သျှမ်းပြည် မြောက်ပိုင်း ကျောက်မဲမြို့တွင် ဇွန်လ (၂)ရက် ညနေပိုင်းက ဆံပင်ညှပ်ဆိုင်တွင် အလုပ်လုပ်နေသည့် လူငယ်တစ်ဦး ကို စစ်ကောင်စီ မှ ဝင်ရောက်ဖမ်းဆီးခေါ်ဆောင်သွားကြောင်း စုံစမ်းသိရသည်။
ကျောက်မဲမြို့ အမှတ်(၃)ရပ်ကွက်ရှိ ဆံပင်ညှပ်ဆိုင်တွင် အလုပ်လုပ်နေသည့် အသက် (၃၀) အရွယ်ရှိ စိုင်းရွှေထွန်း ကို စစ်ကောင်စီ အုပ်စုမှ ဖုန်းဆက်ပြီး ၎င်းဖုန်းနံပတ်ကိုင်ဆိုင်သည့် စိုင်းရွှေထွန်းကို အကြောင်းမဲ့ဖမ်းဆီးခေါ်ဆောင် သွားကြောင်း စိုင်းရွှေထွန်း ၏ အမျိုးသမီး က သျှမ်းသံတော်ဆင့်ကို ပြောပြသည်။
“အဲ့နေ့(ဇွန်လ ၂ ရက်နေ့) က ညနေပိုင်းအချိန်မှာ အစ်ကိုက ဆိုင်မှာ ဧည့်သည်တွေကို ဆံပင်ညှပ်ပေးနေတုန်း ရဲ နဲ့ စစ်သားတွေက ဝင်လာပြီးတော့ အစ်ကို့ ဖုန်းကိုခေါ်တယ်၊ ဖုန်းမြည်သံကြားတော့ ဘယ်သူ့ဖုန်းလည်း မေးပြီး အစ်ကိုက ကျွန်တော့်ဖုန်းပါလို့ ပြန်ဖြေတော့ သေနတ်နဲ့ထောက်ပြီး ဖမ်းခေါ်သွားရော၊ အခု ၅၀၅ (ခ) နဲ့ အမှု ဖွင့်ပြီး သီပေါအကျဉ်းထောင်ကို ပို့လိုက်ပြီ“ ဟု စိုင်းရွှေထွန်း၏ အမျိုးသမီး က ဆိုသည်။
ဖမ်းဆီးခံရသူ စိုင်းရွှေထွန်းသည် ရပ်ရွာအကျိုးကို အားသွန်ခွန်စိုက် လုပ်ကိုင်တတ်သူ ဖြစ်ပြီး၊ အပေါင်း အသင်းများနှင့် လည်း ခွဲခြားဆက်ဆံ ပေါင်းသင်းသူမဟုတ်ကြောင်း၊ အလှူအတန်း ရက်ရောသူ တစ်ဦးဖြစ်ကြောင်းသိရသည်။
အကျဉ်းထောင်ရောက်နေသည့် စိုင်းရွှေထွန်း နှင့် သူ၏ မိသားစုတွေ့ဆုံခွင့် ရထားကြောင်း၊ စစ်ကောင်စီဘက်မှ စိုင်းရွှေထွန်းကို ခေါ်ဆောင်သွားသည့် ရက်တွင် ရိုက်နှက်မှုပြုလုပ်ခဲ့ပြီး၊ သီပေါ အကျဉ်းထောင်ထဲတွင် ရိုက်နှက်ခြင်းမရှိတော့ ကြောင်းလည်း ၎င်း၏ အမျိုးသမီးက ပြောသည်။
“ ဒီနေ့မနက် ကျမ ထောင်ဝင်စာသွားတွေ့တာ ဖုန်းလေးနဲ့တော့ နှစ်မိနစ်လောက် ဖုန်းပြောခွင့်ရတယ်၊ သူ့ကို စစ်သားတွေခေါ်သွားတုန်းကတော့ ရိုက်နက်တာ ရှိတယ်တဲ့၊ အခု သီပေါထောင်မှာတော့ ရိုက်နက်မှု မရှိသေးဘူးတဲ့၊ ဘယ်လိုပဲပြောပြော စိတ်ကတော့ပူနေမိတာ အမှန်ပါ၊ အမြန်ဆုံးလွတ်ပေးစေချင်ပါတယ်” ဟု ၎င်း၏ အမျိုးသမီး က ထပ်မံပြောသည်။
ပြီးခဲ့သည့် မေလ ၃၀ ရက်နေ့ ညနေပိုင်း အချိန်တွင်လည်း ရှမ်းပြည်နယ်(မြောက်ပိုင်း)၊ ကျောက်မဲမြို့တွင် ဓာတ်ပုံရိုက် ဝါသနာပါသည့် ကိုမင်းမင်းအား ရဲနှင့် စစ်သားတွေက သေနတ်ဖြင့်ထောက်ကာ ဖမ်းဆီးခေါ်ဆောင်သွားပြီး စစ်အာဏာ ရှင်ဆန့်ကျင်ရေး ဆန္ဒပြသည့် ဗီဒီယိုများကို Facebook ပေါ်တင်သည့် အကြောင်းပြချက်ဖြင့် ကျောက်မဲမြို့မရဲစခန်းမှ (ပ)၇၈/၂၀၂၁ ရာဇသတ်ကြီးပုဒ်မ ၅၀၅-က ဖြင့် အမှုဖွင့် ထားကြောင်းသိရသည်။
လက်ရှိတွင် စစ်အာဏာရှင်ဆန့်ကျင်ရေး ဆန္ဒပြပွဲများတွင် ပါဝင်သူများကို စစ်ကောင်စီ က နေ့စဉ် လိုက်လံဖမ်းဆီးပြီး လက်ရှိ အချိန်ထိ ကျောက်မဲမြို့မှ ဖမ်းဆီးခံရသူ (၁၂) ဦးရှိပြီဖြစ်ပြီး ၊ထိုသူများကို ပုဒ်မ ၅၀၅-(က) သို့မဟုတ် ၅၀၅ (ခ) ဖြင့် အမှုဖွင့်၍ သီပေါအကျဉ်းထောင်သို့ ပို့ဆောင်ကြောင်းလည်း သိရသည်။
