သျှမ်းပြည်မြောက်ပိုင်း ကျောက်မဲမြို့နယ် ကျွဲကုန်းကျေးရွာ ဘုန်းကြီးကျောင်းအနီးတွင် ယမန်နေ့ (ဇူလိုင် ၈)ရက် ညနေ (၆)နာရီဝန်းကျင်တွင် အကြောင်းရင်းမသိ သေဆုံးနေသည့်အလောင်းတစ်လောင်း တွေ့ရှိခဲ့ကြောင်း သိရသည်။
ဖြစ်စဉ်မှာ ကျောက်မဲမြို့နယ် ကျွဲကုန်းဘုန်းကြီးကျာင်း အနီးတွင် အလောင်းတစ်လုံးကို တွေ့ရှိနေကြောင်း ရွာသူရွာသားများက နမ့်ခုံးရှမ်းများပရဟိတအသင်းကို အကြောင်းကြားလာပြီးနောက် သွားရောက် သယ်ဆောင်ပေးခဲ့ကြောင်း အသင်းရဲ့ ဥက္ကဌဖြစ်သူ ဦးစိုင်းသိန်းငွေက သျှမ်းသံတော်ဆင့်ကို ပြောသည်။
“ရွာခံတွေကဖုန်းဆက်လာလို့ ကျနော်တို့ အသင်းက သွားသယ်ပေးခဲ့ရပါတယ်၊ သူ့ Dead body မှာတော့ ဒဏ်ရာ ဒဏ်ရာတွေတော့ မတွေ့ရလို့ သူဘာကြောင့် သေသွားရတယ်ဆိုတာလည်း မသိရပါဘူး၊ ရွာသား တွေ ပြောကြားချက်အရတော့ အရက်မူးပြီး အမြဲသွားသွား လာလာလုပ်နေတတ်တယ်တဲ့ဆွေမျိုးလည်း မရှိဘူးလို့ ပြောတယ်” ဟု ဦးစိုင်းသိန်းငွေက သျှမ်းသံတော်ဆင့်ကို ပြောသည်။
သေဆုံးသူသည် အသက် ၅၀ ကျော် ၆၀ ဝန်းကျင်ရှိသည့် အမျိုးသားတစ်ဦးဖြစ်ပြီး အလောင်းကို နမ့်ခုံး ရှမ်းများ ပရဟိတအသင်းက အေးချမ်းသာ သုဿန်သို့ ပို့ဆောင် မီးသဂြိုလ်ပေးခဲ့ကြောင်း သိရသည်။
သျှမ်းပြည် မြောက်ပိုင်း ကျောက်မဲမြို့နယ် အတွင်းမှာ ယခုလို အကြောင်းမသိ သေဆုံးနေသည့် အလောင်းများကို မကြာခဏ တွေ့ရှိနေရကြောင်းလည်း သိရသည်။
Leave a Comments