သျှမ်းပြည်အရှေ့ပိုင်း တာချီလိတ်မြို့နယ် ဟောင်လိတ် ရပ်ကွက် ဝမ်းဟောင်ရွာ ရှိ ပြည်သူပိုင် လယ်ယာမြေများကို ဟုန်ပန်း ကုမ္ပဏီ ကခြံစည်းရိုးခတ် သိမ်းယူေနကြောင်း သတင်းရရှိသည်။

ဧပြီ ၉ ရက်တွင် ဟုန်ပန်းကုမ္ပဏီသည် စစ်ကောင်စီ အုပ်စုဖြစ်သည့် ရဲတပ်ဖွဲ့ကို အကာအကွယ်ယူပြီး တာချီလိတ် ပြည်သူများ ပိုင်ဆိုင်ပြီး သီးနှံစိုက်ပျိုးသည့်မြေပေါ် ခြံစည်းရိုးလာခတ်ကြောင်း သိရသည်။

ထိုမြေသည် ၁၉၉၈-၁၉၉၉ ခုနစ် စစ်အစိုးရ လက်ထက်တွင် အတင်းအဓမ္မသိမ်းယူပြီး ထိုထဲမှ ဧက (၁၀၀) ကို ဟုန်ပန်းကုမ္ပဏီအားပေးခဲ့ပြီး၊ ဟုန်ပန်းကုမ္ပဏီမှ ဧက (၂၀)ကိုသာ ပလပ်စတစ် စက်ရုံတည်ဆောက်ခဲ့သည်။

ကျန် ဧက (၈၀)ပေါ်တွင် လယ်သမားများက သီးနှံစိုက်ပျိုးခဲ့ပြီး ၂၀၁၈ ခုနစ်တွင် သိမ်းဆည်းထားသည့် လယ်ယာမြေများ အသုံးပြုခြင်းမရှိပါက မူရင်း လယ်ယာမြေပိုင်ရှင်ကိုပြန်ပေးရန် သျှမ်းပြည်အစိုးရ ဝန်ကြီးချုပ် ဒေါက်တာလင်းထွဋ်က ပြောဆိုခဲ့သည်။

ထို့ပြင် ထိုလယ်ယာမြေ ကိစ္စနှင့်လည်း တရားရင်ဆိုင်ခဲ့ရပြီး ယခုနှစ် ဧပြီ (၈)ရက်တွင် လယ်ယာမြေ ပိုင်ရှင်များ တရားနိုင်ခဲ့သော်လည်း ဟုန်ပန်းကုမ္ပဏီသည် စစ်ကောင်စီအုပ်စုနှင့် ပူးပေါင်းပြီး အတင်းအဓမ္မထပ်မံလာရောက်သိမ်းယူ ခြံထပ်မံလာခတ်ကြောင်း လယ်ယာမြေပိုင်ရှင်များက ပြောဆိုသည်။

“ ဒီမြေနေရာကို ကျနော်တို့ တရားရင်ဆိုင်ပြီး ကျနော်တို့တွေ အနိုင်ရခဲ့ပြီ။ ဒါကြောင့် ခြံစည်းရိုးကို ကျနော်တို့ သွားဖျက်တယ်။ သီးနှံပြန်စိုက်မယ်ပေါ့။ ကုမ္ပဏီက ရဲတွေခေါ်ပြီး ကျနော်တို့ကို ခြိမ်းခြောက်ပြန် ခြံပြန်ခတ်တယ်။ အဓမ္မခြံစည်းရိုးပြန်လာခတ်တယ်” ဟု ဟောင်လိတ်ကျေးရွာမှ လယ်ပိုင်ရှင် တဦးက သျှမ်းသံတော်ဆင့်ကိုပြောသည်။

ထိုဟုန်ပန်းကုမ္ပဏီ တွင် လယ်မြေနှင့် ပတ်သက်ပြီး သက်သေ အထောက်အထား စာရွက်တစုံတရာမပြနိုင်ဘဲ ခြံလာခတ်ကြောင်း၊ ခြံခတ်ထားသည့် ပုံများကိုလည်း ဓာတ်ပုံပေးမရိုက်ကြောင်း မျက်မြင် တွေ့ရှိသည့် ဦးဇင်း တပါးက သျှမ်းသံတော်ဆင့် ကို မိန့်ကြားသည်။

“ သူတို့ ကုမ္ပဏီက အတင်းအဓမ္မသိမ်းပြီး ခြံခတ်တယ်။ နောက် ရဲတွေနဲ့ပူးပေါင်းပြီး ပြည်သူတွေကိုခြိမ်းခြောက်တယ်။ ပြည်သူတွေ ပစ္စည်းကို မတရားယူချင်တာပါပဲ” ဟု ဦးဇင်း က မိန့်သည်။

စစ်အာဏာသိမ်းပြီးနောက် ပြည်သူပိုင်ဆိုင်သည့် လယ်ယာမြေများလည်း စစ်ကောင်စီ အစိုးရမှ မတရားသိမ်းယူမှုများ ဆက်လက်ဖြစ်လာနိုင်ကြောင်း၊ စစ်ကောင်စီ နှင့် ကုမ္ပဏီများပူးပေါင်းကာ ပြည်သူများပိုင်ဆိုင်သည့် လယ်ယာမြေကိုသိမ်းယူမည့် အမှု ပိုများလာနိုင်သည် ဟု လည်း လယ်ယာမြေပိုင်ရှင်များက စိုးရိမ်နေကြသည်။