သျှမ်းပြည်မြောက်ပိုင်း မူဆယ်- တရုတ်နယ်စပ်ဂိတ်များဖြစ်သည့် ဝမ်တိန်စီရင်စု (ကျင်ဆန်ကျော့ နှင့် ပန်ဆိုင်း)ဂိတ်များကို ကိုဗစ်-၁၉ ကူးစက်ရောဂါကြောင့် ယနေ့ (ဇူလိုင် ၈)ရက်မှ စတင်ပြီး ပိတ်လိုက်ကြောင်း စုံစမ်းသိရသည်။

“ ဒီနေ့က ပိတ်လိုက်တာပါ။ ၂ ဂိတ်လုံးကိုပိတ်လိုက်တယ်။ ကိုဗစ် ၁၉ ရောဂါပြန့်ပွားလာလို့ပိတ်လိုက်တာပါ။ ရက်အကန့်သတ်ပိတ်လိုက်တာပါ” ဟု မူဆယ်သစ်သီးပွဲရုံး ဥက္ကဌ စိုင်းခင်မောင် က သျှမ်းသံတော်ဆင့်ကို ပြောသည်။

မြန်မာ-တရုတ်နယ်စပ်ကုန်သွယ်ရေးဂိတ်များကို ပိတ်လိုက်သဖြင့် မူဆယ်မြို့ (၁၀၅)မိုင်နယ်စပ်ကုန်သွယ်ရေးဇုန်တွင် ကားများပိတ်မိနေကြောင်း၊ မည်သည့်အချိန်မှ ပြန်လည် ဖွင့်လှစ်မည်ကို မသိရှိကြောင်းလည်း ကားသမားများက ပြောသည်။

“ ကုန်ကားတွေကတော့ အများကြီး ပိတ်မိနေတယ်။ တရုတ်ဘက်က ပိတ်မယ်ဆိုတာ မသိတော့ အခု ကားတွေ လမ်းတလျောက်အပြည့်ပဲ”လို့ တရုတ်ပြည် သို့ ဝင်ရန်စောင့်ဆိုင်းနေသည့် ကားသမားတစ်ဦးက ပြောသည်။

ယခုရက်ပိုင်း မြန်မာ-တရုတ်နယ်စပ် မူဆယ်မြို့တွင်ကိုဗစ်-၁၉ ကူးစက်မှုနှုန်းများလာသကဲ့သို့တရုတ်နိုင်ငံ ကျယ်ဂေါင်မြို့တွင်လည်း ကိုဗစ်-၁၉ ပိုးတွေ့မှုများလာကာ လော့ဒေါင်း ပြန်လုပ်နေရသည့် သဘောရှိကြောင်း သိရသည်။

မူဆယ်မြို့တွင်းလည်း ကိုဗစ်-၁၉ ကူးစက်မှုနှုန်းများလာသဖြင့်အတွက် တချို့ရပ်ကွက် ဝင်၊ထွက်သွားလာခွင့် လော့ဒေါင်းချထားရသည့်အဆင့်ရှိကြောင်းလည်း စုံစမ်းသိရသည်။

“ မူဆယ်တောင် အခု ကိုဗစ် ကူးစက်ခံရသူတွေက အရမ်းများလာတယ်။ ဆေးရုံတောင်နေရာမဆံ့တော့ဘူး။ တရုတ်ပြည်လည်း ပြန်ဖြစ်တော့ တရုတ်က ကုန်ကားဝင်ထွက်ခွင့်ခဏပိတ်လိုက်တဲ့သဘောပါ။ ဘယ်ချိန်ပြန်ဖွင့်မလဲမသိဘူး” ဟု မူဆယ်မြို့တောင်ရပ်ကွက်နေ အမျိုးသားတစ်ဦးက ပြောသည်။

ဖေဖော်ဝါရီ ၁ ရက်နေ့ စစ်အာဏာသိမ်းပြီးနောက်ပိုင်း ဇွန်လမှ စတင်ပြီး မြန်မာနိုင်ငံအတွင်းတွင် ကိုဗစ် ၁၉ ရောဂါ တစ်ဖန်ပြန့်ပွားခဲ့သည်။

မြန်မာနိုင်ငံတွင် အာဏာသိမ်းပြီးနောက်ပိုင်း စီးပွားရေး အဘက်ဘက်မှ ကျဆင်းလာပြီး လက်ရှိတွင် ကိုဗစ် ၁၉ ရောဂါကြောင့်လည်း ထက်မံကျဆင်းလာနိုင်ကြောင်း မူဆယ်ကုန်သည်များက ပြောဆိုလိုက်သည်။