သျှမ်းပြည် တောင်ပိုင်း တောင်ကြီးမြို့ အနောက်မြို့ပတ်လမ်း (၂၁၂ တပ်) အနီး၌ ယမန့်နေ့ ( မေ ၆ )ရက် မနက်ပိုင်း တွင် စစ်ကောင်စီမှ လူငယ် ၃ ဦးကို အကြောင်းမဲ့ ဖမ်းဆီးခေါ်ဆောင်သွားခဲ့ကြောင်း စုံစမ်းသိရှိရသည်။
“ လူငယ် ၃ဦးကို မနေ့က မနက်ပိုင်း ဖမ်းသွားတာ။ ၂၁၂ စစ်တပ် ရဲ့ အပေါ်ဘက် နားမှာ ဖမ်းသွားတာ။ ဘယ်နေရာကိုဖမ်းခေါ်သွားလဲဆိုတာ တော့မသိရသေးဘူး” ဟု တောင်ကြီးမြို့ ဒေသခံတစ်ဦးကပြောသည်။
ယမန်နေ့ ဖမ်းဆီးခံရသည့် လူငယ် (၃)ဦးသည် မည်သည့်အကြောင်းကြောင့် ဖမ်းဆီးခေါ်ဆောင်သွားသည် ကို မသိရှိရကြောင်း၊ လက်ရှိမှာ လည်း မည်သည့်နေရာတွင် ထားရှိသည်ကို မသိရှိကြောင်း၊ ထိုဖမ်းခံရသူ (၃)ဦး အကြောင်းကို လိုက်လံစုံစမ်းနေရကြောင်းလည်း တောင်ကြီး လူငယ်များက ပြောသည်။
ယခုနောက်ပိုင်းတောင်ကြီးမြို့ တွင် လုံခြုံရေးအရ တင်းကြပ်လာသဖြင့် စစ်အာဏာရှင်ဆန့်ကျင်သည့် လှုပ်ရှားမှုကို လမ်းပေါ်ထွက် လုပ်ဆောင်ရန် ခက်ခဲလာပြီး၊ စစ်ကောင်စီ အုပ်စုသည် လမ်းသွား၊လမ်းလာများ၏ ဖုန်းကို ယူစစ်ဆေးမှုများပြုလုပ်နေကြသည်။
“ အဖမ်းအဆီးတွေ က များလာတယ်။ ဘယ်နေ့ ကိုယ်ကို လာဖမ်းမယ်မသိဘူး။ ဒါကြောင့် လူငယ်တွေ အိမ်မှာ မနေရဲဘူး။ ထွက်ပြေးနေရတာ ၁လခွဲရှိပြီ။ လူငယ်တွေ အဖမ်းအဆီးကလည်း ကြားရတယ်။ စာရင်းသေချာ ကောက်မရဖြစ်နေတယ်” ဟု လက်ရှိထွက်ပြေးတိမ်းရှောင်နေရသည့် တောင်ကြီး လူငယ်တဦး ကပြောသည်။
စစ်အာဏာသိမ်းပြီးနောက်ပိုင်း တောင်ကြီးမြို့တွင် ဖမ်းဆီးခံရသည့် ပြည်သူ (၅၆ )ဦး ရှိပြီး၊ စစ်ကောင်စီ လက်နက်ဖြင့် သေဆုံးသူ (၆)ဦး ရှိကြောင်း သိရသည်။
ယခုနောက်ပိုင်းတွင် အကြမ်းဖက်စစ်ကောင်စီမှ အရပ်ဝတ်ဖြင့် ပြည်သူများ နေအိမ် အထိ အကြောင်းမဲ့ လိုက်လံဖမ်းဆီးခြင်း၊ ကားတိုက်ပြီး ဖမ်းဆီးခြင်း တို့ကိုပြုလုပ်ကြောင်း သိရသည်။
စစ်အာဏာဆန်ကျင်သူများ၊ နာမည်ကြီးပုဂ္ဂိုလ်များ၊ အနုပညာရှင်များ တို့ကို ရာဇသတ်ပုဒ်မ ၅၀၅ ကဖြင့် ဖမ်းဝရမ်းထုတ်ပြီး အပြစ်မဲ့ ပြည်သူများကို အကြောင်းမဲ့ဖမ်းဆီးနေကြောင်း သိရသည်။
Leave a Comments