သျှမ်းမြောက် ကွတ်ခိုင်မြို့နယ် ခိုလုံကျေးရွာ အနီး တွင် ယနေ့ (ဇွန် ၃)ရက် မနက်ပိုင်းတွင် တဖတ်သတ် သေနတ်ပစ်ခတ် သည့် သံကြားနေရကြောင်း သတင်းရရှိသည်။
“ ဒီ မနက် (၁၀)နာရီလောက်မှာ သေနတ်ပစ်သံကြားရတယ်။ အပြန်အလှန်ပစ်တာတော့မဟုတ်ဘူး။ တဖက်သတ်အသံ ပါပဲ” ဟု ကွတ်ခိုင်မြို့နယ် တွင်နေထိုင်သည့်ဒေသခံ တစ်ဦး ကသျှမ်းသံတော်ဆင့် ကို ပြောသည်။
ကွတ်ခိုင်မြို့ နယ် ခိုလုံကျေးရွာအနီးတွင် ယမန်နေ့ (ဇွန် ၂)ရက် ညနေ (၅)နာရီကျော်တွင် ညီနောင်မဟာမိတ်ဖြစ်သည် တာအာင်း(ပလောင်) တပ်မတော် (TNLA )၊ ရက္ခိုင့်တပ်မတော် (AA) ပူးပေါင်းနှင့် စစ်ကောင်စီတို့ တိုက်ပွဲဖြစ်ပွားခဲ့ကြောင်း သိရသည်။
ထိုအပြင် စစ်ကောင်စီ ဘက်မှ လက်နက်ကြီး၊ လက်နက်ကြီးများဖြင့် ပစ်ခတ်သည့်အပြင် ရဟတ်ယာဉ် (၂)စီးဖြင့် လာရောက်ပစ်ခတ်ခဲ့ကြောင်း သိရသည်။
“မနေ့က ညနေ ၅နာရီခွဲကနေ ၆ နာရီအထိ လက်နက်ကြီး (၁၀ )ကျော်ကျောက်လောက်ကို စစ်တပ်က ပစ်တယ်၊ ပြီးတော့ ဟိုက်စကီးနဲ့ပါ လက်နက်ကြီး လက်နက်ငယ်တွေနဲ့ ထပ်ပစ်သေးတယ်၊ အခုဆို အဲ့နားရွာက လူတွေ ထွက်ပြေးကြပြီ” ဟု ဒေသခံတစ်ဦးက သျှမ်းသံတော်ဆင့်ကို ပြောသည်။
စစ်ကောင်စီတပ်က လက်နက်ကြီးများဖြင့် ပစ်ခတ်နေသည့်အပြင် ရဟတ်ယာဉ်ပျံဝဲသံများပါ ကြားနေရသဖြင့် ဒီကနေ့မှာ မြိုပေါ်၌ အသွားအလာမရှိသလောက် ရှင်းလင်းနေကြောင်းလည်း ၎င်းက ပြောသည်။
ကွတ်ခိုင်မြို့နယ်တွင် ညီနောင်မဟာမိတ်အပြင် ကချင်လွတ်လပ်ရေးတပ်မတော် (KIA) နှင့် စစ်ကောင်စီတို့သည် မကြာခဏ တိုက်ပွဲဖြစ်ပွားသည့်နေရာတခု ဖြစ်သည်။
Leave a Comments