ကချင်ပြည် မံစီမြို့နယ် မန့်ဝိန်းကြီး အတွင်းရှိ မြန်မာ-တရုတ်နယ်စပ်မျဉ်း နယ်ခြားမှတ်တိုင် ၅၃/၁ ၅၃/၂ မြန်မာပိုင်နက် နယ်မြေ ကို တရုတ်မှ ကျူးကျော် ခြံစည်းရိုးလာခတ်သဖြင့် ဒေသခံများနှင့် အငြင်းပွားမှု ဖြစ်နေကြောင်းစုံစမ်းသိရသည်။
အဆိုပါ နေရာကို တရုတ်နိုင်ငံဘက်မှ ၂၀၂၀ ခုနစ် အတွင်း (၁၂)ပေ အမြင့်ခြံစည်းရိုးခတ်ခဲ့ပြီး ယခု ဇွန် (၂၃)ရက်တွင် လ ခြံစည်းရိုးအသစ် နောက်တထပ် ထပ်မံခတ်ယူသည့်အပေါ် မန့်ဝိန်းကြီး ဒေသခံများက သွားရောက်ဖြိုဖျက်ခဲ့ပြီး၊ အငြင်း ပွားမှုများ ဖြစ်ပွားခဲ့ကြောင်း မန့်ဝိန်း ဒေသခံတစ်ဦး က သျှမ်းသံတော်ဆင့်ကို ပြောသည်။
မြန်မာ-တရုတ်နယ်စပ်မျဉ်းကိစ္စဖြစ်သလို မြန်မာဘက်ခြမ်းကို တရုတ်က လာရောက်ခြံစည်းရိုးခတ်သည့်အတွက် မြန်မာအာဏာပိုင်းများနှင့် ညှိနှိုင်းပြီး လုပ်ရန် ဒေသခံများ ပြောဆိုခဲ့သည်။
“ ဒီနေ့ သူတို့ ဒုတိယတစ်ခုအနေနဲ့ ပြန်လာခတ်တယ်။ ဒါတွေမလုပ်ဖို့ ကျနော်တို့ ဟိုဖက်က အချိတ်ဆက်နဲ့ပြောတယ်။ မြန်မာနိုင်ငံနဲ့ ညှိနှိုင်းလုပ်ဖို့ပြောတယ်။ မှတ်တိုင်တွေက ပျောက်နေတာလည်းရှိတယ်။ ဒုတိယခြံစည်းရိုး မကာနဲ့လို့ပြောနေတဲ့ကြားက ကာတယ်။ အဲကြောင့် ဒီဘက်က ရှိနေတဲ့ရွာသားတွေနဲ့ ပြန်ပြီးတော့ ဖြိုလိုက်တယ်” ဟု မန့်ဝိန်ကြီး ဒေသခံစိုင်းမိန်း က ပြောသည်။
ထိုသို့ ခြံစည်းရိုးကာရခြင်းသည် COVID-19 ကူးစက်ရောဂါကြောင့် ပြုလုပ်ရခြင်းဖြစ်သည်ဟု တရုတ်နိုင်ငံဘက်မှ ပြောဆိုသည်။
ထို့နောက် မြန်မာနိုင်ငံဘက်မှ တရုတ်နိုင်ငံသားများ လာရောက်ကာသည့် ခြံစည်းရိုးကိုသွားရောက်ဖြိုချ ဖျက်ဆီး လိုက်သည့်အတွက် တရုတ်နိုင်ငံသားနယ်ခြားစောင့်တပ်များက လုံခြုံရေး အပြည့်ဖြင့် လာရောက် ယူထားကြောင်း သိရသည်။
လက်ရှိဖြစ်ပွားနေသည့် မြေယာကိစ္စကို ၂၀၁၅ NLD အစိုးရလက်ထက်တွင် စာတင်ပြခဲ့သော်လည်း ဖြေရှင်းပေးမှု မရှိခဲ့ကြောင်းသိရသည်။
ထိုပြသနာကို မည်သည့်အစိုးရလက်ထက်မဆို ဖြေရှင်းပေးစေလိုကြောင်း ပြည်သူများကတောင်းဆိုလိုက်သည်။
“ ကျနော်တို့ ဒီပြသနာကိုဖြေရှင်းပေးစေချင်တယ်။ ဘယ်အစိုးရဖြစ်ဖြစ်ပေါ့။ ကျနော်တို့ ကိုယ်စားလှယ်တွေကို လဲစာတင်ဖူးတယ်။ အခုတက်လုပ်မဲ့ အစိုးရ တွေကိုလဲ ဒီပြသနာကို ဖြေရှင်းပေးစေချင်တယ်” ဟု မန့်ဝိန်း ဒေသခံ စိုင်းမိန်း တစ်ဦး ကပြောသည်။
ထိုနေရာတွင် မြစ်ရေကြီးမှုကြောင့် မြန်မာဘက်ခြမ်းရှိ မြေများတိုက်စားခံရပြီး မြေနုကျွန်းအဖြစ် တရုတ်နိုင်ငံအတွင်းသို့ ၈၀ ဧကကျော်ပါသွားခံကြောင်းသိရသည်။
ထိုမြေယာကိစ္စကြောင့် တရုတ်နိုင်ငံသားများနှင့် မြန်မာနိုင်ငံသားမျာက ၂၀၁၈ ခုနစ်တွင် တုတ်ကိုင်၊ဓားကိုင် ပြီးဖြေရှင်းခဲ့ရဖူးကြောင်းသိရသည်။
