သျှမ်းပြည်မြောက်ပိုင်း ကျောက်မဲမြို့ရှိအခြေခံပညာစာသင်ကျောင်းများတွင် အရပ်၀တ်ဖြင့် ကျောင်းဆရာများက ယနေ့ကျောင်းအပ်လက်ခံနေပြီး တပ်မိသားစုအနည်းငယ်သာ ကျောင်းအပ်နေကြောင်းသိရသည်။
စစ်ကောင်စီမှ ကျောင်းအပ်ရန် ကြေငြာထားသော ယနေ့ မေလ ၂၄ ရက်နေ့ နံနက်ပိုင်းကစပြီး ကျောက်မဲမြို့ရှိ စာသင်ကျောင်းများတွင် စစ်ကောင်စီ၏ ရဲနှင့်တပ်သားများက လုံခြုံရေးစောင့်ကြပ်ကာ အရပ်ဝတ်ဖြင့် ဆရာ/ဆရာမများက ကျောင်းအပ် လက်ခံနေကြောင်း ကျောက်မဲဒေသခံများကပြောသည်။
“စစ်ကောင်စီက ဒီကနေ့ မေလ (၂၄) ရက်နေ့မှာ ကျောင်းအပ်လက်ခံနေတဲ့ ကျောက်မဲမြို့ရှိ အခြေခံကျောင်းတွေကို စစ်သား နဲ့ ရဲ အဖွဲ့ စောင့်ကြပ်နေတဲ့ အပြင် ကား (၄) စီးနဲ့ပါ ပတ်နေတာတွေ့ရတယ် ။ မြို့ခံပြည်သူလူထုတော့ ကျောင်းလာမအပ်ကြဘူး ။”- ဟု ကျောက်မဲဒေသခံ ကျောင်းသားမိဘတဉီးကပြောသည်။
CDM မလုပ်သည့် ဆရာ၊ ဆရာမများမှာ ယူနီဖောင်းမဝတ်ဘဲ ကျောင်းအပ်လက်ခံနေကြ ပြီး ကျောင်းအပ်နှံသူနည်းပါးသဖြင့် နံနက် (၁၁) နာရီဝန်းကျင် အချိန်ခန့်တွင်ပင် ကျောင်းတံခါးများ ပိတ်သွားသည် ဟု မြို့ခံများကပြောသည်။
ကျောက်မဲမြို့ပေါ်ရှိကျောင်းများအနက် အမှတ် ၃၅၂ အမြောက်တပ်အနီးရှိ အထက ၃ ( အရပ်အခေါ် စစ်တပ်ကျောင်း )၌ တပ်မိသားစုများသာ ကျောင်းလာအပ်သည်ကို တွေ့ရကြောင်းလည်း ဒေသခံများကပြောပါသည် ။
မေလ ၂၄ မှ ၃၁ ရက်နေ့အထိ ကျောင်းများအပ်နှံကြရန် စစ်ကောင်စီက ကြေငြာထားပြီး လာမည်ဂျွန်လတွင်ကျောင်းပြန်ဖွင့်ပေးမည်ဟု ဆိုပါသည်။
တက္ကသိုလ်များ ကောလိပ်များကိုမူ မေလဆန်းကပင်ဖွင့်လှစ်ကြောင်းကြေငြာထားကြသော်လည်း အလားတူ ကျောင်းသား ကျောင်းသူများ ကျောင်းမတက်ကြကြောင်း သိရပါသည်။
