သျှမ်းပြည်မြောက်ပိုင်း ကျောက်မဲမြို့နယ် တော့ဆန်ကျေးရွာအုပ်စုအတွင်းရှိ လက်ဖက်ခြံနှင့် လမ်းမကြီးလမ်းဘေးတွင် ဝါးဖြင့်ပြုလုပ်ထားသည့် ဆူးထောင်ချောက်များတွေ့ရှိရကြောင်း စုံစမ်းသိရှိရသည်။
ကျောက်မဲမြို့နယ် တော့ဆန်ကျေးရွာဘက်တွင် RCSS နှင့် TNLA ၊ SSPP တို့ ပူပေါင်းတပ်တို့ တိုက်ပွဲဖြစ်ပွားခဲ့ပြီး နေရာဖြစ်ပြီး၊ လက်ရှိ ဝါးဖြင့် ပြုလုပ်ထားသည့် ဆူးထောင်ချောက်တွေ့ရှိသည့်နေရာသည် RCSS တပ်စခန်းအနီးဖြစ်ကြောင်း သိရသည်။
“ ဟုတ်ပါတယ်။ အဲဒါလာထောင်ထားတယ်လို့ကြားတယ်။ ဘယ်နေ့ကစထောင်ထားတာလည်းတော့ မသိဘူး။ ရွာကနေ ပြန်လာတဲ့သူတွေကတော့ ဆူးထောင်ချောက်တွေ့တယ်ဆိုတဲ့အကြောင်းလာပြောပြတယ်” ဟု ကျောက်မဲမြို့ စစ်ဘေးရှောင်လာသည့် တော့ဆန်ကျေးရွာမှ အမျိုးသားတစ်ဦးက သျှမ်းသံတော်ဆင့်ကို ပြောသည်။
ထို ဆူထောင်ချောက်များကို လမ်းမကြီးများနှင့် လက်ဖက်ခြံသွားသည့်လမ်းပေါ်တွင် ထောင်ထားကြောင်း သိရသည်။
ဆူထောက်ချောက်ကိစ္စနှင့်ပတ်သတ်ပြီး RCSS ပြောခွင့်ရ ဗိုလ်မှူး စိုင်းခမ်းစံက “ တပ်စခန်းအနီးပတ်ဝန်းကျင်ဆိုရင်တော့ ရှိပါတယ်။ စစ်ရေးသဘောအရရှိပါတယ်။ လမ်းမကြီးတို့ လမ်းဘေးမှာတို့ဆိုတာတော့ မရှိပါဘူး။ မလုပ်ပါဘူး” ဟု သျှမ်းသံတော်ဆင့် ကို ပြောသည်။
လက်ရှိတွင်ကျောက်မဲမြို့ တောဆန်ကျေးရွာအုပ်စုဘက်တွင် ယနေ့ (ဇူလိုင် ၆ ) ရက်တွင် တိုက်ပွဲ ပြန်လည်း ဖြစ်ပွားခဲ့ကြောင်းသိရသည်။
“ တိုက်ပွဲက ဖြစ်နေတယ်။ အခုတိုက်နေကြတာ။ သေနတ်ပစ်တဲ့ အသံတွေကြားနေရတယ်။ နဲနဲတော့ကြာပြီး ကျနော်တို့လဲ အချိန်တိကျမသိရဘူး။” ဟု တော့ဆန်ကျေးရွာမှ စစ်ရှောင်တစ်ဦးက ဆိုသည်။
ကျောက်မဲမြို့ တော့ဆန်ကျေးရွာဘက်တွင် ဇူလိုင်လ ၁ ရက်နေ့မှစကာ ယနေ့ချိန်ထိ ထိတွေ့မှုရှိခဲ့ပြီး စစ်ဘေးရှောင် (၈၀၀)ကျော်ရှိကြောင်းသိရသည်။
“ တိုက်ပွဲသေးသေးလေးတွေ ဖြစ်တာတော့ရှိတယ်။ ဒီနေ့တိုက်ပွဲအတွက်တော့ကျနော်လဲ အသေးစိတ်မသိရသေးဘူး။ သွားရင်နဲ့ ထိတွေ့မိလို့ တိုက်ပွဲဖြစ်နိုင်တာလဲရှိတယ်” ဟု RCSS ပြောခွင့်ရ ဗိုလ်မှူးစိုင်းခမ်းစံက ပြောသည်။
တော့ဆန်ကျေးရွာအုပ်စုတွင် တိုင်းရင်းသားလက်နက်ကိုင်အချင်းချင်းတိုက်ပွဲဖြစ်ပွားမှုကြောင့် ပြည်သူ (၈၀၀) ကျော် မိုင်းငေါ့ဘက်သို့ ထွက်ပြေးတိမ်းရှောင်ခဲ့ရပြီး ထိုထဲတွင် ကိုယ်ဝန်ဆောင်မိခင် (၈) ဦးပါရှိနေကြောင်း သိရသည်။
