သျှမ်းပြည်မြောက်ပိုင်း ကျောက်မဲမြို့နယ်တွင် ဈေးများရက်အကန့်အသတ်မရှိပိတ်ရန်၊ စားသောက်ဆိုင် များ ပါဆယ်စနစ်ဖြင့်သာ ရောင်းချရန်ညွှန်ကြားထားသော်လည်း စာသင်ကျောင်းများ မပိတ်ကြောင်း သိရသည်။
ကျောက်မဲမြို့ပေါ်ရှိ ဗဟိုဈေးကြီးနှင့် ဈေးသစ်(ဈေးလေး) အပါအဝင် ညဈေးတန်းများကို ဇူလိုင်လ (၃) ရက်နေ့မှစ၍ ရက်အကန့်အသတ်မရှိ ပိတ်ထားရန်နှင့် လက်ဖက်ရည်ဆိုင်၊ စားသောက်ဆိုင်များကိုလည်း ဆိုင်ထိုင်ရောင်းချခွင့်မပြုတော့ဘဲ ပါဆယ်စနစ်ဖြင့်သာ ရောင်းချပေးရန် စည်ပင်သာယာရေးဌာနက ဇူလိုင်လ (၁) ရက်နေ့မှာ ကြေညာချက်ထုတ်ပြန်ထားသည်။
သို့သော် စာသင်ကျောင်းများကို ပိတ်မည် မဟုတ်ကြောင်းလည်း စုံစမ်းသိရသည်။
လက်ရှိတွင် ကျောက်မဲမြို့နယ်အတွင်း၌ ကိုဗစ်-၁၉ ကူးစက်ရောဂါ တတိယလှိုင်း အတည်ပြုလူနာ ( ၆၃) ဦးရှိပြီး ဇွန်လ ၁ ရက်နေ့မှ စတင်ဖွင့်လှစ်ခဲ့သည့် စာသင်ကြောင်းများကိုမူ ပိတ်မည်မကြားရကြောင်းပရဟိတ လုပ်နေသူ တစ်ဦးက သျှမ်းသံတော်ဆင့်ကို ပြောသည်။
“အခုက ဗဟိုဈေးကြီး နဲ့ ဈေးသစ်၊ ညဈေးတန်တွေကို ယာယီပိတ်ထားဖို့ စည်ပင်ဌာနကနေ ညွှန်ကြား ချက် ထုတ်ထားတယ်၊ အခွန်လွတ်ဈေးကိုတော့ ကိုဗစ် – ၁၉ စည်းကမ်းသတ်မှတ်ချက်နဲ့ အညီ ဖွင့်ပေး မယ်တဲ့၊ စာသင်ကျောင်းတွေကိုလည်း ပုံမှန် အတိုင်းဖွင့်ထားပါတယ်” ဟုပရဟိတ လုပ်နေသူ တစ်ဦးက ပြောသည်။
ကျောက်မဲမြို့ပေါ်တွင် ကိုဗစ် အတည်ပြုလူနာ ၂၉ ဦးနှင့် နောင်ပိန်ကျေးရွာမှ ၃၄ ဦး ရှိနေသာကြောင့် ကျောက်မဲမြို့နယ်အတွင်းတွင် စုစုပေါင်းကိုဗစ် လူနာ ၆၃ ဦးရှိနေပြီး ကျောက်မဲမြို့ ပရဟိတ နှင့် လူမှု ကူညီရေးအသင်းများအတွက် PPE ဝတ်စုံများ အခက်အခဲရှိနေကြောင်း သိရသည်။
