သျှမ်းပြည်တောင်ပိုင်း ဟိုပုံးမြို့တွင် ဇွန် ၄ ရက် ညသန်းခေါင်ယံ အချိန်တွင် အာဏာသိမ်းစစ်ကောင်စီမှ လူငယ် (၇) ဦးကို အကြောင်းမဲ့ ဖမ်းဆီးခေါ်ဆောင်သွားကြောင်း စုံစမ်းသိရှိရသည်။
ဟိုပုံးမြို့ အနောက်မြို့ပတ်လမ်း မြိုဦးရပ်ကွက်တွင် နေထိုင်သည့် လူငယ် ၅ ဦးသည် ဇွန် ၄ရက် ၌ အိမ်ရှေ့တွင် ထိုင်နေချိန် စစ်ကောင်စီမှ ရောက်လာပြီးဖမ်းဆီးခေါ်ဆောင်သွားပြီး၊ ဆိုင်ကယ်ဖြင့် သွားလာနေသည့် လူငယ်(၂)ဦးကိုလည်း ထပ်မံဖမ်းဆီးခေါ်ဆောင်သွားကြောင်း သတင်းရရှိသည်။
“ သူတို့ ၅ ယောက်က အိမ်ရှေ့က အုတ်ခုံးပေါ်မှာထိုင်ပြီးဝိုင်းဖွဲ့နေတာ။ စစ်သား ကင်းလှည့်နေချိန်နဲ့တွေ့တော့ အိမ်ထဲဝင် သွားတယ်။ သူတိုအိမ်ထဲထိ လိုက်ဖမ်းတာ။ အင်အား အရမ်းများတယ်” ဟု ဟိုးပုံမြို့ဒေသခံတစ်ဦး ကပြောသည်။
အလားတူ ၎င်းတို့ ၅ ဦးကိုဖမ်းဆီးနေချိန်တွင် ဆိုင်ကယ်တစ်စီးက အရပ်သား(၂)ဦးကိုလည်း ဆိုင်ကယ်ရပ်တန့်ခိုင်းပြီး တခါတည်း ဖမ်းဆီးသွားခဲ့ကြောင်းသိရသည်။
“ လူငယ် (၅)ဦးကို ဖမ်းဆီးပြီးတဲ့ချိန်မှာ လူ (၂)ယောက်နဲ့ဆိုင်ကယ်တစ်စီးဖြတ်လာတယ်။ သူတို့ရပ်ခိုင်းတာ မရပ်ရင်ပစ်မယ်လိုဆိုပြီးအော်ပြောတော့ ဟိုကလည်းရပ်ပေးပြီးဖမ်းသွားတယ်။ ဆိုင်ကယ်လည်းသိမ်းသွားတယ်။ ဖုန်းတွေကောပါတယ်” ဟု ၎င်း က ဆိုသည်။
ထိုဖမ်းဆီးခံရသူ ၇ ဦးကို ဟိုပုံးမြို့ ရဲစခန်းတွင် ဖမ်းဆီးခေါ်ဆောင်သွားကြောင်း၊ ယနေ့မနက် မိသားစုများလိုက်ပါ သွားရာတွင် တွေ့ဆုံးခွင့်မပေးကြောင်း သိရသည်။
စစ်အာဏာသိမ်းပြီးနောက် ဟိုပုံးမြို့တွင် စစ်ကောင်စီမှ ဖမ်းဆီးခေါ်ဆောင်သွားသူ စုစုပေါင်း (၁၃) ဦးရှိကြောင်း သိရသည်။
Leave a Comments