သျှမ်းပြည် တောင်ပိုင်း မိုးနဲမြို့နယ်အတွင်း တစ်ရက်တည်း ကုန်တင်ကားကြီး နှစ်စီး ဓားပြတိုက်ခံရကြောင်း စုံစမ်းသိရသည်။

ပြီးခဲ့သည့် မေလ ၃၁ ရက် တွင် သျှမ်းပြည်တောင်ပိုင်း မိုးနဲ-နမ့်စန် ပြည်ထောင်စု လမ်းမကြီးပေါ် မောင်းနှင်လာသည့် ကားတစ်စီးနှင့် မိုးနဲ-ကျိုင်းတောင်း ကားလမ်းပေါ် ပြောင်း (ပြောင်းဖူး) တင်လာသည့် ကားတစ်စီး ဓားပြတိုက်ခံရကြောင်း မိုးနဲဒေသခံတစ်ဦး က ပြောသည်။

“ နှစ်စီး ဓါးပြတိုက်ခံရတယ်ဆိုတာ အမှန်ပါပဲ၊ ဓားပြတိုက်လာတဲ့လူတွေက ဗမာစကား ပြောကြတယ်၊ မျက်လုံးဖော်ရုံသာ မျက်နှာကို အဝတ်မည်းကြီးနဲ့ စည်းထားတယ်၊ ပါလာသမျှ ရွှေငွေပစ္စည်း အကုန်ပေး၊ မပေးရင် အကုန်ပစ်သတ်မယ်လို့ ကားသမားတွေကို ခြိမ်းခြောက်ပြီးတော့ ငွေတွေကို အကုန်ယူသွားတယ်” မိုးနဲ ဒေသခံတစ်ဦးက သျှမ်းသံတောဆင့်ကို ပြောသည်။

မိုးနဲ-နမ့်စန် ကြား ဓါးပြတိုက်ခံရသော ပြောင်းဖူးတင်ကားသည် မြန်မာငွေကျပ်သိန်းပေါင်း ၃၀၀ ကျော်ခန့် ပါသွားပြီး၊ မိုးနဲ -ကျိုင်းတောင်းကြား ဓါးပြတိုက်ခံရသော ကုန်တင်ကားက အနည်းဆုံး မြန်မာငွေကျပ် သိန်း ၁၀၀ နီးပါးခန့် ပါသွားကြောင်းသိရသည်။

စစ်ကောင်စီမှ နိုင်ငံတော် သိမ်းယူသည့်( ၄) လ ကာလအတွင်း နိုင်ငံနှင့်အဝှမ်း အကြောင်းရင်းမသိရဘဲ နှင့် ဗုံးပေါက်၊ မီးလောင်၊ အသတ်ခံရ၊ အဖမ်းခံရစသည့် မတည်မငြိမ် ဆူပူထကြွမှုများဖြစ်ပေါ်နေသည်။

ထိုနည်းတူ သျှမ်းပြည် အတွင်းမှာလည်း ခိုးမှု လုယက်မှု ဓါးပြတိုက်မှုသာမက လောင်းကစားဝိုင်းများလည်း များပြားလာသောကြောင့် လုံခြုံမှုမရှိသည့် အတွက် ပြည်သူများ စိုးရိမ် ထိတ်လန့်နေကြာင်းသိရသည်။