သျှမ်းပြည်မြောက်ပိုင်း သီပေါမြို့နယ် တိုင်းရင်းသားလက်နက်ကိုင်အချင်းချင်းတိုက်ပွဲကြောင့် ပြည်သူများ ၂ လကျော် ထွက်ပြေးတိမ်းရှောင်နေရပြီး ယနေ့ချိန်ထိ နေရပ်မပြန်နိုင်သေးကြောင်း စုံစမ်းသိရသည်။

လက်ရှိတွင် သီပေါမြို့နယ်တွင် စစ်ဘေးရှောင်း ၃၀၀ ကျော်ရှိနေပြီး ၎င်းတို့မှ ခိုင်မွန်ကျေးရွာဒေသခံ နှင့် ချောင်ဆုံးဒေသခံများဖြစ်ပြီး၊ ထိုဒေသအတွင်း တိုင်းရင်းသားလက်နက်ကိုင်များ နေထိုင်သဖြင့် နေရပ်ပြန်ရန် ကြောက်နေသေးကြောင်း စစ်ရှောင်များက ပြောသည်။

စစ်ဘေးရှောင်နေသည့် ပြည်သူများသည် နေရပ်ကိုပြန်ချင်သော်လည်း တိုက်ပွဲများထပ်မံ ဖြစ်မည်ကို စိုးရိမ်သောကြောင့် မပြန်ရဲသေးကြောင်း စစ်ရှောင် အမျိုးသား တစ်ဦး ကပြောသည်။

“ ပြန်တော့ပြန်ချင်တာပေါ့။ ဒါမဲ့ စစ်ထပ်ဖြစ်မှာလည်းစိုးရိမ်ရတယ်။ ရွာထဲမှာ လက်နက်ကိုင် တပ်ဖွဲ့က ရှိနေသေးတယ်လေ။ ဒါကြောင့် မပြန်ရဲသေးဘူး” ဟု ၎င်း ကဆိုသည်။

စစ်ဘေးရှောင်လာသည့်သူများထဲတွင် ကိုယ်ဝန်ဆောင်မိခင်များနှင့် သက်ကြီးရွယ်အိုများရှိသဖြင့် နေရပ်ပြန်သွားပါက တိုက်ပွဲထပ်မံဖြစ်ပွားလျှင် အခက်အခဲများရှိနိုင်ကြောင်းလည်း စစ်ဘေးရှောင် ပြည်သူများက ပြောသည်။

အဆိုပါ စစ်ဘေးရှောင်များသည် မန်လီကျေးရွာနှင့် ဟာလျံကျေးရွာများတွင် သွားရောက်ခိုလုံနေထိုင်နေရကြောင်း သိရသည်။

“ အခုတော့ ၃၀၀ ကျော်ကျန်နေသေးတယ်။ နေရပ်ကိုမပြန်နိုင်သေးကြဘူး။ သူတို့စားဝတ်နေရေးအတွက်‌တော့ ကျမတို့ဟိုနေ့က ထွက်သွားလှူဒါန်းပေးတယ်။” ဟု စစ်ရှောင်ကူညီပေးနေသည့် အမျိုးသမီးတစ်ဦးက သျှမ်းသံတော်ဆင့်ကိုပြောသည်။

တိုက်ပွဲကြောင့် ပြည်သူများ နေရပ်ပြန်ကာ လယ်ယာမလုပ်နိုင်သဖြင့် နောင်နှစ်အတွက် စားဝတ်နေရေးခက်ခဲလာ နိုင်ကြောင်း လည်း သိရသည်။

“ တိုက်ပွဲဖြစ်ထားတော့ ကျနော်တို့သွားလုပ်ရင် ဗုံးတွေ၊ မိုင်းတွေနင်းမိမှာကြောက်ရတယ်” ဟု အထက်ပါ စစ်ဘေးရှောင် ကပြောသည်။

သီပေါမြို့နယ်တွင် သျှမ်းပြည်ပြန်လည်ထူထောင်ရေးကောင်စီ (RCSS/SSA) နှင့် သျှမ်းပြည်တိုးတက်ရေး ပါတီ (SSPP/SSA) တို့ လှုပ်ရှားသည့်နေရာဖြစပြီး ယခုရက်ပိုင်း တိုက်ပွဲများ မရှိသော်လည်း စစ်ရေးတင်းမာနေသေးကြောင်း သိရသည်။