အာဏာသိမ်း အကြမ်းဖက် စစ်ကောင်စီ မှ ပြည်သူများ သတင်းမှန်ကန်မှု မရရှိရန် အတွက် PSI Satellite Myanmar မှ ထုတ်လွှင့်သည့် Mizzima နှင့် DVB channel များကို ပိတ်ထားပြီဖြစ်ကြောင်း စုံစမ်းသိရှိရသည်။

ဧပြီ (၈) ရက်တွင် PSI မှ ထုတ်လွှင့်သည့် Mizzima နှင့် DVB လိုင်းများကို ကြည့်ရှုလို့ မရတော့ကြောင်း အဆိုပါ လိုင်း ၂ လိုင်းအစား စစ်တပ်ပိုင် မြဝတီသတင်းထုတ်လွှင့်လာကြောင်း သတင်းရရှိသည်။

“အဲ့ဒီ ၂ လိုင်းအစား မြဝတီလိုင်းက သူ့သူ ဝင်လာတယ်။ တစ်ချို့တော့ ရေဒီယိုတွေ နားထောင်ကြတယ်။ သတင်းအားလုံး ပိတ်လိုက်တော့ ဘယ်လိုမှ လုပ်လို့မရတော့ဘူး။ အကုန်ပိတ်လိုက်တော့။”ဟု အမည်မဖော်လို သူ တစ်ဦးကပြောသည်။

တစ်ချို့မြို့နယ်များတွင် တပ်ထားသည့် စလောင်းများကို လိုက်ဖြုတ်သည်ကို တွေ့ရကြောင်း ဒေသခံများက ပြောဆိုကြသည်။

“အွန်လိုင်းရတဲ့ နေရာ ရောက်မှပဲ သိရတယ်။မဇ္ဈိမ နဲ့ DVB သတင်းလိုင်း ပိတ်လိုက်တယ်ဆိုတာ မနေ့ညက ဖွင့်မရဘူး ဘာဖြစ်လဲလို့ ခုမှ သိရတယ်။ လိုင်းလည်း မရ စစ်မှန်တဲ့ သတင်းလည်း ကြည့်မရ။ ပြည်သူတွေ နားကန်းသလို ဖြစ်သွားပြီ။” ဟု အမည်မဖော်လို သူ တစ်ဦး ကပြောသည်။

လက်ရှိတွင် အကြမ်းဖက်စစ်ကောင်စီမှ အင်တာနက်ပိတ်ခြင်း၊ ဖုန်းများ စစ်ဆေးခြင်း၊ စလောင်းများ ပိတ်ခြင်းသည် ပြည်သူများအတွက် မှန်ကန်သည့် သတင်းရရှိမှုကို ပိတ်ပင်ထားသည့်သဘောဖြစ်သည်။

လက်ရှိ ပြည်တွင်းတွင် ရရှိနေသည့် FTTH ဖိုက်ဘာလိုင်းများကိုလည်း ဧပြီ ၁၀ရက်တွင် ဖြတ်တောက်သွားမည်ဟုလည်း သတင်းရရှိထားသည်။

မြန်မာနိုင်ငံတွင်းရှိ လွတ်လပ်သည့် သတင်းဌာနကြီး (၅) ခုဖြစ်သည့် DVB သတင်းဌာန၊ Myanmar Now သတင်းဌာန၊မဇ္ဈိမသတင်းဌာန၊ 7 Days သတင်းဌာန နှင့် ခေတ်သစ်မီဒီယာ သတင်းဌာန တို့သည် အာဏာသိမ်း အကြမ်းဖက် စစ်ကောင်စီမှ သတင်းပိတ်ပင်တားဆီးခဲ့ကြောင်း ထုတ်ပြန်ကြေညာခဲ့သည်။