သျှမ်းပြည်တောင်ပိုင်း တောင်ကြီးမြို့နှင့် အေးသာယာမြို့ အနီးပတ်ဝန်းကျင်ရှိ ကျောင်းသားလူငယ်များနှင့် ပရဟိတလုပ်ငန်းများ လုပ်ဆောင်သည့် လူငယ်များကို PDF များဟု ပြောဆို စွပ်စွဲကာ စစ်ကောင်စီများက လိုက်လံ ဖမ်းဆီးမှုများပြုလုပ်နေကြောင်း စုံစမ်းသိရသည်။
ဇူလိုင်လ အတွင်းတွင် သျှမ်းပြည်တောင်ပိုင်း တောင်ကြီးမြို့နှင့် အေးသာယာမြို့ အနီးပတ်ဝန်းကျင်ရှိ လူငယ် များ အယောက် ၂၀ နီးပါး ကို စစ်တပ်မှ နိုင်ငံတော်အာဏာသိမ်းမှုကို တော်လှန်ဆင့်ကျင်နေသည့် လူငယ်များဖြစ်ကြသည် ဟု စစ်ကောင်စီက စွပ်စွဲကာ အကြမ်းဖက် ဖမ်းဆီးမှုများပြုလုပ်ခဲ့ကြောင်းသိရသည်။
အဆိုပါ လူငယ်များသည် ကျောင်းသားများနှင့် ပရဟိတ လုပ်ငန်းများကို လုပ်ဆောင်နေသည့် သူများသာ ဖြစ်ကြပြီး ၎င်းတို့ကို စစ်ကောင်စီတပ်သားများ လာရောက်ဖမ်းဆီးချိန်တွင် မည်သည့် လက်နက်များမှမတွေ့ရှိသော်လည်း မတရားစွပ်စွဲကာ ဖမ်းဆီးခေါ်ဆောင်သွားကြောင်း တောင်ကြီးမြို့ ပြည်သူ့ကာကွယ်ရေးတပ်ဖွဲ့ မှ အဖွဲ့ဝင် တစ်ဦး ကပြောသည်။
“စစ်ကောင်စီတွေက လူတွေကို ဖမ်းချင်တိုင်း ဖမ်းနေကြတာ၊ လူငယ်တွေကိုလည်း PDF လို့ စွပ်စွဲပြီး ဖမ်းခေါ် သွားတာ၊ သူတို့ဖမ်းတုန်းက လူငယ်တွေမှာ ဘာလက်မှပါသွားတာ မဟုတ်ဘူး၊ သူတို့လက်ထဲရောက်မှ လက်နက်နဲ့ မိတယ် ဘာညာဆိုပြီး လုပ်ဇာတ်တွေ ဖန်တီးကြတာ” ဟု တောင်ကြီးမြို့ ပြည်သူ့ ကာကွယ်ရေးတပ်ဖွဲ့မှ အဖွဲ့ဝင်တစ်ဦးက သျှမ်းသံတော်ဆင့်ကို ပြောသည်။
စစ်ကောင်စီမှ လူငယ်များကို ဖမ်းဆီးခေါ်ဆောင်သွားသည့် အချိန်တွင် လက်နက်ခဲယမ်းများနှင့် တွေ့ရှိပြီး ဖမ်းခေါ်သွားခြင်း မဟုတ်သော်လည်း ၎င်းတို့လက်ထဲ ရောက်သွားသည့်လူငယ်များကို လက်နက်များနှင့် ဖမ်းမိကြောင်း မဟုတ်မမှန်သည့် စွပ်စွဲချက်များဖြင့် ပုဒ်မများကို တပ်ကာ အရေးယူ ထောင်ချခြင်းများ ပြုလုပ်နေကြောင်းလည်း အထက်ပါပုဂ္ဂိုလ်က ပြောသည်။
“အာဏာသိမ်းတဲ့ ၅ လကျော် ကာလအတွင်းမှာ ဒီတိုင်းလမ်းသွားနေတဲ့ ပြည်သူတွေ လူငယ်တွေကို ဖမ်းပြီး ကြိုက် သလို ပုဒ်မတပ်နေတာလေ၊ ပြီးတော့ လက်နက်တွေနဲ့ ဖမ်းမိတာလည်း မဟုတ်ပါနဲ့ တခြားသူတို့ လက်နက်နဲ့ ပြပြီး လက်နက်တွေနဲ့ဖမ်းမိထားပါတယ်တဲ့ ၊သတင်းတွေကိုလည်း ကြိုက်သလို လွင့်နေတာ ဆိုတော့ သူတို့ပြော စကားကိုတော့ ဘာမှယုံလို့မရဘူး” ဟု ၎င်းက ပြောသည်။
အဆိုပါ စစ်ကောင်စီ အတင်းအဓမ္မဖမ်းဆီးခေါ်ဆောင်သွားပြီး မတရားပုဒ်မ တပ်ကာ စွပ်စွဲထောင်ချသည့် လူငယ်များတွင် ပရဟိတ သမားများလည်း ပါဝင်နေကြောင်း နှင့် ပက်သက်ပြီး တောင်ကြီးမြို့နယ် အတွင်း လုပ်ဆောင်နေသည့် ပရဟိတ သမားဖြစ်သူ ကိုအောင်နွေဦး (နာမည်လွှဲ) က သျှမ်းသံတော်ဆင့်ကို ယခုလို ပြောပြထား သည်။
“မနေ့ညက စစ်ကောင်စီ လက်အောက်ခံ ကျန်းမာရေးဝန်ကြီးဌာနက စေတနာ့ဝန်ထမ်းတွေ လာပြီးလုပ်အား ပေးကြပါ ဆိုပြီးတော့မှ အရှက်မရှိ ကြေညာရဲသေးတယ်။ ကျနော်တို့ စေတနာ့ဝန်ထမ်းတွေ လူငယ် တွေက ကိုယ်တတ်နိုင်တဲ့ဘက်ကနေ ကူညီနေပေးနေချိန်ကျတော့ ကျန်းမာရေးဝန်ထမ်းပါမချန် သူတို့စစ် ကောင်စီက ဖမ်းဆီးနှိပ်စက်တယ်၊ ရိုက်နက်တယ်ဆိုတော့ သူတို့အတွက် ဘယ်သူက လုပ်ပေးချင် တော့မှာလဲ” ဟု ကိုအောင်နွေဦးက ပြောသည်။
စစ်ကောင်စီ လက်ထက်တွင် တောင်ကြီးမြို့ အရပ်သား(၂၀၀) နီးပါး ကို စစ်အာဏာရှင်ဆန့်ကျင်ရေး လှုပ်ရှားမှုကြောင့် ဖမ်းဆီးခံရကြောင်း သိရသည်။
Leave a Comments