သျှမ်းပြည်မြောက်ပိုင်း သီပေါမြို့နယ် နမ့်လန်မြို့ အနီး စစ်ရေးတင်းမာမှု ဆက်လက်ရှိနေသဖြင့် စစ်ဘေးရှောင် (၃၀၀၀) ကျော် နေရပ်သို့မပြန်နိုင်သေးကြောင်း စုံစမ်းသိရသည်။
အဆိုပါ စစ်ဘေးရှောင်များသည် ရှမ်းပြည်ပြန်လည်ထူထောင်ရေးကောင်စီ၊ရှမ်းပြည်တပ်မတော် (RCSS/SSA) နှင့် မြောက်ပိုင်း မဟာမိတ်တို့ မေ (၁၉) ရက်က နမ့်လန်မြို့ ဝမ်စိမ်းကျေးရွာ အနီး တိုက်ပွဲ ဖြစ်ပွားခဲ့ပြီး စစ်ရှောင်များ နမ့်လန်မြို့ ထွက်ပြေးလာခဲ့ကြောင်း သတင်းရရှိသည်။
“လက်ရှိ တိုက်ပွဲ တော့ မဖြစ်တော့ဘူး။ နှစ်ဖက် စစ်ရေး တင်းမာတာတွေတော့ ရှိတယ်။ ရွာထဲ စစ်သားတွေရှိသေးတော့ သူတို့ မပြန်ရဲကြသေးဘူး” ဟု စစ်ဘေးရှောင်များကို ကူညီပေးနေသည့် သူတဦး က သျှမ်းသံတော်ဆင့် ကို ပြောသည်။
စစ်ဘေးရှောင်များသည် နမ့်လန်မြို့နယ်အတွင်းရှိ နောင်နိမ်းကျေးရွာ၊ ဝမ်စိမ်းကျေးရွာ၊ ဝမ်လီကျေးရွာ နှင့် စိုင်းယု (ဂိုသောင်) တို့ တွင် ခိုလှုံနေရကြောင်းသိရသည်။
“စားသောက်ရေးပိုင်းကတော့ လုံလောက်ရုံပဲ။ ဒီထက်တိုက်ပွဲကြာသွားရင်တော့ ရှမ်းတိုင်းရင်းသားတွေ ဒုက္ခ ရောက်မှာ ကြောက်တယ်။ ခုက စီးပွားရေးမကောင်းတော့ ရေရှည်အတွက်လည်း စားသောက်ရေးပိုင်း ခက်ခဲလာမယ်” ဟု ဒေသခံ တစ်ဦး က သျှမ်းသံတော်ဆင့် ကိုပြောသည်။
တိုက်ပွဲကြောင့် နမ့်လန်မြို့ ဝမ်စိမ်းကျေးရွာအုပ်စု ဝမ်စိမ်းဘုန်းကြီးကျောင်းသို့ ရောက်ရှိလာသည့် စစ်ရှောင်များသည် ကောင်းခမ်းရွာ၊ ပန်ဆိမ်ရွာ၊ စံကားရွာ၊ ကုံးမုံရွာ၊ ဟိုနမ့်ရွာ၊ ဝမ်တပ်ရွာ၊ ကုံးရုံးရွာ နှင့် ကုံးညုရွာမှ ဒေသခံများဖြစ်ကြောင်း သိရသည်။
တိုင်းရင်းသားအချင်းချင်းဖြစ်ပွားသည့် တိုက်ပွဲရပ်တန့်ပေးရန် လိုအပ်ကြောင်း၊ စိုက်ပျိုးသည့် အချိန်ဖြစ်သဖြင့် လက်နက်ကိုင်များ အချင်းချင်းတွေ့ဆုံဆွေးနွေးပြီး တိုက်ပွဲ အမြန်ရပ်ပေးစေလိုကြောင်း စစ်ဘေးရှောင်များက ပြောဆိုလိုက်သည်။
“တိုက်ပွဲဖြစ်ရင် ပြည်သူတွေက အရမ်းဒုက္ခ ရောက်တယ်။ အလုပ်တွေမလုပ်ရဘဲ ပြေးနေတယ်။ အလုပ်မလုပ်ရတော့ ဘာတွေနဲ့ လာစားသောက်မလဲ” ဟု ဒေသခံ တစ်ဦးက သျှမ်းသံတော်ဆင့် ကိုပြောသည်။
နမ့်လန်မြို့ ဝမ်စိမ်းကျေးရွာအနီးတွင် ယမန်နေ့ မေ (၁၉) ရက် မနက် (၅) နာရီမှ စတင်ကာ RCSS/SSA နှင့် SSPP/SSA တို့ တိုက်ပွဲဖြစ်ပွားခဲ့ပြီး ယနေ့ချိန်ထိ စစ်ရေးတင်းမာနေကြောင်း သိရသည်။
Leave a Comments