သျှမ်းပြည်တောင်ပိုင်း အောင်ပန်းမြို့တွင် အကြမ်းဖက် စစ်ကောင်စီအဖွဲ့မှ အမျိုးသမီးတစ်ဦးကို ဖမ်းဆီးခေါ်ဆောင်သွားကြောင်း စုံစမ်းသိရသည်။
ယမန်နေ့ည ၁၁ နာရီဝန်းကျင်ခန့်တွင် စစ်ကား(၅) စီးဖြင့် အောင်ပန်းမြို့ရှိ ညောင်ပင်ထောင်ရပ်ကွက်နေ ဒေါ်မာမာမြင့် ဆိုသူအား ၎င်း နေအိမ်တွင် လာရောက်ဖမ်းဆီးသွားကြောင်း အောင်ပန်းဒေသခံများ ပြောပြချက်အရသိရသည်။
“မနေ့ ည က စစ်ကား (၅)စီးနဲ့ လာကြတယ်။ သူအိမ်မှာပဲနေတော့ အတင်းအကြပ်ပဲ ခေါ်သွားတယ်။ ခုနောက်ပိုင်း အောင်ပန်းမှာ အဲ့လိုတွေ ကြမ်းနေကြတယ်။ တခြားရပ်ကွက်တွေလည်း အတိအကျသာ မသိကြတာ ဝင်ဆွဲတာ ရှိတယ်” အောင်ပန်းဒေသခံ တစ်ဦး ကသျှမ်းသံတော်ဆင့် ကိုပြောသည်။
အောင်ပန်းမြို့တွင် အကြမ်းဖက် စစ်တပ်မှ သပိတ်စစ်ကြောင်းများကို အကြမ်းဖက်ဖြိုခွင်းခြင်း၊သေနတ်ပစ်ဖောက်ခြင်း၊ သပိတ်ခေါင်းဆောင်များ လိုက်လံ ဖမ်းဆီးခြင်း ၊ ကျောင်းသားများ ဖမ်းဆီးခြင်းများ ပြုလုပ်ခဲ့သည့်အတွက် သပိတ်စစ်ကြောင်းများ မထွက်ဖြစ်ကြောင်း လည်း အောင်ပန်း ဒေသခံများ က ပြောသည်။
“ဆန္ဒပြလို့မရဘူး။ လူစုတာနဲ့ သူတို့ ရောက်လာပြီ။ ပြောက်ကျားတို့ လူမဲ့သပိတ်တို့တော့ လုပ်ဖြစ်တယ်။”ဟု ဒေသခံ တစ်ဦး ကပြောသည်။
မတ်လ (၁၉) ရက်တွင် စစ်အာဏာရှင် ဆန့်ကျင်သည့် လူထုသပိတ် စစ်ကြောင်းကို အကြမ်းဖက်စစ်ကောင်စီမှ သေနတ်ပစ်ခတ်ဖြိုခွင်းခဲ့သဖြင့် အရပ်သား (၉) ဦးထက်မနည်း သေဆုံးခဲ့ကြောင်း သိရသည်။
ဖေဖော်ဝါရီ ၁ ရက်နေ့မှ စစ်အာဏာသိမ်းပြီးနောက်ပိုင်း စစ်ကောင်စီမှ သတ်ဖြတ်မှုကြောင့် သေဆုံးခဲ့သူ (၇၃၀) ကျော် ရှိပြီဖြစ်ကြောင်း AAPP မှ ထုတ်ပြန်ထားသည်။
Leave a Comments