သျှမ်းပြည်တောင်ပိုင်း တောင်ကြီးမြို့တွင် ဈေးပိုင်းရပ်ကွက် နေထိုင်သည့် ဓာတ်ပုံဆရာ တစ်ဦး ကို စစ်ကောင်စီမှ ယမန်နေ့ (ဇွန် ၃)ရက် ညသန်းခေါင်ချိန်၌ ရိုက်နှိက်ပြီး ဖမ်းဆီးခေါ်ဆောင်သွားကြောင်း သတင်းရရှိသည်။
ယမန်နေ့ ညသန်းခေါင် (၁၂)နာရီချိန်တွင် စစ်ကောင်စီ အုပ်စု သည် ဓာတ်ပုံဆရာ ခွန်အောင်ဆန်း (ကိုမင်းဇာနည်) ၏ နေအိမ်ထိ ကား(၆)စီး၊ လူအင်အား (၂၀)ဝန်းကျင်တို့ဖြင့်ရောက်ရှိလာပြီး၊ ဓာတ်ပုံဆရာ ကို ရိုက်နှက် ကာ ဖမ်းဆီး ခေါ်ဆောင် သွားကြောင်း ထိုဖြစ်စဉ်ကို မြင်တွေ့ခဲ့သူတစ်ဦး က သျှမ်းသံတော်ဆင့်ကို ပြောသည်။
“ ည ၁၂ နာရီအချိန်မှာလာဖမ်းတာ။ အိမ်ကို ကား(၆)စီး၊အင်အား (၂၀)လောက်ရှိမယ်။ ဘာကြောင့်ဖမ်းလဲမသိဘူး။ ရိုက်ပြီးဖမ်းသွားတာ” ဟု ဖြစ်စဉ်ကို မြင်တွေ့ခဲ့သူတစ်ဦး ကဆိုသည်။
ဓာတ်ပုံဆရာ ခွန်အောင်ဆန်းကို လာရောက်ဖမ်းဆီးချိန်တွင် ၎င်း၏ မိသားစုဝင်များကိုလည်း စစ်ကောင်စီ မှ ရိုက်နှက်ခဲ့ကြောင်း သိရသည်
“ သူတို့အိမ်မှာက ၆ ယောက်လောက်တော့ရှိမယ်ထင်တယ်။ သူရဲ့ အမေကိုလည်းရိုက်တယ်။ ပြီးတော့ သူအမ၊ညီမနဲ့ ပြီးတော့ ယောင်္ကျားလေးတစ်ယောက်ပါရိုက်ခံရတယ်။ယောင်္ကျားလေးရဲ့ မျက်နှာနဲ့ ခြေထောက်ရောင်နေတယ်” ဟု အထက်ပါ မျက်မြင်တွေ့ရှိသူက ဆက်ပြောပြသည်။
ဖေဖော်ဝါရီ ၁ ရက်နေ့မှ စစ်အာဏာသိမ်းပြီးနောက်ပိုင်း ည မထွက်ရ အမိန့်ကိုထုတ်ပြန်ခဲ့သော်လည်း ည နက်ချိန်တွင် စစ်ကောင်စီမှ ပြည်သူများကို နေအိမ်ထိ လိုက်လံဖမ်းဆီးမှုများ ပြုလုပ်နေလျက်ရှိနေသည်။
ထိုသို့ အာဏာသိမ်းစစ်ကောင်စီတို့မှ ည မထွက်ရ အမိန့်ကို ထုတ်ပြီး ၎င်းတို့ ကိုယ်တိုင် ချိုးဖောက်နေသောကြောင့် အယုံကြည်လုံးဝမရှိကြောင်း တောင်ကြီးမြို့ဒေသခံတစ်ဦးကပြောသည်။
“ သူတို့က ထုတ်ပြီးသူတို့ကပဲ ပြည်သူတွေကိုလိုက်ဖမ်းနေတယ်။ တအားယုတ်မာတာ။ ။ သူတို့လုပ်ရပ်တွေက ခွင့်လွှတ်ပေးလို့ရတဲ့လုပ်ရပ်မဟုတ်ဘူး။ ကျနော်တို့ပြည်သူတွေက ည ကော မနက်ကော သတိထားနေရတယ်။ စိုးရိမ်းစိတ်နဲ့နေရတယ်” ဟုတောင်ကြီးမြို့ Generation Z လူငယ်တစ်ဦးက ပြောသည်။
အလားတူ ယမန့်နေ့ည တွင် တောင်ကြီးမြို့ပေါ်တွင် ဖမ်းဆီးခံရသူ စုစုပေါင်း (၇) ဦးရှိကြောင်း ဒေသခံများက သတင်းပေးပို့ချက်အရသိရသည်။
သို့သော် သျှမ်းသံတော်ဆင့်သတင်းဌာန အနေဖြင့် ခွန်အောင်ဆန်း တဦးမှ လွှဲပြီး ကျန်ဖမ်းဆီးခံရသည့် သူများကို လိုက်လံမေးမြန်းစုံစမ်းနေဆဲ။
ဖေဖော်ဝါရီ ၁ ရက်နေ့မှ ဇွန် (၃)ရက် ထိ စစ်ကောင်စီမှ ပြည်သူ (၈၄၅ )ဦး ကိုသတ်ဖြတ်ပြီး ဖမ်းဆီးထားသူ စုစုပေါင်း (၅၆၅၂ ) ဦးရှိကြောင်း နိုင်ငံရေးအကျဉ်သားများ ကူညီစောင့်ရှောက်ရေး (AAPP ) ထုတ်ပြန်ချက်အရ သိရသည်။
Leave a Comments