NCA လက်မှတ်ထိုးထားသော ငြိမ်းချမ်းရေးလုပ်ငန်းစဉ်ဦးဆောင်အဖွဲ့ (PPST) နှင့် ပြည်ထောင်စု နိုင်ငံရေး ဆွေးနွေးရေး ကော်မတီ (FPNCC)တို့ ပူးပေါင်းမှသာ ဖက်ဒရယ်တပ်မတော် တည်ဆောက်နိုင်မည် ဖြစ်ကြောင်း ဗိုလ်ချုပ်ကြီး ယွက်စစ်က ပြောဆိုလိုက်သည်။

ပြည်ထောင်စု လွှတ်တော် ကိုယ်စားပြု ကော်မတီ (CRPH) မှ မတ် ၃၁ ရက် တွင် ဖက်ဒရယ်ဒီမိုကရေစီ ပဋိညာဉ် ကိုထုတ်ပြန်ကြေညာခဲ့ပြီး ဖက်ဒရယ်တပ်မတော် ထူထောင်ရန်အတွက် တိုင်းရင်းသား လက်နက်ကိုင်များနှင့် တွေ့ဆုံဆွေးနွေးမှုများ ရှိခဲ့ကြောင်းလည်း သိရသည်။

ထို့ကြောင့် ဖက်ဒရယ် တပ်မတော် ထူထောင်နိုင်ရန်အတွက် CRPH အနေဖြင့် FPNCC နှင့် PPST တို့ကို ဆွေးနွေးရမည်ဖြစ်ကြောင်း RCSS/SSA ၏ ဥက္ကဌ ဗိုလ်ချုပ်ကြီး ယွက်စစ် ကပြောသည်။

“NCA လက်မှတ်ထိုးထားတဲ့ အဖွဲ့ (PPST) နဲ့ မထိုးရသေးတဲ့ အဖွဲ့ ( FPNCC ) ဒီနှစ်ဖွဲ့က ဆွေးနွေးရမယ်။ ဒီနှစ်ဖွဲ့က ဆွေးနွေးပြီး သဘောတူရင် ဖက်ဒရယ် တပ်မတော်က လွယ်သွားပြီ။ အားလုံး သဘောမတူရင်တောင် ဘယ်နှစ်ဖွဲ့နဲ့ စဖွဲ့မလဲဆိုတာ လည်းလုပ်လို့ရတယ်၊ CRPH အနေနဲ့ တစ်ဖွဲ့ပြီးတဖွဲ့လိုက်တွေ့သင့်တယ်။ သူတို့ ဒီ့ထက်ပို အလုပ်လုပ်ရမယ် ” ဟု ဗိုလ်ချုပ်ကြီး ယွက်စစ် က သျှမ်းသံတော်ဆင့် နှင့် သီးသန့်တွေ့ဆုံစဉ် ပြောသည်။

အမေရိကန်တော်လှန်ရေးတွင်လည်း ဖက်ဒရယ်တပ်မတော် တည်ဆောက်ရာ (၁၃) ဖွဲ့ နှင့် စတင်ထူထောင်ကြောင်း ၎င်းက ဆက်ပြောသည်။

“ဒါကြောင့် ဘယ်နှစ်ဖွဲ့နဲ့ စဖွဲ့ပြီး လုပ်မလဲဆိုတာ ကျနော်တို့ ဆွေးနွေးရမယ်။ ပွင့်ပွင့်လင်းလင်း မဆွေးနွေးရသေးပဲ ကြေညာချက်ထုတ်ရင် လွယ်တာပေါ့။ ဒါပေမယ့် လက်တွေ့အကောင်အထည်ဖော်နိုင်ဖို့က အရေးကြီးတယ်။” ဟု ဗိုလ်ချုပ်ကြီး ယွက်စစ် ကပြောသည်။

လက်ရှိတွင် CRPH မှ NCA လက်မှတ်ရေးထိုးထားသော တစ်နိုင်ငံလုံး ပစ်ခတ်တိုက်ခိုက် ရပ်စဲရေး သဘောတူစာချုပ် လက်မှတ်ရေးထိုးထားသော တိုင်းရင်းသား လက်နက်ကိုင် တော်လှန်ရေး အဖွဲ့အစည်းများ၏ ငြိမ်းချမ်းရေး လုပ်ငန်းစဉ် ဦးဆောင်သောအဖွဲ့ (PPST) တို့နှင့် တွေ့ဆုံဆွေးနွေးခဲ့ကြောင်း သိရသည်။

PPST သည် NCA လက်မှတ်ထိုးထားသည့် အဖွဲ့ ၏ ငြိမ်းချမ်းရေးလုပ်ငန်းစဉ်ဖော်ဆောင်ရေး အဖွဲ့ဖြစ်ပြီး၊ PPSTတွင်ပါဝင်သည့်အဖွဲ့များမှာ RCSS၊ KNU ၊ PNLO ၊ ဒီမိုကရေစီအကျိုးပြု ကရင်တပ်မတော် (DKBA ) ၊ ကရင်အမျိုးသားအစည်းအရုံး၊ ကရင်အမျိုးသားလွတ်မြောက်ရေး တပ်မတော် -ငြိမ်းချမ်းရေး ကောင်စီ (KNU/KNLA-PC ) ၊ ရခိုင်ပြည်လွတ်မြောက်ရေး ပါတီ (ALP)၊ ချင်းအမျိုးသားတပ်ဦး (CNF) ၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ် တပ်ဦး (ABSDF)၊ မွန်ပြည်သစ်ပါတီ (NMSP) နှင့် လားဟူဒီမိုကရက်တစ် အစည်းအရုံး (LDU) တို့ပါဝင်သည်။

FPNCC အဖွဲ့ဝင်များသည် တနိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ် (NCA) လက်မှတ်မထိုးထားသည့် “ဝ” ပြည်သွေးစည်းညီညွတ်ရေးပါတီ(UWSP)၊ ကချင်လွတ်မြောက်ရေးတပ်မတော် (KIA) ၊ ရှမ်းပြည်တိုးတက်ရေပါတီ (SSPP/SSA)၊ မိုင်းလားအဖွဲ့(NDAA) ၊ ကိုးကန့်လက်နက်ကိုင် (MNDAA)၊ တအောင်း(ပလောင်) တပ်ဖွဲ့ ( TNLA) နှင့် ရခိုင်တပ်မတော် (AA) တို့ ဖြစ်ကြသည်။