သျှမ်းပြည် တောင်ပိုင်း ခိုလမ်ဆေးရုံတွင် ကိုဗစ် – ၁၉ ကို စစ်ဆေးပေးသည် Test Kit ကုန်သွားနေသဖြင့် ရောဂါကို စစ်ဆေးပေးမှုများ မပြုလုပ်နိုင်သည့်အတွက် တာကော်ဘက်သွားမည့်ကားသမား စောင့်ဆိုင်းနေရကြောင်း စုံစမ်းသိရသည်။

ဇူလိုင်လ (၁၂) ရက်တွင် တာကော်တံတားကိုဖြတ်ပြီး သျှမ်းပြည် အရှေ့ပိုင်းသို့ သွားမည့် ကားသမားများ ခိုလမ်ဆေးရုံမှ ကိုဗစ် – ၁၉ ဆေးစစ်ချက် ယူရန် ညွှန်ကြားထားသော်လည်း ခိုလမ်ဆေးရုံတွင် Test Kit ကုန်နေသဖြင့် စစ်မပေးနိုင်ကြောင်း သိရသည်။

“တာကော်ဂိတ်မှာ ကားသမားတွေကို ခိုလမ်မြို့က ကိုဗစ် -၁၉ ဆေးစစ်ချက်ပါမှ ဖြတ်သန်းခွင့်ပေးတယ်၊ ဒါပေမယ့် ခိုလမ်ဆေးရုံမှာလည်း စစ်ပေးတဲ့ Test Kit ကမနေ့ကတည်းက ကုန်နေပြီ၊ ကာကွယ်ဆေးထိုး ပြီးတဲ့ လက်မှတ်ပါရင်လည်း ဖြတ်သန်းခွင့်မရဘူး” ဟု ခိုလမ်မြို့နေ အမျိုးသားတစ်ဦး က သျှမ်းသံတော်ဆင့် ကို ပြောသည်။

သျှမ်းပြည်တောင်ပိုင်းမှ တာကော်ဂိတ်ကို ဖြတ်ပြီး သျှမ်းပြည်အရှေ့ပိုင်းသို့ သွားမည့် ယာဉ်များ ကိုဗစ် – ၁၉ ကူးစက်ရောဂါ ကာကွယ်ဆေးထိုးထားသူများအပါအဝင် အားလုံး RDT test kit စစ်ဆေးပြီးမှ ဖြတ်သန်းခွင့်ပြုမည်ဟု စစ်ကောင်စီ၏ အုပ်ချုပ်ရေးအဖွဲ့က ညွှန်ကြားထားသည်။

သို့သော် တာကော်တံတားတွင် ကိုဗစ် -၁၉ စစ်ဆေးပေးရန် test kit မရှိကြောင်းသိရသည်။

“စစ်ကောင်စီက တာကော်ကိုဖြတ်ပြီး သျှမ်းအရှေ့ကို လာမယ်ဆိုရင် RDT Test Kit နဲ့ စစ်ပြီးမှ သွားခွင့် ပြုဖို့ ညွှန်ကြားထားပေမယ့် တာကော်စစ်ဆေးရေးဂိတ်မှာ Test Kit က မရှိလို့ ခိုလမ်ဆေးရုံကို လာစစ် ခိုင်းတာ၊ ဒါပေမယ့် ခိုလမ်ဆေးရုံမှလည်း test kit မလုံလောက်ဘူး၊ ကုန်သွားပါပြီ” ဟု ခိုလမ်မြို့နေ ပြည်သူတစ်ဦးက သျှမ်းသံတော်ဆင့်ကို ပြောသည်။

လက်ရှိတွင် ခိုလမ်မြို့နယ် အတွင်း ကိုဗစ် -၁၉ ပိုးတွေ့ အတည်ပြုလူနာ စုစုပေါင်း ၂၈ ယောက်ရှိနေပြီး ၉ ယောက်သည် ကားမောင်းသမားများနှင့် ယာဉ်နောက်လိုက် များဖြစ်ကြကြောင်း သိရသည်။