းချင်းတိုက်ပွဲဖြစ်ဖြစ် ကျနော်တို့ သိရမှာ။ ကျနော်တို့ တိုက်ပွဲနဲ့ပတ်သက်ပြီး ဘာမှ မကြားခဲ့ရဘူး” ဟု သျှမ်းသံတော်ဆင့်ကိုပြောသည်။

ယမန်နေ့ တွင် လက်နက်ကြီးသံ ၊သေနတ်သံမကြားရကြောင်း၊ မိုင်းနောင်မြို့အနီးနားတွင် RCSS/SSAနှင့် SSPP/SSA တို့ တိုက်ပွဲဖြစ်ပွားထားသည့်နေရာဖြစ်သဖြင့် စစ်တပ်အင်အားများအမြဲဖြန့်ထားကြောင်းမိုင်းနောင် ဒေသခံတစ်ဦးက ဆိုသည်။

ယမန်နေ့ South Shan Youth Group PDF တပ်ဖွဲ့ နှင့် စစ်ကောင်စီ တိုက်ပွဲဖြစ်ခဲ့ခြင်း၊ စစ်ကောင်စီ ခြုံခိုတိုက်ခိုက်ခံ ရခြင်း ကိစ္စကို မိုင်းနောင်ဒေသခံများက မသိရှိရပေ။

ထို့အပြင် SSYG-PDF စာမျက်နှာတွင်လည်း စစ်ကောင်စီ ခြုံခိုတိုက်ခိုက်ခံရပြီ ကားတစ်စီ ပျက်စီးဆုံးရှုံးခဲ့သည့် ဓာတ်ပုံ၊ ဗွီဒီယိုဖိုင် တစုံတရာကိုလည်း တင်ပြနိုင်ခြင်းမရှိသည်အတွက် အဆိုပါ သတင်းမှန်ကန်မှု ရှိ၊ မရှိကို သေချာမသိရှိကြပေ။

သို့သော် SSYG-PDF တပ်ဖွဲ့သည် သျှမ်းပြည်တောင်ပိုင်း အတွင်းရှိ PDF (၈)ဖွဲ့ မှ ပူးပေါင်းဖွဲ့စည်း ထားသည့် အဖွဲ့ဖြစ်သည် ဟု ဇူလိုင် (၃)ရက်တွင် ထုတ်ပြန်ချက်တွေ့ရသည်။

ထို SSYG-PDF တပ်ဖွဲ့ကို မည်သည့် သူဦးဆောင်တည်ထောင်ခြင်း၊ မည်သည့်လူငယ်များပါဝင်ခြင်းကို သေချာမသိရှိရကြောင်းလည်း သျှမ်းပြည်သူများက ပြောဆိုလိုက်သည်။

“ SSYG=PDF က ဘယ်သူတွေ တည်ထောင်လည်းဆိုတာကိုတော့ သေချာမသိဘူး။ သျှမ်းတောင်ဘက်မှာလည်း လက်နက်ကိုင်တွေ များတယ်။ ပြည်သူစစ်ရော တိုင်းရင်းသားလက်နက်ကိုင်ရော၊ စစ်ကောင်စီရောရှိတော့ ဘယ်သူက ဘယ်သူမှန်းမသိဘူး” ဟု မိုင်းနောင် ဒေသခံ အသက် ၃၀ကျော် လူငယ်အမျိုးသား တစ်ဦး က သျှမ်းသံတော်ဆင့်ကိုပြောသည်။

SSYG-PDF တပ်ဖွဲ့ကို တချို့ က သျှမ်းပြည်ပြန်လည်ထူးထောင်ရေးကောင်စီ (RCSS/SSA) ၊ တချို့ က သျှမ်းပြည်တိုးတက်ရေးပါတီ (SSPP/SSA) နှင့် တချို့က ပြည်သူ့စစ်များဖွဲ့စည်းထားသည့် အဖွဲ့ဟု ထင်ရောင်ထင်မှားနေကြသည်။

ဆက်လက်ပြီး သျှမ်းတောင်ပိုင်းရှိ ပြည်သူ့ကာကွယ်ရေးတပ်ဖွဲ့ South Shan Youth Groups PDF အဖွဲ့သည် အဆိုပါ တိုက်ပွဲဖြစ်ပွားသည့် ကိစ္စနှင့် ပက် သက်ပြီး PDF တို့ဘက်မှ ယနေ့ ဇူလိုင်လ ၁၆ ရက်နေ့ နေ့လည် ၁ နာရီကျော်တွင် ယနေ့မှစတင်ပြီး ၈ ဖွဲ့သဘောထားအားလုံးကို ဖျက်သိမ်းလိုက်ကြောင်း ကြေညာချက် ထုတ်ထားသည်။

စစ်တပ်မှ နိုင်ငံတော်အာဏာသိမ်းပြီးနောက် ပြည်သူတို့ဖက်မှ သက်ဆိုင်ရာ နယ်မြေနိမိတ်အတွင်း ပြည်သူ့ကာကွယ်ရေး တပ်ဖွဲ့များ ဖွဲ့စည်းကြပြီး နီးစပ်ရာ အဖွဲ့အစည်းများက မဟာမိတ်အဖြစ်ပူးပေါင်း တည်ထောင်ပြီးကြောင်း ကြေညာထုတ်ပြန်ချက်များကို လူမှုကွန်ယက်စာမျက်နှာမှ တွေ့ရသည်။

Leave a Comments