သျှမ်းပြည်တောင်ပိုင်း ပင်းတယမြို့ ပြည်သူများ စစ်အာဏာရှင်ကို ဆန့်ကျင်ဆန္ဒမပြနိုင်အောင် စစ်ကောင်စီမှ နည်းမျိုးစုံ ခြိမ်းခြောက်နေကြောင်း စုံးစမ်းသိရှိရသည်။
ပင်းတယမြို့ ယနေ့ မေ ၁၈ ရက်နေ့တွင် လူငယ် ၅ ဦး ဆန္ဒပြရာတွင် ရဲတပ်ဖွဲ့ဝင်များက အရပ်သားဝတ်ဖြင့် ပြည်သူများကို ဆန္ဒမပြရန် ဆက်ပြနေပါက ဖမ်းဆီးမည်ဟု ခြိမ်းခြောက်ပြောဆိုလျက်ရှိကြောင်း ဒေသခံတစ်ဦး ကပြောသည်။
“ ကျနော်တို့ ဒီနေ့ ဆန္ဒပြတဲ့ ၅ယောက်ကို ရဲတွေက အိမ်စီးကား အရပ်ဝတ်နဲ့ ကျနောတို့ကို ဆန္ဒမပြနဲ့။ ဆန္ဒပြရင် ဖမ်းမယ်ဆိုပြီးပြောသွားတယ်။ ဒလန်တွေတိုင်လို့ ကျနော်တို့ ဆန္ဒပြတဲ့နေရာနဲ့ အချိန်တိကျ ရဲတွေကရောက်လာတယ်” ဟု ပင်းတယမြို့ ဒေသခံတစ်ဦး က သျှမ်းသံတော်ဆင့်ကိုပြောသည်။
ပင်းတယ ပြည်သူများအနေဖြင့် စစ်အာဏာရှင်စနစ် အလိုမရှိကြောင်းဆက်လက်ဆန္ဒထုတ်ဖော်သွားမည် ဖြစ်ကြောင်း သိရသည်။
“ ဒီမှာက ဆန္ဒမပြဖြစ်တာကတော့ကြာပြီ။ မနေ့ကမှ ကျနော်တို့ပြန်ထွက်တာ။ ဟိုအရင်တွေကတော့ ဆိုင်ကယ်သပိတ်တို့ တော့လုပ်ပါတယ်။ ပင်းတယလူငယ်တွေခြိမ်းခြောက်ခံရတာ ခုမှမဟုတ်ပါဘူး။ ဆန္ဒစပြကတည်းက ခြိမ်းခြောက်ခံနေရတာပါ” ဟု ပင်းတယ လူငယ်တဦး ကပြောသည်။
သျှမ်းပြည်အတွင်းရှိ မြို့နယ်များတွင် စစ်ကောင်စီအုပ်စုက စစ်အာဏာရှင် အလိုမရှိ ဆန္ဒပြမရအောင် နည်းမျိုးစုံ ဖိနှိပ်နေကြောင်း၊ လမ်းများတွင်လည်း အရပ်ဝတ်ရဲ၊စစ်သားများဖြင့် စောင့်ဆိုင်းနေကြောင်း သိရသည်။
“ ကျနော်တို့ ဆန္ဒပြဖို့က ခက်တယ်ဆိုပေမယ့် ကျနော်တို့ရင်ထဲမှာတော့ စစ်အာဏာရှင်ကို လုံးဝအလိုမရှိဘူး။ မအုပ်ချုပ်စေရဘူး။ ရရာနည်းလမ်းနဲ့ တိုက်ခိုက်သွားမည်။” ဟု ဟိုးပုံမြို့ ဒေသခံတစ်ဦးကပြောသည်။
သျှမ်းပြည်တောင်ပိုင်းတွင် စစ်အာဏာရှင် ဆန့်ကျင်ဆန္ဒပြရန်အတွက် လမ်းပေါ်မထွက်နိုင်သော်လည်း လူမဲ့သပိတ်မျိုးစုံဖြင့် ဆက်လက်ဆန္ဒပြနေကြောင်း သိရသည်။
ဖေဖော်ဝါရီ ၁ ရက်နေ့မှ စစ်အာဏာလုယူပြီး တစ်နိုင်ငံလုံးဆန္ဒပြခဲ့ရာတွင် စစ်ကောင်စီဖက်မှ အကြမ်းဖက် ဖြိုခွင်း၊သတ်ဖျတ်၊ နေအိမ်ထိ လိုက်လံဖမ်းဆီးမှုများပြုလုပ်ခဲ့သောကြောင့် ပြည်သူများဆန္ဒပြရာတွင် အခက်ခဲများစွာရှိနေကြောင်းသိရသည်။
Leave a Comments