သျှမ်းနီအမျိုးသားများတပ်မတော် (SNA )၏ ဒုစစ်ဦးစီးချုပ် ဗိုလ်ချုပ် စဝ်ခွန်ကျော်(ရဲဘော် သံချောင်း) သည် ယမန်နေ့ (မေ ၂၆)ရက် မနက်( ၉) နာရီတွင် မသမာသူတစ်ဦး၏လုပ်ကြံသတ်ဖြတ်မှု ခံရပြီး ကျဆုံးသွားကြောင်း သိရသည်
ထိုလုပ်ကြံမှုကြောင့် SNA ၏ ဒုစစ်ဦးစီးချုပ် ဗိုလ်ချုပ်စဝ်ခွန်ကျော်( ရဲဘော်သံချောင်း)နှင့် အတူ (SN တပ်သား နှစ်ဦးထိခိုက် ဒဏ်ရာရရှိခဲ့ပြီး လုပ်ကြံသူကိုလည်း အသေဖမ်းဆီးရမိခဲ့ကြောင်း သိရသည်။
“ ကျနော်တို့ သိရသလောက်တော့ မနေ့က တိုက်ပွဲဖြစ်တာမရှိဘူး။ တိုက်ပွဲကြောင့် ကျဆုံးသွားတာမဟုတ်ဘူး။ လုပ်ကြံ သတ်ဖြတ်ခံရတယ်” ဟု ဗိုလ်ချုပ်စဝ်ခွန်ကျော် ၏ နီးစပ်သူ တဦးက သျှမ်းသံတော်ဆင့်ကို ပြောသည်။
ဗိုလ်ချုပ် စဝ်ခွန်ကျော်(ရဲဘော်သံချောင်း)သည် မိုးညှင်းမြို့နယ် မော်ဟန်ကျေးရွာ ကချင်ပြည်တွင် မွေးဖွားခဲ့ပြီး၊ သျှမ်းနီ လူမျိုးဖြစ်သည်။
ဗိုလ်ချုပ်စဝ်ခွန်ကျော် (ရဲဘော်သံချောင်း)သည် ၁၉၈၈ ခုနစ်မှ ၁၉၉၅ ခုနစ်အထိ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တဦး (မြန်မာပြည်မြောက်ပိုင်း)တွင် ဒုတိယ ဥက္ကဌ နှင့် စစ်ရေး တာဝန်ခံ အဖြစ် တာဝန်ယူခဲ့သည်။
ထို့ပြင် သူသည် ၁၉၉၈ ခုနှစ်မှ ၂၀၀၆ ခုနှစ်အထိ ရှမ်းပြည်ပြန်လည်ထူထောင်ရေးကောင်စီ (RCSS /SSA )တွင် ဗဟိုကော်မတီဝင်တစ်ဦးအဖြစ် တပ်မဟာ (၂၄၁) တပ်မဟာမှူး တာဝန်ထမ်းဆောင်ခဲ့ပြီး လွယ်တိုင်းလျန်း ဌာနချုပ် ကိုတည်ထောင်စဉ်လည်း ပါဝင်ခဲ့သူ ဖြစ်သည်။
သျှမ်းနီလူမျိုးတစ်ဦးဖြစ်သော စဝ်ခွန်ကျော်သည် ၂၀၀၆ ခုနှစ် ဇန်နဝါရီလတွင် မိမိတို့သျှမ်းနီအမျိုးသားများ တန်းတူအခွင့်အရေးအတွက် သီးခြားတပ်မတော်တည်ထောင်ရန် မြန်မာပြည်မြောက်ပိုင်းသို့ ချီတက်လာသည်။
ထို မြန်မာပြည်မြောက်ပိုင်း ချီတ်ကလာသည့် သတင်းပေါက်ကြားမှုကြောင့် ဗမာ့တပ်မတော်၏ ပိတ်ဆို့ဖမ်းဆီးခြင်းကို ခံရပြီး သျှမ်းမြောက် နမ့်ခမ်းမြို့နယ် နမ့်တီးရွာအနီးတွင် ဖမ်းဆီးခြင်းခံရပြီး သေဒဏ်လေးကြိမ် အပြစ်ပေးခြင်းခံရသူ တဦးလည်း ဖြစ်သည်။
၂၀၁၈ ခုနှစ် ဧပြီလ ၁၇ ရက်နေ့တွင် သမ္မတ ဦးဝင်းမြင့်၏လွတ်ငြိမ်းချမ်းသာခွင့်ဖြင့် ပြန်လည်လွှတ်မြောက်လာပြီး ခေတ္တအနားယူကာ သူ၏ မူလရည်ရွယ်ချက်ဖြစ်သော သျှမ်းနီအမျိုးသားများတိုးတက်ရေးအတွက်ဆောင်ရွက်ရန် ဒုတိယ စစ်ဦးစီးချုပ်အဖြစ် ပြန်လည် တာဝန်ထမ်းဆောင်ခဲ့သည်။
Leave a Comments