သျှမ်းပြည် တောင်ပိုင်း တောင်ကြီးမြို့ ပျောက်ဆုံးနေသည့် လူငယ်တစ်ဦးကို စစ်ကောင်စီ က (၂) ည ချုပ်နှောင် စစ်ဆေးမှု ပြုလုပ်ခဲ့ကြောင်း စုံစမ်းသိရသည်။

ဖြစ်စဉ်မှာ မေ ၂၅ ရက် နေ့လည် ၁နာရီ မှ ၂နာရီ ကြားအတွင်း စတင်ပျောက်ဆုံးခဲ့သည့် အသက် (၂၄) နှစ် အရွယ်ရှိ စိုင်းကောင်ခမ်းကို စစ်ကောင်စီ အုပ်စု က ဖမ်းဆီးခေါ်ဆောင်သွားပြီး ရဲစခန်းတွင် ချုပ်နှောင်ထားကာ စစ်ဆေးမှု ပြုလုပ်ခဲ့ပြီး ၎င်းတွင်ဖမ်းဆီးရန် သက်သေ အထောက်အထားမရှိသဖြင့် ယနေ့ ( မေ ၂၇)ရက် မနက်ပိုင်း တွင် ပြန်လည်လွှတ်ပေးခဲ့ကြောင်း စိုင်းကောင်ခမ်း၏ မိခင်က သျှမ်းသံတော်ဆင့်ကို ပြန်ပြောပြသည်။

“ အိမ်ပြန်ရောက်ပါပြီး။ ဒီနေ့မနက်ဘဲ ပြန်ရောက်လာတာ။ ၆ နာရီဝန်းကျင်လောက်က ပြန်ရောက်လာတယ်။ သူကိုဖမ်းသွားပြီးတော့ စစ်ဆေးတာ သူ့ဖုန်းထဲမှာ ဘာမှမရှိလို့ဆိုပြီးတော့ ပြန်လွှတ်လာပေးခဲ့တာ။ ရိုက်ထားတာတွေလည်း ဘာမှမရှိပါဘူး” ဟု ၎င်း၏ မိခင်က ဆိုသည်။

စိုင်းကောင်းခမ်းသည် မေ (၂၅ )ရက်တွင် ၎င်း၏မွေးကင်းစ (၈)ရက်သမီးကို ဓာတ်ပုံရိုက်ပေးရန်အတွက် ကင်မရာသွားယူပြီး အပြန်လမ်းတွင် တောင်ကြီးမြို့ ၂၁၂ ဈေးရှေ့တွင် ဖမ်းဆီးခံခဲ့ရကြောင်းသိရသည်။

“ သူသမီးကို ဓာတ်ပုံရိုက်ပေးဖို့ ဆိုပြီး သူ့အဒေါ်အိမ်မှာ ကင်မရာသွားယူတာ။ စစ်သားတွေက ၂၁၂ တပ် ဈေးနားမှာ စစ်နေတာဆိုတော့ သူက လူငယ်လည်းဖြစ်တော့ ဖမ်းသွားတာ။ သူသမီးလေးကလည်း မွေးလာတာ ၈ ရက်ပဲ ရှိသေးတယ်” ဟု မိခင်ဖြစ်သူက ပြောသည်။

ဆက်လက်ပြီး ကလေးမွေးဖွားစ စိုင်းကောင်ခမ်း၏ အမျိုးသမီး က “ ပြန်တော့လွှတ်လာပြီ။ ရဲစခန်းက ၂ညတောင်ခေါ်စစ်တယ်။ ထမင်းမကျွေးဘူးလားမသိဘူး။ သူနုံးနေတယ်။ အမျိုးသားကို စဖမ်းတော့ ကျမမှာ စိတ်ပူလိုက်တာ။ ကလေးက တဖက်ဆိုတော့ အရူးမလိုပဲ” ဟု သျှမ်းသံတော်ဆင့် ကို ပြောသည်။

ဖေဖော်ဝါရီ ၁ ရက်နေ့မှ စစ်အာဏာသိမ်းပြီးနောက်ပိုင်း တောင်ကြီးမြို့ပေါ်တွင် စစ်ကောင်စီမှ လူငယ်များကို ပစ်မှတ်ထားပြီး အကြောင်းမဲ့ဖမ်းဆီးမှု ပြုလုပ်နေသည်။

လူငယ်များကို ဦးတည်ဖမ်းဆီးရာတွင် ဆယ်ကျော်သက် အသက်မပြည့်သေးသည့် လူငယ်များလည်း ပါဝင်နေသဖြင့် မိဘများက သား၊သမီးများကို စိုးရိမ်နေရကြောင်း၊ အပြင်သွားသည့်အခါ နေအိမ်သို့ ပြန်မရောက်မချင်း စိုးရိမ်မှု ရှိနေကြောင်း လည်း သိရသည်။

“ အခု က လူငယ်ဆိုရင် ဖမ်းနေတဲ့ခေတ်ဖြစ်နေပြီ။ ကလေးတွေ အပြင်သွားရင် စိတ်မချတော့ဘူး။ ကလေးတွေ အပြင်ထွက်တာနဲ့အိမ်ပြန်မရောက်မချင်း စိတ်ကပူရ၊ စိုးရိမ်နေရတယ်။ ဒီလိုစနစ် ပြန်ရောက်လာမယ်လို့မထင်ခဲ့ဘူး” ဟု ဆယ်ကျော်သက်လူငယ်တဦး ၏ မိခင်က ပြောသည်။

အာဏာသိမ်းပြီးနောက်ပိုင်း တောင်ကြီးမြို့ပေါ်တွင် စစ်ကောင်စီမှ ဖမ်းဆီးထားသူ စုစုပေါင်း ၃၀၀ နီးပါးရှိကြောင်း ရှေ့နေများပြောပြချက်အရသိရသည်။