သျှမ်းပြည် မြောက်ပိုင်း လားရှိုးမြို့တွင် စစ်ကောင်စီမှ (၃) လကျော်နီးပါး မတရားဖမ်းဆီးထားသည့် သျှမ်းလူငယ် ကျော်သက်ဦး (ခ) စိုင်းဆိုင်ဝမ်းဦး ကို ဇွန် (၁၆)ရက် တွင် ထောင်ဒဏ် (၂)နှစ်ချခံရကြောင်း စုံစမ်းသိရသည်။
စိုင်းဆိုင်ဝမ်းဦး ကို မတ် (၈)ရက် မနက် (၆)နာရီဝန်းကျင်တွင် စစ်ကောင်စီ မှ သိန်းထိုက်ရုပ်ရှင်ရုံအနီးရှိ လက်ဖက်ရည်ဆိုင်တွင် လက်ဖက်ရည်သောက်ရန် ချိန်းထားကာ သွားနေစဉ် လမ်းတွင် ဖမ်းဆီးခံခဲ့ရသည်။
“ သူ က ဆန္ဒပြလို့ ဖမ်းသွားတာ မဟုတ်ဘူး။ ရဲကတော့ သူ့လက်ထဲမှာ သျှမ်းအလံကိုင်ထားလို့ ဖမ်းတာတဲ့။ ဒါပေမယ့် အလံက သူ့လက်ထဲမှာ မဟုတ်ဘူး။ အလံက သူ့အနီးက မြောင်းထဲမှာ ရှိနေတာ။ ဒါကို သူ့အလံဆိုပြီး စွတ်စွဲပြီး ဖမ်းသွားတာ။ ဇွန် (၁၆)ရက်ကတော့ ပုဒ်မ ၅၀၅ (က)နဲ့ ထောင်ဒဏ် (၂)နှစ် ချလိုက်တယ် ” ဟု စိုင်းဆိုင်ဝမ်းဦး နှင့် နီးစပ်သူတစ်ဦး က သျှမ်းသံတော်ဆင့် ကို ပြောသည်။
စိုင်းဆိုင်ဝမ်းဦးကို စစ်ကောင်စီ မှ ဖမ်းဆီးစဉ်တွင်လည်း ရိုက်နှက်ကြောင်း၊ လားရှိုးအကျဉ်းထောင်သို့ ပို့ဆောင် ထိန်းသိမ်းခံရစဉ်တွင်လည်း ထောင်ထဲတွင် စစ်ကောင်စီမှ အမျိုးမျိုး နှိပ်စက်မှု ပြုလုပ်ကြောင်း၊ အကြောင်းအရင်းမသိ စာရွက်ပေါ်တွင် လက်မှတ်ရေးထိုး ခံဝန်းခိုင်းကြောင်း ၎င်း အမှုကို လိုက်ပါ ကူညီပေးသည့် အမျိုးသား တစ်ဦး က သျှမ်းသံတော်ဆင့်ကို ပြောသည်။
“သူက မတရားဖမ်းဆီးခံရပြီး ပုဒ်မတပ်ခံရတာပါ၊ သူ့အမှုစစ်တဲ့ကာလမှာ ထွက်ဆိုချက်အရ အတော်လေး ရိုက်နှ က်နှိပ်စက်ခံရတယ်၊ ပြီးတော့ အကြောင်းရင်းမသိရဘဲ လက်မှတ်ထိုးခိုင်းတာလည်းရှိတယ်” ဟု အထက်ပါ ပုဂ္ဂိုလ် က ဆိုသည်။
စိုင်းဆိုင်ဝမ်းဦး ၏ အမှုကို စစ်ဆေးရာတွင် လားရှိုးမြို့ အကျဉ်းထောင်ရှိ တရားခွင်တွင်သာ စစ်ဆေးမေးမြန်းခဲ့ကြောင်း သိရဥည်။
စစ်တပ်မှ နိုင်ငံတော် အာဏာာသိမ်းယူပြီးနောက် လူငယ်များ အာဏာရှင် ဆန့်ကျင်တော်လှန်ရေး ဆန္ဒပြလှုပ်ရှားသူ များကို အကြမ်းဖက် ပစ်ခတ်ဖမ်းဆီးမှုများ ပြုလုပ်ခဲ့ရာ သျှမ်းလူငယ်များအနက် စိုင်းဆိုင်ဝမ်းဦး သည် ပထမဆုံး စစ်ကောင်စီမှ ထောင်ဒဏ်ချမှတ်ခံရသူ တစ်ဦးဖြစ်သည်။
