သျှမ်းပြည်မြောက်ပိုင်း မူဆယ်မြို့ ဘက်မှ တင်ဆောင်လာသည့် စစ်ကောင်စီ အုပ်စု၏ စက်သုံးဆီ ယာဉ် (၇)စီးကို ကချင်လွတ်လပ်ရေးတပ်မတော် (KIA) မှ လက်နက်ကြီးဖြစ် ပစ်ခတ်လိုက်ကြောင်း သတင်းရရှိသည်။
ယနေ့ မနက် (၇)နာရီ ဝန်းကျင်တွင် သျှမ်းမြောက် ကွတ်ခိုင် နမ့်ပါချီး ကျေးရွာအနီး ရှိ ပြည်ထောင်စု လမ်းမပေါ်တွင် စစ်ကောင်စီ အုပ်စု၏ စက်သုံးဆီ ကားတစ်ဦးကို KIA မှ လက်နက်ကြီး ပစ်ခတ်ခဲ့ပြီး၊ ယမန်နေ့ (မေ ၁၇)ရက် ညနေပိုင်းတွင် ကွတ်ခိုင်- သိန္နီကြားတွင်လည်း စက်သုံးစီးကား (၆)စီး လက်နက်ကြီးဖြင့် ပစ်ခတ်ခဲ့ကြောင်း KIA ပြောရေးဆိုခွင့်ရှိသူ ဗိုလ်မှူးကြီးနော်ဘူ က သျှမ်းသံတော်ဆင့်ကို အတည်ပြု ပြောသည်။
“ မူဆယ်ကနေ ဆီးသယ်လာတဲ့ စစ်ကောင်စီရဲ့ ဆီဘောက်ဆာ ကားကို ကျနော်တို့ (၇)စီး ပစ်လိုက်တယ်။ မနေ့ ညနေ က ကွတ်ခိုင်-သိန္နီကြား (၆)စီး ၊ ဒီနေ့ မနက် ကွတ်ခိုင်မြို့ နားမှာ (၁)စီး ပါ။” ဗိုလ်မှူးကြီးနော်ဘူ က ဆိုသည်။
အဆိုပါဆီများသည် တရုတ်ပြည်မှ တင်သွင်းလာပြီး မူဆယ်မြို့မှတဆင့် ပြန်လည်တင်ဆောင်လာသည့် ဆီဘောက်ဆာကားများဖြစ်ကြောင်း၊ ထိုဆီဘောက်ဆာကားများသည် စစ်ကောင်စီ ၏ စက်သုံးဆီကားများ ဖြစ်သည့်အတွက် ပစ်ခတ်လိုက်ခြင်းဖြစ်ကြောင်း လည်း ဗိုလ်မှူးကြီးနော်ဘူ က ပြောသည်။
“ စစ်ကောင်စီ ရဲ့ ဆီကားတွေဖြစ်လို့ ပစ်တာပါ။ ပြည်သူတွေ အတွက် အသုံးပြုမယ်ဆိုရင် ကျနော်တို့ မပစ်ဘူး။ စီးပွားရေး သမားတွေရဲ့ ဆီကားဆိုရင်လည်းကျနော်တို့မပစ်ဘူး။ စစ်ကောင်စီရဲ့ ဆီဘောက်ဆာ ကားသေချာလို့ပစ်လိုက်တာပါ” ဟု ဗိုလ်မှူးကြီး က ထပ်လောင်း ပြောသည်။
ထိုဆီဘောက်ဆာကားများကို KIA မှ လက်နက်ကြီးဖြင့် ပစ်ခတ်လိုက်ပြီးနောက် KIA နှင့် စစ်ကောင်စီအုပ်စုသည် တိုက်ပွဲ ဖြစ်ပွားခဲ့သေးကြောင်းလည်း ကွတ်ခိုင် ဒေသခံများ ပြောပြချက် အရသိရသည်။
“ ဆီကား ပစ်ခံရပြီး မီးလောင်သွားတယ်။ အဲ့နောက်မှာ KIA နဲ့ စစ်တပ် တိုက်ပွဲတွေဖြစ်သေးတယ်။ ခဏလေးပါပဲ” ဟု ကွတ်ခိုင်ဒေသခံ တဦး က ဆိုသည်။
အဆိုပါ ဆီဘောက်ဆာ ကား သည် စစ်ကောင်စီ ၏ ရဟတ်ယာဉ်တွင် ထည့်သွင်းအသုံးပြုရန် အတွက် ဝယ်ယူလာသည့် စက်သုံးဆီဖြစ်ကြောင်းလည်း သိရသည်။
Leave a Comments