သျှမ်းပြည် အရှေ့ပိုင်း မြန်မာ-ထိုင်း နယ်စပ် တာချီလိတ်မြို့တွင် ဗုံးပေါက်ကွဲမှုဆက်တိုက်ဖြစ်ပွားမှုကြောင့် စစ်ကောင်စီအုပ်စုသည့် မြို့ပေါ်ရှိ ဘုန်းကြီးကျောင်းများ၌ တပ်စွဲထားကြောင်း စုံစမ်းသိရသည်။
ယမန်နေ့ ( ဇွန် ၁၃) ရက် ညနေပိုင်းတွင် တာချီလိတ်မြို့ပေါ်ရှိ ဝမ်မိုင်ဘုန်းကြီးကျောင်း၊ အာခါ ဗုဒ္ဓကျောင်း နှင့် ပါလျံ ဘုန်းကြီးကျောင်းတွင် တပ်စွဲထားကြောင်း တာချီလိတ်ဒေသခံများက သျှမ်းသံတော်ဆင့် ကို ပြောသည်။
“ မနေ့ညမှာ(ဇွန်လ၁၃ ရက်) မြို့ထဲရှိတဲ့ ဝမ်မိုင်ဘုန်းကြီးကျောင်းကို ကားနှစ်စီး နဲ့ စစ်သားတွေက လာပြီး တပ်စွဲထားတာ၊ အာခါဗုဒ္ဓကျောင်းထဲမှာနဲ့ ပါလျံဘုန်း ကြီးကျောင်းကိုလည်း စစ်တပ်ကလာပြီး တပ်စွဲထား လိုက်ပြီ၊ ခရိုင်ရဲတပ်ဖွဲ့မှာ ပစ်ခတ်မှုတွေ ဖြစ်ပြီးနောက် စစ်ကောင်စီကလူငယ်တွေကိုဖမ်းသွားတာ မနည်း တော့ဘူး” ဟု ၎င်းက ပြောသည်။
တာချီလိတ်မြို့ရှိ ခရိုင်ရဲတပ်ဖွဲ့ရုံး ပစ်ခတ်ခံရပြီး ရဲတပ်ကြပ်တစ်ဦး သေဆုံးရသည့် နောက်ပိုင်းတွင် မြို့တွင်း ၌ လုံခြုံရေး အင်အားအရင်ကထက်ပိုမိုတင်းကြပ်လာပြီး လမ်းလာများကိုလည် စစ်ဆေးမှုများပြုလုပ်နေကြောင်း လည်း တာချီလိတ်ဒေသခံ များက ပြောသည်။
ယနေ့ ဇွန်လ(၁၄)ရက်နေ့ထိ တာချီလိတ်လူငယ် (၉) ဦးထက် မနည်း စစ်ကောင်စီမှ ဖမ်းဆီးသွားကြောင်း သိရသည်။
“ ခရိုင်ရဲတပ်ဖွဲ့မှူးရုံးက ပစ်ခတ်ဖောက်ခွဲတွေဖြစ်ပြီးနောက် သူတို့က လုံခြုံရေးကို အများကြီးချထားတယ်၊ စစ်ဆေးမှုတွေကလည်း အရင်ကထက် များလာတော့ သွားရေးလာရေးကလည်း ခက်ခဲလာတယ်၊ သူတို့က လူတွေမထင်ရင် မထင်သလို ဖမ်းဆီးတတ်တော့ အပြင်ထွက်ရမှာတောင် ခပ်လန့်လန့်ပဲ” ဟု လည်း ဒေသခံ တစ်ဦးက သျှမ်းသံတော်ဆင့်ကို ပြောသည်။
လက်ရှိတွင် တာချီလိတ်မြို့မှာ ဗုဒ္ဓဘာသာ ဘုန်းကြီးကျောင်းများ အပါအဝင် လမ်းမကြီးနှင့် အချို့သော လမ်းကြိုလမ်းကြား ရပ်ကွက်များ၌ စစ်ကောင်စီ အုပ်စု လမ်းပိတ်ကာ စစ်ဆေးမှု ပြုလုပ်နေကြောင်း သိရသည်။
