သျှမ်းပြည်တောင်ပိုင်း လွိုင်လင်ခရိုင် လွိုင်လင်မြို့ နှင့် ပင်လုံမြို့ရှိ ဆန္ဒဖော်ထုတ်သည့် ပြည်သူများကို စစ်ကောင်စီ၏ လက်နက်ကိုင်တပ်ဖွဲ့က အကြမ်းဖက် ဖမ်းဆီးခဲ့ပြီး ညတွင်းချင်း ပြန်လည်လွှတ်ပေးခဲ့ကြောင်း စုံစမ်းသိရှိရသည်။
ယမန်နေ့ မတ်လ (၈) ရက်တွင် ပင်လုံမြို့လယ်ရှိ ရေကန်အနီးတွင် အချုပ်ကားများ ရဲကားများ ရပ်ထားပြီး ဖြတ်သွားသည့် သူများကို စစ်ဆေးမေးမြန်းပြီး အချုပ်ကားပေါ် ဖမ်းဆီးဖထားသည့် ပင်လုံမြို့တွင်း ဖမ်းခံရသူ (၆) ဦး နှင့် လွိုင်လင်မြို့တွင်း ဖမ်းခံရသူ (၃) ဦး စုစုပေါင်း (၉ ) ဦး ဖမ်းဆီးခဲ့ကြောင်း သိရသည်။
ထိုဖမ်းခံရသူ (၉ )ဦးကို လွိုင်လင်၊ ပင်လုံ ပရဟိတအဖွဲ့၊ မြို့မိမြို့ဖ တို့ ပူးပေါင်းကာ အုပ်ချုပ်ရေးမှူးရုံး၊ ရဲမှူး၊ စစ်ဗိုလ်များနှင့်သွားရောက်ညှိနှိုင်းပြီး၊ အာမခံ လက်မှတ်ရေးထိုးပေးခဲ့ရကြောင်း သက်သေ အဖြစ်သွားရောက် ကူညီပေးသည့် အမျိုးသားတဦး က သျှမ်းသံတော်ဆင့်ကို ပြောသည်။
“မနေ့ကတော့ ကျနော်တို့ တွေ သွားညှိနှိုင်းပေးတယ်။ ဖမ်းခံရတဲ့ကလေးတွေကို အာမခံချက် ရေးပြီး သက်သေအဖြစ် လက်မှတ်ထိုးပေးခဲ့ရတယ်” ဟု ၎င်း အမျိုးသား က ဆိုသည်။
ယမန်နေ့ တွင် ဖမ်းဆီးခံရသူများကို အကြောင်း မရှိဘဲ ရဲအချုပ်ကားပေါ် ဆွဲတင်သွားကြောင်း ဖမ်းဆီးခံရသည့် (၉ )ဦးကို လွိုင်လင်မြို့ရှိ တပ်တွင် ထိန်းသိမ်းထားပြီး၊ ထိုနေ့ ည (၈)နာရီတွင် ပြန်လည် လွှတ်ပေးခဲ့ကြောင်း သိရသည်။
“မနေ့က ကျနော်တို့ကို နေ့လည် ၁၂ နာရီခွဲလောက်မှာ ပင်လုံ ရေကန်နားမှာ ဖမ်းတယ်။ ဘာကြောင့် ကျနော်တို့ကို ဖမ်းလဲဆိုတာ မေးတော့ သူတို့ဘာမှ ပြန်မပြောဘူး။ ကားပေါ်ပဲ တက်ခိုင်းတယ်။ ဆိုင်ကယ်သော့လည်း ချက်ချင်းယူထားတယ်။ ဘာဖြေရှင်းချက်မှလည်း မပေးဘူး” လို့ ပင်လုံမြို့ မှ ဖမ်းဆီးခံရသူ တဦးကပြောသည်။
လွိုင်လင်မြို့ နှင့် ပင်လုံမြို့မှ လူငယ်များ စစ်အာဏာရှင်စနစ်ကို ဆန့်ကျင်ဆန္ဒထုတ်ဖော်မှု ပြုလုပ်မည်ကို ကြောက်သဖြင့် စစ်တပ်မှ ခေါ်ထားခြင်းဖြစ်ကြောင်း လည်း ဖမ်းခံရသည့် လူငယ်များက ပြောသည်။
အလားတူ မတ်လ (၈) ရက်နေ့တွင်လည်း တောင်ကြီးမြို့ရှိ ဆန္ဒဖော်ထုတ်ပွဲမှာ သတင်းရယူနေသည့် သတင်းသမားတဦးကိုလည်း ဖမ်းဆီးပြီး နေ့ချင်း ပြန်လည် လွှတ်မြောက်ပေးခဲ့ကြောင်း သိရသည်။
မတ်လ (၈) ရက်တွင် တနိုင်ငံလုံးရှိ သပိတ်စစ်ကြောင်းများကို စစ်တပ် နှင့် ရဲများက လိုက်လံ ပိတ်ပင်တားဆီးခြင်းများ ပြုလုပ်ပြီး အကြမ်းဖက် ဖြိုခွင်းမှုများလည်း ရှိကြောင်း သိရသည်။
