အာဏာသိမ်းစစ်ကောင်စီ လက်အောက်ခံ ရွေးကောက်ပွဲ ကော်မရှင် နှင့် နိုင်ငံရေးပါတီများ တွေ့ဆုံညိနှိုင်း အစည်းအဝေးကို SNLD ပါတီ မှ တက်ရောက်မည် မဟုတ်ကြောင်း သတင်းရရှိသည်။

လာမည့် မေ ၂၁ရက်တွင် အာဏာသိမ်း စစ်ကောင်စီ လက်အောက်ခံရွေးကောက်ပွဲ ကော်မရှင် နှင့် နိုင်ငံရေးပါတီများ နေပြည်တော်တွင် တွေ့ဆုံရန် ဖိတ်ကြားထားကြောင်း၊ ရှမ်းတိုင်းရင်းသားများ ဒီမိုကရေစီအဖွဲ့ချုပ်(SNLD)ပါတီထံလည်း ဖိတ်ကြား ထားကြောင်း သိရသည်။

ထိုကိစ္စနှင့်ပတ်သက်ပြီး SNLD ပြောရေးဆိုခွင့်ရှိသူ စိုင်းလိတ် က “ ကျနော်တို့ကတော့ မတက်ဘူး။ ကျနော်တို့ ပါတီမူဝါဒ၊ နိုင်ငံရေးရည်မှန်းချက်နဲ့ ဒီစစ်ကောင်စီ လုပ်နေကိစ္စတွေက သဟဇာတမဖြစ်ဘူး။ လမ်းကြောင်းမတူဘူး။ အဲဒါကြောင့် ကျနော်တို့ ငြင်းဆန်းရခြင်းဖြစ်ပါတယ်” ဟု သျှမ်းသံတော်ဆင့်ကို ပြောသည်။

အာဏာသိမ်း စစ်ကောင်စီ သည် တနှစ်အတွင်း ရွေးကောက်ပွဲပြန်လုပ်မည်ဟု ထုတ်ပြန်ကြေညာခဲ့ သော်လည်း လက်ရှိ အနေအထားအရ SNLD ပါတီ မှ စဉ်းစားထားခြင်း မရှိကြောင်းလည်း စိုင်းလိတ် က ပြောသည်။

“ စစ်ကောင်စီအနေနဲ့ နိုင်ငံတော်ရဲ့ အခြေနေကိုဘယ်လောက်ထိ ဆက်လက်ထိန်းသိမ်းသွားမလဲ။ ကိုင်သွယ်သွား နိုင်မလဲဆိုတဲ့ အခြေအနေပေါ်မှာအများကြီးမူတည်ပါတယ်။ ဘယ်နေ့မှန်းမသိတဲ့ ရွေးကောက်ပွဲကို အခုကတည်းက ကြိုတင်းပြီး မစဉ်းစားထားပါဘူး” ဟု စိုင်းလိတ်က ပြောသည်။

SNLD ပါတီ အနေဖြင့် ယနေ့ ထိ ၂၀၂၀ ရွေးကောက်ပွဲကိုသာ အသိမှတ်ပြု ထားကြောင်း စိုင်းလိတ်က ထပ်လောင်းပြောသည်။

ပြီးခဲ့သည့် ဖေဖော်ဝါရီ လတွင် ပြုလုပ်သည့် စစ်ကောင်စီ လက်အောက်ခံ ရွေးကောက်ပွဲ ကော်မရှင် အစည်းအဝေး ကိုလည်း SNLD ပါတီ အနေဖြင့် တက်ရောက်ခဲ့ခြင်းမရှိခဲ့ပေ။

စစ်ကောင်စီ အာဏာသိမ်းပြီးနောက် ထွက်ပေါ်လာသည့် အမျိုးသားညီးညွတ်ရေး အစိုးရ NUG တွင်လည်း ရှမ်းတိုင်းရင်းသားများဒီမိုကရေစီအဖွဲ့ချုပ် SNLD အနေဖြင့် ပါဝင်ထားခြင်းမရှိကြောင်းသိရသည်။