တာချီလိတ်မြို့နယ် လယ်ယာမြေ အဓမ္မသိမ်းခြံခတ်ပြုလုပ်သည့် ဟုန်ပန်းကုမ္ပဏီ သည် ပြည်သူဘက် ရပ်တည်ပေးနေသော ဝမ်းဟောင်းကျေးရွာ ဆရာတော်ပန်းရွှေကို တရားစွဲဆိုထားကြောင်း သတင်းရရှိသည်။
ဧပြီ ၉ ရက်တွင် ဟုန်ပန်းကုမ္ပဏီသည် စစ်ကောင်စီ အုပ်စုဖြစ်သည့် ရဲတပ်ဖွဲ့ကို အကာအကွယ်ယူပြီး တာချီလိတ် ပြည်သူများ ပိုင်ဆိုင်ပြီး သီးနှံစိုက်ပျိုးသည့်မြေပေါ် ခြံစည်းရိုးလာခတ်မှု ပြုလုပ်ခဲ့ပြီး၊ ထိုခြံစည်းရိုးကို ပြည်သူများက ပြန်ဖျက်ခဲ့သည်။
ထိုခြံစည်းရိုးပြန်ဖျက်သည့်အချိန်တွင် ဝမ်းဟောင်ရွာ ဆရာတော် ပန်ရွှေ ပါဝင်ခဲ့သည်ဟု ပြောဆိုကာ တာချီလိတ်ခရိုင်အုပ်ချုပ်ရေးမှူး နှင့် ဟုန်ပန်းကုမ္ပဏီ တို့ ပူးပေါင်းပြီး တရားစွဲဆိုထားကြောင်း သိရသည်။
“ သူတို့ က ဆရာတော်ကို တရားစွဲဖို့ စာပို့လာတာ။ ၂၈ ရက်နေ့ကျရင် နဂါးနှစ်ကောင်း ကျောင်းကိုသွားဖို့ပြောလာတယ်။ ဆရာတော်က ပြည်သူတွေကို ခြံစည်းရိုးဖျက်တာနဲ့ပတ်သက်ပြီး ဦးဆောင်သူအနေနဲ့ တရားစွဲတာပေါ့။ မိဘပြည်သူတွေကလည်း လုပ်ကိုင်စားသောက်နေတာကြာပြီ။” ဟု ဝမ်းဟောင်ဆရာတော်က မိန့်ကြားသည်။
မေ (၂၈)ရက်တွင် နဂါးနှစ်ကောင် ဘုန်းကြီးကျောင်း ကို ဟောင်လိတ်ကျေးရွာ ပြည်သူများကိုယ်တိုင် လိုက်ပါသွားမည်ဖြစ်ပြီး၊ ထိုကိစ္စနှင့် ပတ်သက်ပြီးဖြေရှင်းရန်ရှိကြောင်းလည်း သိရသည်။
“ ကျနော်တို့စီစဉ်ထားတာတော့ ဆရာတော်သွားတဲ့နေ့ကျရင် ကျနော်တို့ တစ်ရွာလုံးက လိုက်သွားမယ်ပြောတာ။ အဲတာ ဟိုဖက်က ဆရာတော်က တစ်ရွာလုံးလာရင် ကျောင်းထဲပေးမဝင်ဘူးလို့ပြောတယ်” ဟု ဝမ်းဟောင်းရွာဒေသခံတစ်ဦးက ပြောသည်။
ထိုမြေသည် ၁၉၉၈-၁၉၉၉ ခုနစ် စစ်အစိုးရ လက်ထက်တွင် အတင်းအဓမ္မသိမ်းယူပြီး ထိုထဲမှ ဧက (၁၀၀) ကို ဟုန်ပန်းကုမ္ပဏီအားပေးခဲ့ပြီး၊ ဟုန်ပန်းကုမ္ပဏီမှ ဧက (၂၀)ကိုသာ ပလပ်စတစ် စက်ရုံတည်ဆောက်ခဲ့သည်။
ကျန် ဧက (၈၀)ပေါ်တွင် လယ်သမားများက သီးနှံစိုက်ပျိုးခဲ့ပြီး ၂၀၁၈ ခုနစ်တွင် သိမ်းဆည်းထားသည့် လယ်ယာမြေများ အသုံးပြုခြင်းမရှိပါက မူရင်း လယ်ယာမြေပိုင်ရှင်ကိုပြန်ပေးရန် သျှမ်းပြည်အစိုးရ ဝန်ကြီးချုပ် ဒေါက်တာလင်းထွဋ်က ပြောဆိုခဲ့သည်။
