သျှမ်းပြည်မြောက်ပိုင်း မိုင်းရယ်မြို့တွင် ကိုဗစ်-၁၉ အတည်ပြု လူနာ (၂) ဦးတွေ့ရှိထားကြောင်း စုံစမ်းသိရှိရသည်။
အဆိုပါ အတည်ပြု လူနာ (၂) ဦးသည် ယမန်နေ့ (ဇွန် ၁၆)ရက်တွင် မန္တလေးမြို့သို့ ဆေးကုရန် သွားစဉ် စစ်ဆေးရေးဂိတ်မှာ ကိုဗစ်-၁၉ စစ်ဆေးတွေ့ရှိသဖြင့် မိုင်းရယ်ပြည်သူ့ဆေးရုံသို့ ဆေးကုသခံယူရန် ချက်ခြင်းပြန်လာရကြောင်း မိုင်းရယ် ဒေသခံ တစ်ဦး ကပြောသည်။
“သူ့အဖေ ကို မန္တလေးမှာ ဆေးကုဖို့ သွားမလို့ ကိုဗစ် စစ်ဆေးရေးဂိတ်မှာ စစ်ဆေးတော့ Positive ဖြစ်လို့ဆိုပြီး မနေ့ညတွင်းချင်း မိုင်းရယ် ကို ပြန်လာရတယ်” ဟု ဒေသခံ တစ်ဦးက သျှမ်းသံတော်ဆင့် ကိုပြောသည်။
အဆိုပါ ကိုဗစ်-၁၉ အတည်ပြု လူနာ (၂) ဦးကို မိုင်းရယ် ဆေးရုံမှာ ဆေးကုသမှု ခံယူပြီး နေအိမ်ဝိုင်းတွင်းရှိ မိသားစုများကို lockdown ချထားကြောင်း သတင်းရရှိသည်။
အလားတူ လားရှိုးမြို့တွင်လည်း ကိုဗစ်-၁၉ အတည်ပြု လူနာ (၆၂) ဦး နှင့် နမ္မတူမြို့တွင် (၃) ဦး တွေ့ရှိခဲ့ကြောင်း သိရသည်။
ဖေဖော်ဝါရီ ၁ ရက်နေ့ စစ်အာဏာသိမ်းပြီးနောက် ကိုဗစ်-၁၉ ပိုးတွေ့လူနာ ကျဆင်းလာပြီး ဇွန်လအတွင်း သျှမ်းပြည်အတွင်း ကိုဗစ်-၁၉ ပိုးတွေ့ရှိသူ ပြန်လည် မြင့်တက်လာခဲ့ကြောင်း သိရသည်။
Leave a Comments