သျှမ်းပြည်မြောက်ပိုင်း ကျောက်မဲမြို့နယ် တော့ဆန်ဘက်တွင် တိုင်းရင်းသားလက်နက်ကိုင်အချင်းချင်း တိုက်ပွဲကြောင့် စစ်ရှောင် (၈၀၀) ကျော် စားနပ်ရိက္ခာ အရေးပေါ်လိုအပ်ကြောင်း စုံစမ်းသိရှိရသည်။
ဇူလိုင် (၁) ရက်နေ့ မှစတင်ပြီး ကျောက်မဲမြို့နယ် တော့ဆန်ကျေးရွာအုပ်စု အတွင်း RCSS/SSA နှင့် SSPP/SSA ၊TNLA ပူးပေါင်းတို့တိုက်ပွဲဖြစ်ပွားကာ ဒေသခံများ မိုင်းငေါ့မြို့နယ်ခွဲသို့ ဒေသခံ (၈၀၀) ကျော် ထွက်ပြေးတိမ်းရှောင်ခဲ့ကြောင်း သိရသည်။
“ဒီနေ့မနက် ထပ်ပြေးလာတဲ့သူတွေလည်း ရှိသေးတယ်။ စာရင်းက မတိကျသေးဘူး။ လက်ရှိတော့ ဒေသခံတွေကပဲ ကျွေးမွေးထားတယ်။ အစားအသောက်ပိုင်းတွေ အဝတ်အစားတွေ ဆေးဝါးတွေ လိုအပ်တယ်။ တချို့ ဘာမှ မရလာဘူး” ဟု အသက် (၄၀) ဝန်းကျင် စစ်ဘေးရှောင်သူများကို ကူညီပေးသည့် အမျိုးသား တစ်ဦး ကပြောသည်။
အဆိုပါ စစ်ရှောင်များသည် မိုင်းငေါ့မြို့နယ်ခွဲရှိ မန်ပင့်ဘုန်းကြီးကျောင်း၊ ကွန်ကောက်ကျေးရွာ၊ ရွာမနမ့်ဆုန် ဘုန်းကြီးကျောင်း နှင့် ဆွေမျိုးအိမ်များ တစ်ချို့ စစ်ရှောင်များ လာရောက်ခိုလှုံနေကြကြောင်း စုံစမ်းသိရှိရသည်။
“တိုက်ပွဲဖြစ်လာတာက ကြာပြီ။ ဇွန် (၃၀) နဲ့ ဇူလိုင် (၁) ရက်နေ့က တိုက်ပွဲပြင်းထန်လာလို့ ဒေသခံတွေ မနေရဲလို့ ထွက်ပြေးလာကြတာ။ တော့ဆန် နဲ့ မိုင်းငေါ့ ထိ လမ်းလျှောက်လာတယ်။ ဆိုင်ကယ်နဲ့ဆိုရင် (၄၅) မိနစ်လောက်ရှိမယ်။ လမ်းလျှောက်ရင် ၂ နာရီကနေ ၃ နာရီထိ ရှိမယ်” ဟု တော့ဆန်ဒေသခံ တစ်ဦး ကပြောသည်။
မြောက်ပိုင်းမဟာမိတ်တပ်ဖွဲ့ဖြစ်သည့် TNLA ၊ SSPP/SSA နှင့် RCSS/SSA တို့သည် တော့ဆန်ကျေးရွာအုပ်စု အတွင်း မကြာခဏ တိုက်ပွဲဖြစ်ပွားခဲ့ပြီး တော့ဆန်ဒေသခံများ (၆) လကျော်ကြာ ယနေ့ချိန်ထိ နေရပ်သို့ မပြန်နိုင်သေးသည့် စစ်ရှောင်များလည်း ရှိကြောင်း သိရသည်။
စစ်ဘေးရှောင်များကို ကူညီပေးသည့် ပရဟိတအဖွဲ့များလည်း ယခုနှစ်တွင် ကိုဗစ်-၁၉ ရောဂါ နှင့် နိုင်ငံရေး အခြေနေ ရှုပ်ထွေးနေမှုကြောင့် အခက်ခဲဖြစ်နေကြောင်း ကျောက်မဲဒေသခံ များကပြောဆိုကြသည်။
