တောင်ကြီးမြို့ အတက်လမ်း အေးသာယာ ထုံးဖို ဂိတ်တွင် ယနေ့ ( မေ ၂၆) ရက် မနက် (၁၀) နာရီဝန်းကျင်တွင် ဆေးခန်းလာပြသည့် အမျိုးသား (၅)ဦးကို စစ်ကောင်စီ က ဖမ်းဆီးခေါ်ဆောင်သွားကြောင်း သတင်းရရှိသည်။
ယနေ့ မနက် (၁၀)နာရီဝန်းကျင်တွင် ညောင်ရွှေမြို့ မှတောင်ကြီးသို့ဆေးခန်းလာပြသည့် လူငယ် အမျိုးသား (၅)ဦးကို စစ်ကောင်းစီ က ဖမ်းဆီးခေါ်ဆောင်သွားကြောင်း မျက်မြင်တွေ့ရှိသူ တဦး က သျှမ်းသံတော်ဆင့်ကို ပြောသည်။
” အဖမ်းခံရတဲ့ ၅ ဦးထဲက တစ်ယောက်ကတောင်ကြီး မှာဆေးခန်းလာပြတာလို့ပြောတယ် လက်မှာလဲ ပတ်တီးစီး ထားတယ်။ ထုံးဖိုဂိတ်မှာ ကားတား ပြီးတော့စစ်တယ်။ ဆေးစာရွက်တွေစစ်တယ်။ ဒူးထောက်ပြီး လက်ကို ခေါင်းပေါ်တင် ခိုင်းထားပြီး သေနတ်နဲ့ ချိန်ထားတယ်၊ စစ်ဆေးပီးတော့တောင်ကြီးဖက်ကိုခေါ်သွားတယ် ဘယ်နေရာ ကိုခေါ်သွားမှန်း မသိဘူး” ဟု မျက်မြင်သက်သေ တဦးက ပြောသည်။
အဆိုပါ စစ်ကောင်စီ မှဖမ်းဆီးခေါ်ဆောင်သွားသူ ၅ ဦးမှာ အသက် (၄၅)နှစ် အရွယ် ကိုမိုးဇော်၊ အသက် (၂၂) နှစ် ရွယ် အောင်ဌေးဦး၊ အသက် (၃၅)နှစ် အရွယ် ကိုတေဇာနိုင် ၊ အသက် (၃၅) အရွယ်ရှိ ကိုရန်နောင် နှင့် ကောင်းသက်စံ အသက် (၂၁)၊တို့ဖြစ်ကြောင်းသိရသည် ။
