တရုတ်ပို့မည့်နွားတင်ကားများ ကျောက်မဲမြို့နယ်အတွင်း ပတ်ခတ်ခံရ

0

သျှမ်းပြည်နယ် မြောက်ပိုင်း၊ ကျောက်မဲမြို့နယ်တွင် နွားများ တင်ဆောင်လာသည့် ကားများအား အမည်မသိ လက်နက်ကိုင် အဖွဲ့ မှ ပစ်ခတ်သဖြင့် ကားဆရာ ၂ ဦး ဒဏ်ရာ ရရှိကြောင်း သတင်းရရှိသည်။

ဇွန်လ ၁၁ ရက် မနက် ၁ နာရီ ခွဲ ဝန်းကျင်က ကျောက်မဲမြို့နယ် နှင့် နားအိုက်ခန့်ကျေးရွာ အနီးရှိ ရင်ခွဲတောင်တွင် တရုတ်ပြည်သို့တင်ပို့မည့် နွားများတင်လာသည့် ၁၂ ဘီးကားကြီး ၅ စီး ခေတ္တ ရပ်နားစဉ် ရင်ခွဲတောင်ပေါ်မှ အမည်မသိ လက်နက်ကိုင်အဖွဲ့တဖွဲ့က ပစ်ခတ်ရာ ယာဉ်မောင်း နှင့် ယာဉ်နောက်လိုက် နွားထိန်းသူတို့ ထိခိုက်ဒဏ်ရာရရှိကြောင်း ကျောက်မဲမြို့နယ် ဇီဝိတဒါန လူမှု ကူညီရေး အသင်း ဥက္ကဌ ဦးတင်မောင်သိန်းက သျှမ်းသံတော်ဆင့်ကို ပြောပြသည်။

“ ယဉ်မောင်းနဲ့ နွားထိန်းက တော့ ခြေသလုံး ခြေဖဝါး တွေမှာ ထိတယ်။ ဒဏ်ရာ ကတော့ မစိုးရိမ်ရဘူး။ဒါပေမယ့် လူထုအနေနဲ့ လုံခြုံရေးအတွက် စိုးရိမ်မှုရှိနေကြတယ်။ အရင်က ဒီနွားကားတွေ ဟာ တောလမ်းကနေ သွားကြတယ်။ တောလမ်းမှာ လက်နက်ကိုင်နဲ့တွေ့ရင် အခွန်ဆောင်ရတယ်။ ဒီလောက်ဘဲရှိတယ်။ အခုနောက်ပိုင်းတော့ တရားဝင် နွားတွေတင်ပို့ခွင့်ရှိလာတော့ ဒီလိုပစ်ခတ်မှုတွေ ဆက်တိုက်ဖြစ်လာတာပဲ” ဟု ဦးတင်မောင်သိန်း က ဆိုသည်။

လက်ရှိ ပစ်ခတ်ခံရသည့် ကားများမှာ တရုတ်ပြည်သို့ နွားများတရားဝင်တင်ပို့ခွင့် ရသည့် ကုမ္ပဏီ မှ ကားများဖြစ်ကြောင်း လည်း သိရသည်။

ကျောက်မဲမြို့ နယ် နှင် ့သီပေါမြို့နယ် ကြား မကြာခဏ ကားများ ပစ်ခတ်ခံရသည့်အတွက် ကားသမားများနှင့် ဒေသခံများအတွက် လုံခြုံမှုမရှိဖြစ်နေကြောင်း၊ တရားဥပဒေ စိုးမိုးမှု မရှိသည့် နယ်မြေ ဖြစ်နေကြောင်းလည်း ဦးတင်မောင်သိန်း က ပြောသည်။

ကျောက်မဲဒေသခံအမျိုးသားတဦးကလည်း “ နွားတင်တဲ့ကားတွေ က အခုနောက်ပိုင်း ကျနော်တို့ကျောက်မဲ နဲ့သီပေါ လမ်းကြားမှာ အမြဲတမ်းလိုလို ပစ်ခံရတယ်။ ပစ်ခံရရင်လည်း တရားဝင် လိုင်စင် နဲ့နွားကားတွေပဲ။ ပစ်ခံရတဲ့ အချိန်က နေ့ရော ညရောပါပဲ။ အသက်သေဆုံးတဲ့သူတောင် ရှိတယ်” ဟု သျှမ်းသံတော်ဆင့်သို့ ပြောသည်။

တရုတ်ပြည်သို့ တင်ပို့မည့် နွားတင်ကား ပစ်ခံရသည့် ကိစ္စနှင့် ပတ်သတ်ပြီး ကျောက်မဲမြို့နယ် ရဲစခန်းမှ တာဝန်ရှိသူ တဦးက “ မနေ့က နွားတင်ကား တစီး ပစ်ခံရတာ ဟုတ်ပါတယ်။ ဘယ်အဖွဲ့ဆိုတာတော့ မသိဘူး” ဟု ပြောသည်။

သျှမ်းပြည်နယ်မြောက်ပိုင်း ကျောက်မဲမြို့နယ် နှင့် သီပေါမြို့နယ် အတွင်း အစိုးရတပ်မတော်အပြင် သျှမ်းပြည် ပြန်လည် ထူထောင်ရေး ကောင်စီ(RCSS/SSA)၊ တအောင်း(ပလောင်) အမျိုးသား လွတ်မြောက်ရေး တပ်မတော် (TNLA)၊ သျှမ်းပြည် တိုးတက်ရေး ပါတီ(SSPP/SSA) တို့ လှုပ်ရှားနေသည့် နေရာဖြစ်ကြောင်း သိရသည်။

ယခုနှစ် မေလတွင်လည်း သီပေါမြို့နယ် ရေပူ တွင်လည်း ကုန်တင်ကားတစီးကို အမည်မသိ လက်နက်ကိုင်မှ သေနတ်ဖြင့် ပစ်ခတ်ကာ ကားသမား တဦးသေဆုံးပြီး ယာဉ်နောက်လိုက် ၂ ဦး ကျည်ထိမှန်ခဲ့ကြောင်း သိရသည်။

SHARE

LEAVE A REPLY

Please enter your comment!
Please enter your name here