သျှမ်းပြည် မြောက်ပိုင်း လာရှိုးမြို့တွင် ယမန်နေ့(ဇွန် ၁၅)ရက် အထိ ကိုဗစ်-၁၉ ပိုးတွေ့လူနာ စုစုပေါင်း ၆၂ ဦးရှိကြောင်း စုံစမ်းသိရှိရသည်။
“ မနေ့ကထိတော့ ၆၂ ယောက်ရှိပါတယ်။ ဒီနေ့ကတော့ မသိရသေးဘူး။ ရောဂါပြင်ထန်းတဲ့သူကို မန္တလေးကို ပို့ပေးတယ်။ ၄ ယောက်ရှိတယ်။ သေတာတော့မရှိသေးဘူး။ အနံမရတဲ့သူများတယ်” ဟု လာရှိုးမြို့ ကိုဗစ် ၁၉ လူမှုကူညီရေးအသင်း က သျှမ်းသံတော်ဆင့်ကိုပြောသည်။
လာရှိုးမြို့တွင် ကိုဗစ် ၁၉ ရောဂါကို အိန္ဒိယနိုင်ငံမှ ပြန်လာသည့်သူ (၄)ဦးထံမှ စတင်ပြန်ပွားခဲ့ကြောင်း သိရသည်။
“ လာရှိုးမှာက အဓိက ပြန့်ပွားခဲ့တာက အိန္ဒိယ နိုင်ငံမှ ပြန်လာခဲ့တဲ့သူတွေကနေဖြစ်တာ။ သူတို့ အဲမှာ မဂ်လာဆောင်သွားတာ။ ပြန်လာတော့ ကိုဗစ် ပိုးတွေ့တာပေါ့” ဟု လာရှိုးမြို့ ဒေသခံတစ်ဦးကပြောသည်။
အဆိုပါ လာရှိုးမြို့တွင် ကိုဗစ် ၁၉ ပိုးတွေ့လူနာများကို လာရှိုးမြို့ ပြည်သူဆေးရုံးတွင် ဆေးကုသခံယူနေရကြောင်းသိရသည်။
ထိုနည်းတူ ယနေ့ (ဇွန် ၁၆ ) ရက် တွင် နမ္မတူမြို့နယ်၌ ကိုဗစ် -၁၉ ပိုးတွေ့လူနာ အသစ် ( ၃) ဦးတွေ့ရှိခဲ့ရကြောင်း သိရသည်။
“ ဟုတ်ပါတယ်။ နမ္မတူမှာ ဒီနေ့စတွေ့တာ။ ဘယ်သူတွေလဲဆိုတာတော့ သေချာမသိရသေးဘူး။ ပိုးတွေ့တာတော့ ဟုတ်တယ်” နမ္မတူမြို့ဒေသခံတစ်ဦး က ပြောသည်။
ဖေဖော်ဝါရီ ၁ ရက်နေ့ စစ်အာဏာသိမ်းပြီးနောက် ကိုဗစ် ၁၉ ပိုးတွေ့လူနာ ကျဆင်းလာပြီး ဇွန်လအတွင်း သျှမ်းပြည် အတွင်း ကိုဗစ်-၁၉ ပိုးတွေ့ရှိသူ ပြန်လည်မြှင့်တက်လာခဲ့ကြောင်းသိရသည်။
