မြန်မာ-တရုတ်နယ်စပ် သျှမ်းမြောက် မူဆယ်မြို့ တွင် တရုတ်- မြန်မာ ငွေလှဲလှယ်ပေးသည့်သူများ၏ အမည်စာရင်းကို အကြမ်းဖက် စစ်ကောင်စီမှ လိုက်လံကောက်နေသဖြင့် ငွေလွှဲလုပ်ကိုင်သူများ စိုးရိမ်နေကြကြောင်း စုံစမ်းသိရှိရသည်။
ယမန်နေ့ (ဧပြီ ၄)ရက် မနက်ပိုင်းတွင် အကြမ်းဖက်စစ်ကောင်စီ အုပ်စုမှ မူဆယ်မြို့ နာရီစဉ်၊ ဈေး အနီးပတ်ဝန်းကျင်တွင် တရုတ်-မြန်မာ ငွေလှဲလှယ်မှု ပြုလုပ်နေသည့် သူများ၏ အမည်စာရင်း၊ ဖုန်းနံပတ် နှင့် မှတ်ပုံတင်များကို လိုက်လံကောက် နေ သဖြင့် ငွေလွှဲလုပ်ကိုင်သူများက စိုးရိမ် ထိတ်လန့်နေရကြောင်း မူဆယ်ဒေသခံများက ပြောဆိုသည်။
“ သူတို့ မနေ့က မနက်လိုက်ကောက်တာ၊ နယ်ထိန်းက လာကောက်ပြီးတော့ စစ်တပ်က လိုက်လာတယ်။ နာမည်၊ မှတ်ပုံတင်၊ နေရာ၊ အဘ အမည်တွေကိုတောင်းသွားတာ။ ဘာကြောင့်ကောက်တာလဲတော့ မသိရသေးဘူး” ဟု မူဆယ်မြို့ဒေသခံတစ်ဦးက ပြောသည်။
ထို့အပြင် တရုတ်-မြန်မာ ငွေလှဲပေးသူများကို ဒေါ်လာငွေ လာလှဲသူရှိပါက မလှဲပေးရန် နှင့် အကယ်၍ ဒေါ်လာလာရောက်လှဲသူများရှိပါက ဖုန်းဆက်အကြောင်းကြားရန်လည်း အကြမ်းဖက်စစ်ကောင်စီက ပြောဆိုခဲ့သည်။
“ သူတို့ (စစ်ကောင်စီ) က ဒေါ်လာလာလှဲရင် မလှဲပေးနဲ့ပြောတယ်။ လာလှဲရင်လည်း သူတို့ကို ဖုန်းဆက်လို့ ပြောသွားတယ်။ တရုတ်ငွေနဲ့ လှဲတာတော့ ဘာမပြောဘူး။ ဒေါ်လာလှဲရင်ပြောတာ။ အရင်ကတည်းကတော့ ဒေါ်လာတော့သိပ်မလှဲဖူးဘူး” ဟုငွေလှဲလှယ်လုပ်နေသည့် ဒေသခံတစ်ဦးက ပြောသည်။
မူဆယ်မြို့တွင် ယခင်းကတည်းက မြန်မာ နှင့် တရုတ် ငွေလှဲမှုကိုသာ အဓိကလုပ်ဆောင်ခဲ့ကြောင်း၊ ဒေါ်လာငွေကို ဘဏ်တွင် အများစုသွားလှဲခဲ့ကြောင်းသိရသည်။
လက်ရှိ မူဆယ်မြို့တွင် အကြမ်းဖက် စစ်ကောင်စီ အုပ်စုသည် လမ်းသွားလမ်းလာသူများ၏ လက်ကိုင်းဖုန်းများကို လိုက်လံစစ်ဆေးနေကြောင်းသိရသည်။
