သျှမ်းပြည် တောင်ပိုင်း လင်းခေးခရိုင်အတွင်းရှိ ပြည်သူများ ကိုဗစ်-၁၉ ကာကွယ်ဆေးထိုးထားသည့် သက်သေ အထောက်အထား မရှိလျှင် ခရီးသွားခွင့်မရှိကြောင်း စုံစမ်းသိရသည်။
လက်ရှိမှာ စစ်အစိုးရ က သျှမ်းပြည်အပါအဝင် မြန်မာနိုင်ငံတဝှမ်းတွင် ကိုဗစ်-၁၉ ကာကွယ်ဆေးထိုးပေးနေသော်လည်း ပြည်သူများက ထိုကိုဗစ်-၁၉ ကာကွယ်ဆေးကို သွားရောက်မထိုးကြကြောင်း၊ ပြည်သူများက ကိုဗစ်-၁၉ ကာကွယ်ဆေးကို အယုံအကြည်မရှိသည့်အတွက် သွားမထိုးကြကြောင်း လည်း စုံစမ်းသိရသည်။
“ ကျမတို့ လင်းခေးပြည်သူတွေက ကိုဗစ် ကာကွယ်ဆေးကို မယုံလို့ သွားမထိုးတာ။ ဘာဆေးမှန်းလည်း မသိဘူး။ တချို့ကတော့ ရောဂါအခံရှိလို့သွားမထိုးရဲဘူး။ အခုတော့ ခရီးသွားရင် ကိုဗစ် ကာကွယ်ဆေးထိုးထားတဲ့လက်မှတ်မပါရင် မသွားရဘူးတဲ့” ဟု လင်းခေးမြို့ လူငယ်တဦး က သျှမ်းသံတော်ဆင့်ကို ပြောသည်။
ယမန်နေ့ (မတ် ၁၉ )ရက်တွင် လင်းခေးမြို့ ဝမ်ဟတ်တိုက်နယ် ဒေသခံတချို့သည် ခရီးသွားရန် လင်းခေးမြို့ဗျူဟာတပ် ဖြတ်သန်းရာ ကိုဗစ်-၁၉ ထိုးထားသည့် လက်မှတ်မရှိသည့်အတွက် လမ်းပေးမဖြတ်ကြောင်းလည်း ၎င်း လူငယ်က ဆိုသည်။
“ မနေ့က ကျနော်တို့ တောင်ကြီးဘက် သွားမလို့။ ကိုဗစ် လက်မှတ်မရှိလို့ဆိုပြီး ဗျူဟာတပ်က ပေးမဖြတ်ဘူး။ အဲ့ဒါနဲ့ အိမ်ပြန်ခဲ့ရတယ်” ဟု လင်းခေးမြို့နယ် ဒေသခံတဦးက ပြောသည်။
ထို့အပြင် သျှမ်းတောင် မိုင်းကိုင်မြို့တွင်လည်း ကိုဗစ်-၁၉ ကာကွယ်ဆေးထိုးရန် အတွင် စစ်ကောင်စီ အစိုးရ က ကြေညာထားသော်လည်း ပြည်သူတဦးတယောက်မှ သွားရောက်ထိုးကြခြင်းမရှိကြောင်း သိရသည်။
ထို့ကြောင့် ပြည်သူများ ကာကွယ်ဆေးမထိုးသည့်အတွက် မိုင်းကိုင်မြို့နယ် ကုန်းလုံကျေးရွာ ဒေသခံများကို ကိုဗစ်-၁၉ ကာကွယ်ဆေးထိုးပါက ကျပ်ငွေ ၂သောင်းရမည်ဆိုပြီး ပြောဆိုသဖြင့် ဒေသခံများက လာရောက်ထိုးကြကြောင်း သိရသည်။
“ ကိုဗစ်ဆေးထိုးရင် ကျပ် ၂သောင်းရမယ်ဆိုလို့ ရွာကလူတွေ လာကြတယ်။ ထော်လဂျီတွေ နဲ့လာတယ် တော်တော်များတယ်။ မြို့ပေါ်ကလူတွေကတော့ သွားမထိုးကြဘူး” လို့ မိုင်းကိုင်ဒေသခံ တဦး ကပြောသည်။
သျှမ်းပြည်တဝှမ်း စစ်အာဏာရှင် အလိုမရှိ ဆန္ဒထုတ်ဖော်မှုကို စစ်ကောင်စီ လက်နက်ကိုင် တပ်ဖွဲ့ က အကြမ်းဖက်ဖြိုခွင်း မှုကို နေ့စဉ် နှင့် အမျှ ပြုလုပ်နေကြောင်းသိရသည်။
Leave a Comments