သျှမ်းပြည်တွင်းရှိ လိုင်စင်မဲ့ မော်တော်ယာဉ်များကို စစ်ကောင်စီ အစိုးရမှ စစ်ဆေး ဖမ်းဆီးနေကြောင်း စုံစမ်းသိရှိရသည်။
အဆိုပါ ဖမ်းဆီး စစ်ဆေးရခြင်းသည် အထက်အမိန့်အရ ဖမ်းဆီးစစ်ဆေးကြောင်း ဖမ်းဆီးစစ်ဆေးခံထားရသည့် သူ တစ်ဦးက သျှမ်းသံတော်ဆင့် ကိုပြောသည်။
“လိုင်စင်မရှိတဲ့ကားတွေ ယာဉ်မောင်းလိုင်စင်တွေကို အထက်အမိန့်အရ စစ်တယ်လို့ ပြောတယ်။ ဖြစ်နိုင်ရင် ယာဉ်မောင်းလိုင်စင် ကားလိုင်စင်ရှိရမယ်။ နောက်ပိုင်း ဘာမှ မရှိရင် တကယ်ယူမယ်လို့တော့ ပြောတယ်။ ပြည်သူကော သံယာတော်တွေကော မထားတော့ဘူးလို့တော့ ပြောတယ်” ဟု စစ်ဆေးခံထားရသည့် ကားသမား တစ်ဦး က သျှမ်းသံတော်ဆင့် ကိုပြောသည်။
စစ်ကောင်စီမှ မြန်မာနိုင်ငံကို အုပ်ချုပ်သည့် ရက် (၁၀၀) အတွင်း ထိုင်းနိုင်ငံမှ ကုန်ပစည်းတင်သွင်းခွင့် တားပိတ်ခြင်း၊ ဆိုင်ကယ်တင်သွင်းခွင့်ကို ပိတ်ပင်ထားခြင်း ဆိုင်ကယ်ရောင်းသည့် ဆိုင်များကို ဝင်ရောက်စစ်ဆေးခြင်းများ ပြုလုပ်သည်ကို တွေ့ရသည်။
ယနေ့ မေ (၁၂) ရက်တွင် သျှမ်းပြည်အရှေ့ပိုင်းရှိ မြို့နယ်အချို့ လိုင်စင်မဲ့ကားများ တင်သွင်းရောင်းချမှုရှိ မရှိ စတင်စစ်ဆေးမှုများ ပြုလုပ်မည်ဖြစ်ပြီး ကားအရောင်း (Showroom) များကိုလည်း ရှောင်တခင်စစ်ဆေးမှုများ ဝင်ရောက် စစ်ဆေးမည်ဖြစ်ကြောင်း ကျိုင်းတုံ ဒေသခံ တစ်ဦးထံမှ သိရသည်။
“တောင်ကြီး ၄ မိုင်အထွက်မှာလည်း ဒီနေ့မနက် (၆) နာရီလောက်က လိုင်စင်မဲ့ကားတွေ ဖမ်းနေတာ တွေ့ရတယ်။” ဟု တောင်ကြီး ဒေသခံ တစ်ဦး က သျှမ်းသံတော်ဆင့် ကိုပြောသည်။
စစ်ကောင်စီ အာဏာသိမ်းကာစတွင်လည်း တောင်ကြီး (၄)မိုင်ရှိ မြို့အဝင်အထွက်များကို စစ်သားများ ရဲများမှ ကားများ မော်တော်ဆိုင်ကယ်များ တားဆီးစစ်ဆေးနေသည်ကိုလည်းတွေ့ရကြောင်း ကားဆရာများက ပြောသည်။
“နေရပ်လိပ်စာတွေ၊ဖုန်းနံပတ်တွေ မှတ်ပုံတင်နံပတ်တွေ တောင်းတယ်။” ဟု အငှားကား ယာဉ်မောင်း တစ်ဦး ကပြောသည်။
သျှမ်းပြည်တွင် လိုင်စင်မဲ့ကားများကို အသေးစား စီးပွားရေးတစ်ခုအနေဖြင့် အရောင်းအဝယ်ပြုလုပ်ကြသည်ကို တွေ့ရပြီး အဆိုပါကားများကို ထိုင်း – မြန်မာ ကရင်ပြည်နယ် မြဝတီမြို့မှ တစ်ဆင့် တင်သွင်းလာကြောင်း ကားပွဲစားများထံမှ စုံစမ်းသိရှိရသည်။
ယခင်အစိုးရ လက်ထက်တွင် လိုင်စင်မဲ့ကားများကို ဖမ်းနေသော်လည်း ယာဉ်ထိန်းရဲများသာ ဖမ်းဆီး စစ်ဆေးပြီး ယခုစစ်ကောင်စီအစိုးရသည် လိုင်စင်မဲ့ကားများကို စစ်ဆေးရာမှာ စစ်သားများပါဝင်နေကြောင်းလည်း ပြည်သူများက ပြောဆိုကြသည်။
