သျှမ်းရှေ့ တာချီလိတ်မြို့ တွင် အကြမ်းဖက်စစ်ကောင်စီမှ ဖမ်းဝရမ်းထုတ်ခံထားရသူ (၃၀၀)ကျော် ရှိကြောင်း စုံစမ်းသိရသည်။
စစ်အာဏာသိမ်းပြီးနောက် တာချီလိတ်ပြည်သူများသည် စစ်အာဏာရှင် အလိုမရှိကြောင်း နေ့စဉ်နဲ့အမျှ နည်းမျိုးစုံ ဆန္ဒထုတ်ဖော်ခဲ့ကြရာ၊ ထိုဆန္ဒထုတ်ဖော်သူများထဲမှ ဖမ်းဝရမ်းထုတ်ခံရသူ (၃၀၀)ကျော်ရှိကြောင်း တာချီလိတ်ဒေသခံပြောပြချက် အရသိရသည်။
ထိုဖမ်းဝရမ်းထုတ်ခံရသူများထဲမှ ရှမ်းတိုင်းရင်းသားများ ဒီမိုကရေစီ အဖွဲ့ချုပ် မှ ၂၀၂၀ ရွေးကောက်ပွဲတွင် ဝင်ရောက်ယှဉ်ပြိုင်ခဲ့သည့် တာချီလိတ်ကိုယ်စားလှယ်လောင်း နန်းပင်းတစ် တဦးပါဝင်ပြီး၊ တာချီလိတ် အခြေစိုက် သတင်းဌာနမှ သတင်းထောက်များလည်း ပါဝင်နေကြောင်း သိရသည်။
“ တာချီလိတ်မှာက ဖမ်းဝရမ်းမထုတ်ခံရဘဲ လိုက်ဖမ်းနေတာပေါ့။ ၃၀၀ကျော်လောက်တော့ရှိတယ်။ ဆန္ဒပြတဲ့ပြည်သူတွေကို လိုက်ဖမ်းတယ်။ တာချီလိတ်မှာ အခုက ပြောက်ကျားစနစ်နဲ့ပဲ ဆန္ဒထုတ်ဖော်ကြတယ်” ဟု နန်းပင်းတစ်က ပြောသည်။
လက်ရှိမှာ နန်းပင်းတစ်သည်လည်း ၅၀၅(က) ဖြင့် ဖမ်းဝရမ်းထုတ်ခံထားရသူ တစ်ဦးဖြစ်ပြီး၊ သူမကို ဖမ်းဝရမ်း မထုတ်ခင်းကတည်းက အကြမ်းဖက် စစ်ကောင်စီမှ နေ့စဉ်နဲ့ အမျှ သူမ၏ နေအိမ်ကို လာရောက်ရှာဖွေနေကြောင်း သိရသည်။
တာချီလိတ်မြို့တွင် ဖမ်းဝရမ်းထုတ်ခံထားရသူ ၃ ဦးရှိပြီး ဖမ်းဝရမ်းမထုတ်ခံထားရသောသူ ၃၀၀ ကျော်ကို လက်ရှိအချိန်တွင် လိုက်လံဖမ်းဆီးနေကြောင်းသိရသည်။
“ သူတို့လိုက်ဖမ်းဖို့ နာမည်မထုတ်ဖော်သေးခင်က ကျမကို အိမ်မှာ ခဏခဏ လာရှာတယ်။ ကျမကို မတွေ့တော့ သူတို့ ရုပ်သံကနေ ၅၀၅(က) နဲ့ ဖမ်းဝရမ်းထုတ်လိုက်တာ” ဟု နန်းပင်းတစ် က ပြောသည်။
လက်ရှိအချိန်ထိ မြန်မာနိုင်ငံတစ်ဝှမ်းတွင် စစ်အာဏာရှင် အလိုမရှိကြောင်း ဆန့်ကျင်ဆန္ဒပြသူများထဲမှ အနုပညာရှင်များ၊ နိုင်ငံရေး လှုပ်ရှားသူများ၊ လူငယ်များနှင့် သတင်းသမားများကို ၅၀၅(က) ဖြင့် ဖမ်းဝရမ်းထုတ်ပြီး လိုက်လံ ဖမ်းဆီးနေကြောင်းသိရသည်။
ဧပြီ (၂၀)ရက်အထိ အကြမ်းဖက်စစ်ကောင်စီ ၏ လက်ချက်တွင် အသက်သေဆုံးခဲ့သည့် (၇၃၈)ဦးရှိပြီး၊ ဖမ်းဆီးခံရသူ (၃၂၀၀)ကျော်ရှိသွားပြီဖြစ်ကြောင်း နိုင်ငံရေး အကျဉ်းသားများ ကူညီစောင့်ရှောက်ရေး အသင်း (AAPP) က စာရင်းထုတ်ပြန်ခဲ့သည်။
စစ်အာဏာသိမ်းပြီးနောက် စစ်ကောင်စီမှ အင်တာနက်ဖြတ်တောက်ခြင်း၊ PSI စလောင်းများကို ဖျက်သိမ်းခြင်း တို့ကို ပြုလုပ်ကာ သတင်းမှန်များကို အမှောင်ချခဲ့သည်။
Leave a Comments