သျှမ်းရှေ့ တာချီလိတ်မြို့ ယနေ့ (မတ် ၁၉ )ရက် နေ့လည်တွင် စစ်အာဏာရှင် အလိုမရှိ ဆန့်ကျင် ဆန္ဒပြသည့် လူငယ် ၆ဦးကို စစ်ကောင်စီ လက်နက်ကိုင်တပ်ဖွဲ့ က ဖမ်းဆီးသွားကြောင်း သတင်းရရှိသည်။
တာချီလိတ် ဆန္ဒပြလူငယ်များကို စစ်ကောင်စီ လက်နက်ကိုင်တပ်ဖွဲ့ မှ လိုက်လံရှာဖွေနေသည်မှာ ၂ရက်ခန့်ရှိပြီဖြစ်ပြီး ယနေ့နေ့လည်ပိုင်းတွင် ၎င်းတို့နေအိမ်များ၌ ဖမ်ဆီးသွားခြင်းဖြစ်ကြောင်း သိရသည်။
“ ဆန္ဒပြ လူငယ် ၆ဦးဖမ်းသွားတာပဲ စာရင်းသိရသေးတယ်။ ဒီထက်များနိုင်တယ်။ အရေအတွက် တိကျမသိရသေးဘူး” ဟု တာချီလိတ်ဒေသခံ တဦးက သျှမ်းသံတော်ဆင့်ကို ပြောသည်။
လက်ရှိအချိန်ထိ သျှမ်းသံတော်ဆင့် စုံစမ်းရသလောက် ဆန္ဒပြသူ (၆)ဦးသာ သိရပြီး၊ ဆက်လက်စုံစမ်းကာ သတင်းတင်ဆက်သွားမည်။
တာချီလိတ်တွင် ဆန္ဒပြ လူထုသပိတ်ကို စစ်ကောင်စီက နည်းမျိုးစုံ ဖြိုခွင်းနေသော်လည်း လူငယ်များကလည်း စစ်အာဏာရှင်ကို ဆက်လက်ဆန့်ကျင်ဆန္ဒပြနေသေးကြောင်း သိရသည်။