သျှမ်းတောင် တောင်ကြီး ဘုရားဖြူရပ် နယ်မြေ (၅) ကို အကြမ်းဖက် စစ်ကောင်စီ တပ်ဖွဲ့က ယနေ့ (မတ် ၂၃)ရက် ညနေပိုင်းတွင် နေအိမ်အတွင်းထိဝင်ရောက်ပြီး လူငယ်(၄)ဦး ဖမ်းဆီးသွားကြောင်း သတင်းရရှိသည်။

တောင်ကြီး ဘုရားဖြူနယ်မြေ(၅)ကို အကြမ်းဖက် စစ်ကောင်စီက ပြည်သူများကို နေအိမ်ထဲထိ ဝင်ရောက်ဖမ်းဆီးမှု ပြုလုပ်နေသည်။

“ ဒီနေ့ ညနေ (၄)နာရီ မှာ ယောင်္ကျားလေး (၄)ယောက်ကို ဆွေးနွေးစရာရှိတယ်ဆိုပြီး လာခေါ်သွားတယ်။ အိမ်ထဲထိဝင်ဖမ်းသွားတာပါ” ဟု ရပ်ကွက်နေပြည်သူတဦးက သျှမ်းသံတော်ဆင့်ကို ပြောသည်။

အကြမ်းဖက် စစ်ကောင်စီသည် ပြည်သူများ၏နေအိမ်ကို မတ် ၂၁ရက်နေ့မှ စတင်ကာ အသက် (၆၀)အရွယ်ရှိ အမျိုးသား တဦးကု နေအိမ်ထဲထိ ဝင်ဆွဲ ရိုက်နှက်ဖမ်းဆီးခေါ်ဆောင်သွားပြီး၊ အာမခံဖြင့် ပြန်လွှတ်ပေးပြီး၊ ယနေ့ လည်း ထိုသူကိုထပ်မံဖမ်းဆီးသွားကြောင်း ၎င်း ရပ်ကွက်နေသူက ပြောသည်။

တောင်ကြီး မြို့ ၊ ဘုရားဖြူရပ် နယ်မြေ (၅ )အောတာချောင်း အနီး ရပ်ကွက်တွင် ပြီးခဲ့သည့် မတ်လ ၂၁ ရက်နေ့ ညပိုင်းတွင်လည်း နာရေး အိမ်မှ လူ ၉ ဦးခန့် ကို အကြမ်းဖက် စစ်ကောင်စီ တပ်ဖွဲ့ က ဖမ်းဆီးခဲ့ကြောင်း၊ ထိုဖမ်းဆီးခံရသူများသည် မြန်မာပြည်ဖွား တရုတ်လူမျိုးများဖြစ်ကြကြောင်း သိရသည်။

ထို့ပြင် ယနေ့ (မတ် ၂၃)ရက် တောင်ကြီးမြို့ ရတနာသီရီ ရပ်ကွက် ၌ မနက် မိုးမလင်းခင်တွင်လည်း ကျောင်းဆရာမ တဦး နှင့် သူ့၏ သမီး တဦးကို အကြမ်းဖက်စစ်ကောင်စီ က နေအိမ်ထဲထိဝင်ရောက်ကာ အကြောင်းမဲ့ ဖမ်းဆီးသွားခဲ့ပြီး၊ ယနေ့ထိတိုင်းမလွှတ်သေးကြောင်း သိရသည်။

ဆက်လက်ပြီး တောင်ကြီး ဒေသခံပြည်သူများပြောပြချက်အရ ရတနာ သီရိရပ်ကွက်ရှိ ကျောင်းဆရာမ သားအမိ (၂)ဦးအပြင် အရပ်သား (၇)ဦးကိုလည်း ဖမ်းဆီးခဲ့သည်။

စစ်ကောင်စီနှင့် ရဲများကဖမ်းဆီး‌ခေါ်ဆောင်သွားခဲ့ ပြီး ယနေ့ ဖမ်းဆီးခံသူများမှာ တရုတ်လူမျိုးများဖြစ်ကြောင်းသိရသည် ။

တောင်ကြီးမြို့ ချမ်းမြသာစည်ရပ်ကွက် အုပ်ချုပ်ရေးမှူးရုံး၊ ရတနာသီရိရပ်ကွက် အုတ်ဖိုကျောင်းနှင့် သုံးလမ်းဆုံထိပ် အမှတ်(၉ )ကျောင်းတွင် အကြမ်းဖက်စစ်ကောင်စီ တပ်ဖွဲ့ တပ်စွဲထားကြောင်းသိရသည်။