ငြိမ်းချမ်းရေး လုပ်ငန်းစဉ် ဦးဆောင်အဖွဲ့ (PPST)၏ ယာယီအဖွဲ့ခေါင်းဆောင်တာဝန်ယူထားသည့် (RCSS/SSA) ဥက္ကဋ္ဌ ဗိုလ်ချုပ်ကြီး ယွက်စစ်သည် ခေါင်းဆောင်အဖြစ်မှ ရပ်နားလိုကြောင်း (PPST) ထံ စာတင်ထားသည်ဟု စုံစမ်းသိရှိရသည်။
ဇွန် (၂၉) ရက်နေ့ ရက်စွဲဖြင့် (PPST) အဖွဲ့ဝင်ထံသို့ ငြိမ်းချမ်းရေး လုပ်ငန်းစဉ် ဦးဆောင် အဖွဲ့ (PPST)၏ ယာယီ အဖွဲ့ခေါင်းဆာင် RCSS/SSA ဥက္ကဌ ဗိုလ်ချုပ်ကြီး ယွက်စစ်က သျှမ်းပြည်အရေးကိစ္စနှင့် သျှမ်းလူမျိုးအတွက် ပိုပြီး အချိန်ပေး လုပ်ဆောင်ချင်သဖြင့် လက်ရှိတာဝန်ယူထားသည့် နေရာကို နှုတ်ထွက်ခွင့် တင်ပြထားခြင်း ဖြစ်ကြောင်း PPST အဖွဲ့ဝင် PNLOနာယကကြီး ဗိုလ်မှူးကြီး ခွန်ဥက္ကာ က သျှမ်းသံတော်ဆင့် ကို ပြောသည်။
“စာထဲမှာ ပါတဲ့ အကြောင်းရာကတော့ သျှမ်းပြည်ကိစ္စကို ပိုပြီးတော့ လုပ်ချင်တယ်။ သျှမ်းလူမျိုးကိစ္စကို ပိုပြီးတော့ လုပ်ချင်တာပေါ့။ အဲ့ကြောင့် မအားမလပ်ဖြစ်တာပေါ့။ ဒီအများနဲ့ လုပ်တဲ့ အလုပ်မှာ နည်းနည်းလစ်ဟင်းနိုင်တာ။အဲ့ကြောင့် အဖွဲ့ခေါင်းဆောင်အဖြစ်က အနားယူခွင့်ပေးဖို့ နဲ့ သူ့နေရာမှာ တစ်ခြားလူထည့်မှာပေါ့ အဖွဲ့ခေါင်းဆောင်နေရာမှာ တခြားလူ ပြန်ရွေးဆိုတဲ့သဘောမျိုးပေါ့လေ” PNLO နာယကကြီး ဗိုလ်မှူးကြီး ခွန်ဥက္ကာ က သျှမ်းသံတော်ဆင့် ကိုပြောသည်။
ဗိုလ်ချုပ်ကြီး ယွက်စစ် နှုတ်ထွက်ခွင့်တောင်းထားခြင်းနှင့် ပတ်သက်ပြီး (PPST) အဖွဲ့ဝင်များ ဆွေးနွေးရမည်ဖြစ်ပြီး (PPST) အဖွဲ့ဝင်များ၏ သဘောထားအရ တိုင်းရင်းသားညီလာခံ လုပ်သည့်အထိ စောင့်ဆိုင်းပေးရန် ဗိုလ်ချုပ်ကြီး ယွက်စစ်ကို တောင်းဆိုထားကြောင်းလည်း ဗိုလ်မှူးကြီး ခွန်ဥက္ကာက ပြောသည်။
“အားလုံးသဘောထားပေးတာကတော့ မထွက်နဲ့အုံး ဒီနှစ်ကုန်မှာ တိုင်းရင်းသား ညီလာခံ လုပ်တဲ့အထိ စောင့်ပေးဖို့ တောင်းပန်ထားတယ်” ဟု ဗိုလ်မှူးကြီး ခွန်ဥက္ကာ ကပြောသည်။
PPST စတင်ဖွဲ့စည်းစဉ်တွင် (KNU) ဥက္ကဋ္ဌ ဗိုလ်ချုပ်ကြီး စောမူတူးစေးဖိုး က တာဝန်ယူခဲ့ပြီး ၂၀၁၉ ခုနှစ် မတ်လ မှစပြီး (RCSS/SSA) ဥက္ကဋ္ဌ ဗိုလ်ချုပ်ကြီး ယွက်စစ်က PPST ယာယီအဖွဲ့ခေါင်းဆောင်အဖြစ် တာဝန်ယူခဲ့ကြောင်း သိရသည်။
“သူ တာဝန်ယူတာကလဲ (၂) နှစ်ကျော်ပြီ နောက်ပြီးတော့ တာဝန်ကလည်း အမြဲတမ်း ပုံစံမဟုတ်ဘဲနဲ့ ယာယီအဖွဲ့ခေါင်းဆောင်ဆိုပြီးတော့ သဘောနဲ့ပဲ သွားနေတော့ အရေးကြီးတဲ့ ဆုံးဖြတ်ချက်တွေ ချမှတ်နေရတော့ နည်းနည်းကြပ်တည်း ရှိမှာနဲ့ တူပါတယ်။ အဲ့ဒါကြောင့် နုတ်ထွက်ခွင့်တောင်းတယ်လို့ ယူဆပါတယ်” ဟု ဗိုလ်မှူးကြီး ခွန်ဥက္ကာ ကပြောသည်။
PPST အဖွဲ့သည် တစ်နိုင်ငံလုံး အပစ်ခတ်ရပ်စဲရေး သဘောတူ စာချုပ် (NCA) ထိုးထားသည့် အဖွဲ့ဝင် (၁၀) ဖွဲ့ဖြင့် ဖွဲ့စည်းထားသည်။
PPST အဖွဲ့ဝင်များဖြစ်ကြသော သျှမ်းပြည်ပြန်လည်ထူထောင်ရေးကောင်စီ၊သျှမ်းပြည်တပ်မတော် (RCSS/SSA)၊ ကရင်အမျိုးသား အစည်းအရုံး (KNU) ၊ ကရင်အမျိုးသားအစည်းအရုံး/ကရင် အမျိုးသားလွတ်မြောက်ရေး တပ်မတော် – ငြိမ်းချမ်းရေး ကောင်စီ(KNU/KNLA-PC) ၊ ဒီမိုကရေစီအကျိုးပြု ကရင်တပ်မတော် ( DKBA) ၊ ပအိုဝ်းအမျိုးသား လွတ်မြောက်ရေး အဖွဲ့ချုပ် (PNLO) ၊ ချင်းအမျိုးသား တပ်ဦး (CNF) ၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တပ်ဦး (ABSDF) ၊ ရခိုင်ပြည်နယ် လွတ်မြောက်ရေးပါတီ (ALP) ၊ မွန်ပြည်သစ်ပါတီ ( NMSP) နှင့် လားဟူဒီမိုကရက်တစ် အစည်းအရုံး (LDU) တို့ဖြင့် ဖွဲ့စည်းထားသည်။
