သျှမ်းပြည် မြောက်ပိုင်းလားရှိုးမြို့ ရပ်ကွက် (၁၁) တွင် အသစ်ခန့်အပ်မည့် အုပ်ချုပ်ရေးမှူး ကို အလိုမရှိကြောင်း ဆန္ဒထုတ်ဖော်သူ (၃)ဦး ဖမ်းဆီးခံရပြီး ယနေ့ထိ ပြန်မလွှတ်သေးကြောင်း စုံစမ်းသိရသည်။
ယမန်နေ့ (မတ် ၁၀)ရက် မနက်ပိုင်းတွင် လားရှိုးမြို့ ရပ်ကွက် (၁၁)တွင် အသစ်ခန့်အပ်မည့် အုပ်ချုပ်ရေးမှူး ကို အလိုမရှိကြောင်း ဆန္ဒပြ ကန့်ကွက်မှုပြုလုပ်ရာထိုထဲမှာ (၃)ဦးကို ဖမ်းဆီးခဲ့ပြီး ယနေ့ထိတိုင် မလွှတ်ပေးသေးကြောင်း လားရှိုးမှ မျက်မြင်တွေ့ရှိသူ တဦးက ပြောသည်။
“ ဆန္ဒပြတာကတော့ ၂၀ကျော်တယ်။ အုပ်ချုပ်ရေးမှူးရုံးရှေ့မှာ ဆန္ဒလာပြတော့ ရဲတွေ ရောက်လာတယ်။ အဲ့မှာ ဆန္ဒပြတဲ့သူ (၃)ဦးကိုဖမ်းသွားတာပဲ။ အမျိုးသား ၂ဦး ၊ အမျိုးသမီး ၁ဦးပါသွားတယ်” ဟု မျက်မြင်တွေ့ရှိခဲ့တဲ့ လားရှိုးဒေသခံ အမျိုးသားက ဆိုသည်။
စစ်အာဏာရှင်ကျဆုံးရေးအတွက် လားရှိုး လူထုသပိတ် ကို စစ်ကောင်စီ၏ လက်နက်ကိုင်တပ်ဖွဲ့ က နေ့စဉ် အကြမ်းဖက် ဖြိုခွင်းမှုပြုလုပ်ပြီး ဆန္ဒပြသည့်နေ့မှ စကာ ယနေ့ထိ ဖမ်းဆီးခံရသူ ၃၇ဦးရှိကြောင်း သိရသည်။
Leave a Comments