သျှမ်းပြည်တောင်ပိုင်း တောင်ကြီးမြို့ မှ ပင်လုံမြို့သို့ လာရောက်သည့် အမျိုးသမီး ၃ ဦးကို စစ်ကောင်စီမှ လိုက်လံရှာဖွေဖမ်းဆီး နေကြောင်း စုံစမ်းသိရှိရသည်။
တောင်ကြီးမြို့ မှ ပင်လုံမြို့သို့ လာသည့် အမျိုးသမီး (၃)ဦးကို စစ်ကောင်စီ မှ ယမန့်နေ ဇွန် ၂၃ ရက်တွင် ပင်လုံမြို့တွင်းရှိသည့် တည်းခိုခန်းများကို လိုက်လံ စစ်ဆေးနေပြီး၊ ၎င်း (၃)ယောက်ကို ရှာဖွေခဲ့ကြောင်း ပင်လုံမြို့ ဒေသခံတစ်ဦးက သျှမ်းသံတော်ဆင့်ကိုပြောသည်။
“ သူတို့ တည်းခိုးခန်းတွေမှာသွားစစ်ဆေးတယ်။ ကျမတို့သိရတာတော့ သူတို့ လူကိုလာရှာတယ်လို့ပြောတယ်။ တည်ခိုးခန်းမှာလာတည်လားဆိုပြီးတော့မေးတယ်လို့ပြောတယ်။ တည်ခိုးခန်းမှာသွားရှာတာ မတွေ့ဘူး။ သူတို့ပင်လုံတစ်မြို့လုံးပတ်ရှာတယ်” ဟု ပင်လုံမြို့ ဒေသခံတစ်ဦးက သျှမ်းသံတော်ဆင့်ကိုပြောသည်။
အဆိုပါ စစ်ကောင်စီမှ လိုက်လံဖမ်းဆီးနေသူများသည် တောင်ကြီးမှ တက်လာသည့် အမျိုးသမီးများဖြစ်ပြီး ၎င်းတို့ကို ပင်လုံမြို့ အထင်ကရနေရာ နန်းကျင်းပူး စေတီနားတွင် ဖမ်းမိသွားကြောင်း ဒေသခံများက ပြောသည်။
“ သူတို့ကို နန်းကျင်းပူးမှာဖမ်းမိသွားတယ်။ ကားပေါ်တင်သွားပြီးတော့ ခေါ်သွားတယ်။ သူတို့က တောင်ကြီးကနေ တက်လာတဲ့သူတွေဖြစ်တယ်။ ဘာကြောင့်ဖမ်းတာလဲတော့မသိဘူး” ဟု ဒေသခံတစ်ဦးက ပြောသည်။
သို့သော် ဖမ်းဆီးခံရမှုရှိမရှိကို သျှမ်သံတော်ဆင့်အနေဖြင့် သီးသန့်အတည်မပြုနိုင်သေးပေ။
အလားတူ ယနေ့ ဇွန် ၂၄ ရက်နေ့တွင် ပင်လုံမြို့ (၅၁၃) တပ်အတွင်းသို့ အမျိုးသမီးတစ်ဦးကို ခေါ်ဆောင်စစ်ဆေး သွားခဲ့ကြောင်း ဒေသခံများ သတင်းပေးပို့ချက်အရသိရသည်။
